Anthu a Madzindza Anango Adzakhala Akristu

Apostolo abvera ntemo wa Yezu toera kumwaza mphangwa zadidi pa dziko yonsene yapantsi. Mu caka 47 Pakumala Kubalwa Kwa Kristu, abale a ku Antyokiya atuma Paulu na Bharnabhe toera kuenda kamwaza mphangwa. Paulendo unoyu, Paulu na Bharnabhe amwaza mphangwa mbuto zakusiyana-siyana za Azya Menori, Dherbhe, Listra na Ikoniyo.

Paulu na Bharnabhe, amwaza mphangwa zadidi kuna anthu onsene. Iwo amwaza mphangwa kuna anthu akupfuma, akutcerenga, akugwesera, pontho kuna aphale na atsikana. Anthu azinji atawira undimomwene thangwi ya Yezu. Ntsiku inango, Paulu na Bharnabhe amwazira mphangwa mamuna akhacemerwa Serjio Paulu, wakuti akhali ntongi wa ku Xipre. Mbwenye ng’anga m’bodzi ayesera kuapingiza. Paulu apanga ng’anga unoyu: ‘Yahova anakutcunyusa.’ Buluka penepo, ng’anga unoyu adzakhala boliboli. Ntongi Serjio pidaona iye pyenepi, adzakhala Nkristu.

Paulu na Bharnabhe akhamwaza mphangwa m’mbuto zonsene. Iye akhamwaza mphangwa nyumba na nyumba, m’mabazari, m’miseu na m’masinagoga. Pidapita iwo na mu nzinda wa Listra, Paulu na Bharnabhe awangisa mamuna m’bodzi wakuti akhadalamala miyendo. Anthu adaona cirengo ceneci akhanyerezera kuti iwo akhali alungu, natenepa atoma kualambira. Mbwenye Paulu na Bharnabhe alonga: ‘Ife ndife anthu ninga imwe. Lambirani basi ene Mulungu!’ Buluka penepo, Ayuda anango abwera mbanyengerera mwinji wa anthu toera kusandukira Paulu na Bharnabhe. Na thangwi ineyi, iwo amenya Paulu na miyala, ankwekweta mpaka kunja kwa nzinda mbanyerezera kuti iye afa. Mbwenye Paulu nee akhadafa. Natenepa, abale ankwata mbaenda naye pontho mu nzinda. Mukupita kwa ndzidzi, Paulu abwerera ku Antiyokiya.

Mu caka 49 P.K.K., Paulu acita pontho ulendo unango wakumwaza mphangwa. Pakutoma aenda pontho kaona abale a ku Azya Menori. Buluka penepo, iye aenda kamwaza mphangwa mbuto zakutali kakamwe ku Europa. Iye aenda ku Atena, ku Efeso, ku Filipi, ku Tesalonika na m’mizinda inango. Luka, Sila na Timoti acita ulendo pabodzi na Paulu. Iwo aphata basa pabodzi toera kukhazikisa mipingo na kuiphedza toera ithambaruke. Paulu akhala ku Korinto caka cibodzi na hafu toera kuphedza abale. Iye amwaza mphangwa, apfundzisa anthu, pontho alemba matsamba toera kuatumiza m’mipingo mizinji. Paulu akhacitambo basa yakusona matenda. Mukupita kwa ndzidzi, Paulu abwerera ku Antyokiya.

Mu caka 52 P.K.K., Paulu acita ulendo wace wacitatu wakumwaza mphangwa, iye atoma ku Azya Menori mbaenda mpaka ku Filipi. Buluka penepo aenda ku Korinto. Paulu amala pyaka pizinji ku Efeso mbakamwaza mphangwa zadidi, kuwangisa atenda na kuphedza mpingo. Ntsiku zonsene akhacita nkhani zapakweca mu sala ikulu ya pa xikola. Anthu azinji akhambvesera, adzakhala Akristu. Pidamala iye kumwaza mphangwa zadidi m’madziko mazinji, Paulu aenda ku Yerusalemu.