KULISANI CIFUNO
NSOLO 7
Khalani Waphinga
Bhibhlya isalonga: “Iwo akhapitiriza kupfundzisa mwaphinga na kumwaza mphangwa zadidi.” —Mabasa 5:42.
Paulu Acitanji?
1. Onani VIDHYU, peno lerini Mabasa 19:8-10. Buluka penepo onani mibvundzo iyi:
M’mbuto mwakubwerera nduli mu ndzidzi ukhatcingwa iye na anthu anango, kodi Paulu acitanji toera apitirize kuphedza ale akhapangiza cifuno?
Kodi Paulu aenda kangasi kapfundzisa anthu akhapangiza cifuno, pontho acita pyenepi mu ndzidzi ungasi?
Tisapfundzanji na Pidacita Paulu?
2. Ife tisafunika kuwangisira toera kukhala na ndzidzi wakucita maulendo akubwereza na kucitisa mapfundziro a Bhibhlya.
Towezerani Paulu
3. Cedzerani munthu pa ndzidzi wakuthema kuna iye. Bvundzikani: ‘Ndi ntsiku ipi, pontho ndi mbuto ipi yadidi toera kucedza naye? Ndi ndzidzi upi wakuthema wakuti iye anakwanisa kucedza na ine?’ Khalani dzololo toera kukulisa cifuno cace maseze ndzidzi ukhonde kukhala wathema kuna imwe.
4. Bveranani ntsiku na ndzidzi. Maulendo onsene mungamala kucedza na munthu, bveranani ntsiku na ndzidzi unafuna imwe kucedza pontho. Wangisirani toera kufika pa mbuto idabverana imwe pa ndzidzi wakuthema.
5. Khalani na cidikhiro. Lekani kucimbiza kunyerezera kuti munthu wakuti kazinji kene nkhabe gumanika panyumba peno asakhala wakuphatika nee asafuna kubva mphangwa zanu. (1 Akor. 13:4, 7) M’mbuto mwace, wangisirani toera mucedze naye, mbwenye khalani na cinyindiro cakuti musaphatisira mwadidi ndzidzi wanu.—1 Akor. 9:26.