Nyakuonera Kaidi Apfundza Undimomwene

Ku Filipi kukhali na ntsikana m’bodzi wakuti akhali na dimonyo. Dimonyo unoyu akhancitisa kulotera pinthu pyantsogolo. Na thangwi ineyi, ale akhaphatira iye basa akhawina kobiri izinji. Pidafika Paulu na Sila ku Filipi, ntsikana unoyu akhaatowerera mu ntsiku zizinji. Buluka penepo, Dimonyo ancitisa kulonga tepa: “Anthu awa ndi atumiki a Mulungu Wankulu Kakamwe.” Pakumalisa, Paulu apanga Dimonyo: ‘Mu dzina ya Yezu, buluka muna ntsikana uyu!’ Natenepa, dimonyo yabuluka.

Ale akhaphatira iye basa pidaona iwo kuti nee mbadawinabve kobiri, iwo aipirwa kakamwe. Iwo akwekweta Paulu na Sila mbaenda nawo kuna atongi, mbalonga: ‘Amuna awa nee akubvera mwambo, pontho asadzudzumisa kakamwe nzinda wathu.’ Anyakutonga alonga kuti Paulu na Sila asafunika kumenywa mbaikhwa nkaidi. Nyakuonera kaidi aaphata mbaaikha nkaidi yacidima mbamanga miyendo yawo pa phindi ya muti.

Paulu na Sila akhaimba nyimbo zakusimba Yahova, pontho anyankaidi anango akhaabvesera. Penepo pene kwacitika citeketeke cikulu pakati pa masiku anewa cakuti cacitisa kaidi yonsene kutekenyeka. Kusiyapo pyenepi, misuwo yonsene ya kaidi yafunguka, pontho maunyolo akhadamangwa na anyakaidi onsene asudzuka. Nyakuonera kaidi athamanga toera aende kaone pidacitika, pidafika iye kweneko agumana kuti misuwo yonsene ya kaidi ikhali bwandzu. Natenepa iye akhafuna kupheka ekhene thangwi akhanyerezera kuti anyankaidi onsene amala kuthawa.

Mwakucimbiza, Paulu akhuwa: ‘Leka kupheka, thangwi tonsene tiri muno!’ Nyakuonera kaidi aenda mwakucimbiza kuna Paulu na Sila, iye agodama mbabvundza: “Ndisafunika kucitanji toera ndipulumuswe?” Iwo antawira: ‘Iwe na anthu a panyumba pako musafunika kukhulupira Yezu.’ Buluka penepo, Paulu na Sila aapfundzisa mafala a Yahova. Na thangwi ineyi, nyakuonera kaidi na onsene a panyumba pace abatizwa.