NSOLO WA REVISTA | UTHAMBI UNACITISA ANTHU KUKHONDA KUFUNA MULUNGU
Uthambi Wakuti Mulungu Nkhabe Kudziwika Mwadidi
PINAKHULUPIRA ANTHU AZINJI Uphemberi Wacikristu “m’makhundu ace matatu makulu, Roma Katolika, Ortodoxia Oriental, na Protestantismo asadziwa Mulungu m’bodzi ninga Anthu atatu: Mulungu Baba, Mulungu Mwana, na Mulungu Nzimu Wakucena. Mwakubverana na mapfundzisiro aumulungu Acikristu, cidziwiso ceneci nee ndi cakudziwika ninga alungu atatu mbwenye anthu anewa atatu ndi munthu m’bodzi.”—Nova Enciclopédia Britânica.
UNDIMOMWENE WA BHIBHLYA Yezu, Mwana wa Mulungu, cipo alonga kuti ndi sawasawa na Babace. Mbuto mwace, iye alonga: “Ine ndinenda kuna Baba, thangwi Baba ndi nkulu kupita ine.” (Jwau 14:28) Iye apangambo m’bodzi wa anyakupfundzace: “Ine ndinakwira kuna Babanga na kuna Baba wanumbo, kuna Mulungu wanga na Mulungu wanumbo.”—Jwau 20:17.
Nzimu wakucena nee ndi munthu tayu. Akristu akutoma ‘adzadzwa na Nzimu Wakucena,’ pontho Yahova alonga: “Ndinadzatsanulira nzimu wakuchena pa anthu onsene.” (Machitiro 2:1-4, 17) Nzimu wakucena nee usacita khundu ya utatu. Iwo ndi mphambvu yakuphata basa ya Mulungu.
THANGWI YANJI KUDZIWA PYENEPI NDI KWAKUFUNIKA Anyakudziwisa Bhibhlya Acikatolika Karl Rahner na Herbert Vorgrimler afokotoza utatu kuti “nee mbudadziwika mwakusowa mafokotozero, ngakhale pakumala kufokotozwa nee unakhala wakudziwika mwadidi kakamwe.” Kodi munakwanisa kufuna munthu wakuti nee munakwanisa kun’dziwa peno kun’bvesesa? Cipfundziso ca Utatu cisacimwanisa anthu kudziwa na kufuna Mulungu.
Marco, adalongwa mu nsolo udamala, aona Utatu ninga mpingizo. Iye alonga: “Ndikhanyerezera kuti Mulungu akhabisa uunthu wace kwa ine, pontho pyenepi pikhacitisa Mulungu kukhala kutali kakamwe, na mwakukhonda kudziwika mwadidi.” Natenepa, “Mulungu si Mulungu wa nthonga.” (1 Akorinto 14:33) Iye nee abisa uunthu wace kwa ife. Iye asafuna kuti ife tindziwe. Yezu alonga: “Ife tisalambira pinadziwa ife.”—Jwau 4:22.
Marco alonga: “Mudapfundza ine kuti Mulungu nee asacita khundu ya Utatu, ndakwanisa kucita uxamwali na iye.” Khala tisaona Yahova ninga Munthu wakudziwika mwadidi, pinakhala pyakukhonda nentsa kunfuna. Bhibhlya isalonga: “Munthu anakhonda kufuna andzache uyu hanadziwa Mulungu tayu; thangwi Mulungu ndi kufuna.”—1 Jwau 4:8.