Tsamba ya Mathubo Akutonga

Abale na Alongo Akufunika:

Ninga alambiri a Yahova, ife tisafuna kakamwe Mafalace, Bhibhlya. Ife tiri na cinyindiro cakuti Bhibhlya isalonga mbiri zandimomwene, isapereka pitsogolero pyakunyindirika toera kukhala m’maso, pontho isapangiza ufuni ukulu kakamwe uli na Yahova kuna m’bodzi na m’bodzi wa ife. (Masalmo 119:105; Luka 1:3; 1 Juwau 4:19) Ife tisafuna kakamwe kuphedza anango toera adziwe undimomwene unagumanika m’Mafala a Mulungu. Na thangwi ineyi, tiri akutsandzaya kubulusa bukhu ino ya nsolo wakuti: “Pfundzani Mbiri za M’Bhibhlya.” Tendeni tione pinthu pingasi pinagumanika m’bukhu ino.

Bukhu ino yacitwa makamaka toera kuphedza anang’ono. Mbwenye iyo inakwanisambo kuphedza akulu akuti asafuna kupfundza pizinji thangwi ya Bhibhlya. Ngakhale ife akuti tapfundza kale undimomwene, kukumbuka mbiri zenezi kunatiphedza kakamwe, thangwi Bhibhlya ndi bukhu ya anthu onsene, pontho pinapfundza ife mwenemu pinatiphedza toera tikhale akutsandzaya kakamwe.

Bukhu ino isalonga pya mbiri za m’Bhibhlya kutomera mu ndzidzi udacitwa anthu. Iyo isalonga mbiri zenezi munjira yakukhonda nentsa na yakubveka mwadidi, pontho mbiri zenezi zalembwa ninga mudacitikira izo.

Bukhu ino nee isalonga basi ene pya mbiri za m’Bhibhlya. Malemba na mafoto anagumanika mwenemo akhunganywa toera kuphedza nyakuleri kuona ninga ali mu ndzidzi udacitika pinthu pyenepi mbadziwa mabvero akhali na anthu anewa.

Bukhu ino inatiphedza kuona kuti Bhibhlya ndi bukhu yakuti isalonga pya anthu adabvera Yahova na ale adakhonda kumbvera. Iyo inatiphedza kuona kuti tinapfundzanji na pitsandzo pya anthu anewa. (Aroma 15:4; 1 Akorinto 10:6) Bukhu ino yagawiwa m’makhundu 14. Mafala akutoma a khundu ibodzi na ibodzi ali na mphangwa zacigwagwa zinapangiza pinafuna ife kupfundza.

Khala ndimwe nyakubala, lerini nsolo ubodzi na ubodzi na mwananu, pontho onani kuti mafoto asabverana tani na pinapfundza imwe. Buluka penepo, uwiri wanu lerini malemba anagumanika kunkhomo kwa nsolo udaleri imwe. Phedzani mwananu toera kubvesesa kuti pidaleri imwe m’Bhibhlya pisabverana tani na pinapfundza imwe mu nsolo wa bukhu ino. Munakwanisambo kucita pibodzi pyene khala mukuphedza munthu wankulu toera kubvesesa mwadidi Bhibhlya.

Tisadikhira kuti bukhu ino inaphedza anthu onsene—anang’ono na akulu ene, toera kupfundza Mafala a Mulungu. Ale anaphatisira pinapfundza iwo m’Bhibhlya anakwanisa kulambira Yahova mbacita khundu ya mbumba yace yakuti iye asaifuna kakamwe.