“Yahova Akulekererani Na Ntima Onsene”

“Munthu anakhonda kulekerera anango asafudza muratho wakuti iye asafunika kuwambuka nawo.” Mafala anewa a Nyakulonga Pyakucitika wa ku Britanya Ed ward Herbert wakuti akhala mu pyaka 400 ndulimu, agomezera thangwi ibodzi yakuti tisafunika kulekerera anango: Mu kupita kwa ndzidzi, ife tisafunambo kuti anango atilekerere. (Mateo 7:12) Natenepa, pana thangwi yakufunika kakamwe kwa ife toera kulekerera anango. Onani mafala a mpostolo Paulu anagumanika pa Akolose 3:13, Tradução do Novo Mundo.​—Lerini.

Nakuti ndife akusowa ungwiro, m’midzidzi inango tisacitisa anango kuipirwa, pontho iwo anacitambo pibodzi pyene kwa ife. (Aroma 3:23) Kodi tinakwanisa tani kukhala mu ntendere na andzathu akusowa ungwiro? Mu kupumirwa na Mulungu, Paulu asaticenjeza toera kulekerera. Uphungu unoyu ndi wakufunika kakamwe lero ninga mu ndzidzi udalembwa iwo mu pyaka pikwi piwiri nduli. Tendeni tidinge mwacidikhodikho mafala a Paulu.

“Pitirizani kupirirana unango na ndzace.” Mafala akuti “pitirizani kupirirana” asabverana na fala ya Cigrego yakuti isalonga kulekerera. Bukhu ibodzi yalonga kuti Akristu asapangiza n’khaliro unoyu mu “kulekerera na ntima onsene kwa ale anaadawira peno kulekerera makhaliro akuti asaipirwa nawo.” Mafala akuti “unango na ndzace” asatipanga kuti kulekerera kweneku kusafunika kucitwa mu uwiri wawo. Pyenepi pisabveka kuti, munakumbuka ife kuti tadawira anango, nee tisafunika kutawirisa pinthu pyenepi toera kudzudzumisa ntendere pakati pa ife na iwo. Mbwenye ndiye tani khala anango atidawira?

“Pitirizani . . . mbamulekererana na ntima onsene.” Mwakubverana na nyakudziwisa m’bodzi, fala ya Cigrego yakuti ‘kulekerera na ntima onsene’ “nee ndi fala yakuti isadziwika ninga kulekerera basi . . . mbwenye ndi fala yakudzala na mabvekero anagomezera kulekerera kwacibaliro.” Bukhu inango yalonga kuti fala ineyi isabveka “kupereka takhuta ku cinthu cakutsandzayisa, na cakuphindulisa.” Tisapangiza kupereka kwathu takhuta mu kulekerera na ntima onsene tingakhala na ‘mathangwi toera kusumira anango.’ Thangwi yanji tisafunika kukhala dzololo toera kupangiza kulekerera kweneku? Thangwi ibodzi ndi yakuti mu kupita kwa ndzidzi tinadzafuna kuti munthu adatidawira acitembo pibodzi pyene kwa ife.

“Yahova akulekererani na ntima onsene, imwe citanimbo pyenepi.” Thangwi ikulu kakamwe ya kulekerera anango na ntima onsene ndi yakuti Yahova asatilekerera na ntima onsene. (Mikeya 7:18) Nyerezerani pang’ono kulekerera kukulu kakamwe kunapangiza Yahova kwa anyakudawa akutcinyuka. Mwakusiyana na ife, Yahova nkhabe kudawa. Natenepa, iye asafuna kakamwe, pontho asalekerera na ntima onsene anyakudawa akutcinyuka ngakhale iye asadziwa kuti anyakudawa anewa nee anabwezera kulekererwa kusapangiza iye. Mwandimomwene, Yahova ndi citsandzo cadidi cakulekerera anyakudawa akutcinyuka!

Ntsisi za Yahova zisaticitisa toera kunfendedzera, pontho zisatikulumiza toera kunsangizira. (Aefesi 4:32–5:1) Mphyadidi bvundzika tekhene, ‘Nakuti Yahova asandilekerera, kodi ndinakwanisa tani kulekerera ndzanga wakusowa ungwiro wakuti atcinyuka ku madawo adandicitira iye?’​—Luka 17:3, 4.