Thangwi Yanji Bhibhlya ndi Yakufunika kwa Ife?

Bhibhlya ndi bukhu yakudziwika kakamwe pa dziko yonsene yapantsi. Thangwi yanji? Cinthu cibodzi ndi cakuti Bhibhlya ndi yakukhonda nentsa kuidzindikira. Iri na pyakucitika pyandimomwene pya makhaliro a anthu, kubverana kwawo unango na ndzace, pontho kubverana kwawo na Mulungu. Pyakucitika pyenepi pisatipfundzisa pfundziro yadidi mu kuphatisira mafala akukhonda nentsa na akubveka mwadidi akuti anakwaniswa kuthumburuzwa mu pilongero madzana mbabveserwa na anthu anagumanika konsene kwene m’midzidzi yonsene. Midida ya Bhibhlya isaphata basa ndzidzi onsene.

Cinthu cakufunika kakamwe ndi cakuti Bhibhlya nee isalonga basi pya Mulungu, mbwenye ndi bukhu ya Mulungu. Isapangiza dzina ya Mulungu, uunthu wace, na cifuniro cace cakukhonda cinja pa kucita dziko na anthu. Bhibhlya isafokotozambo mbiri yakale ya Sathani yakuthimbana na Yahova, mbiri ineyi inadzakhala na mamalisiro akutsandzayisa. Kuleri Bhibhlya na manyerezero adidi kusacitisa kukhala na cikhulupiro, pontho na cidikhiro.

M’Bhibhlya tisagumana mphangwa zakuti nkhabe kugumanika ku mbuto zinango. Mwacitsandzo, Bhibhlya isatipanga undimomwene wa nkhani ninga izi:

• Tabuluka kupi na thangwi yanji tisathabuka

• Masasanyiro a Mulungu toera kuombola anthu

• Kodi Yezu acitanji kwa ife

• Pinafuna citika na dziko, pontho na anthu

Thangwi yanji nkhabe kuleri matsamba anatowerera na kudinga kuti ndi zipi mphangwa za Bhibhlya?