NSOLO WA REVISTA | UTHAMBI UNACITISA ANTHU KUKHONDA KUFUNA MULUNGU

Uthambi Wakuti Mulungu ndi Wakuipa

PINAKHULUPIRA ANTHU AZINJI “Mwakukhonda dembuka, pakumala kufa moyo wa ale adacita madawo usaenda ku infernu, kwakuti usathabuka na kutcinyuswa na ‘moto wa kwenda na kwenda.’” (Catecismo da Igreja Católica) Atsogoleri anango a mauphemberi alonga kuti infernu ndi n’khaliro wakuti usalekanisa kakamwe munthu na Mulungu.

UNDIMOMWENE WA BHIBHLYA “Moyo unadawa, ndiwo unadzafa.” (Ezekyele 18:4, Tradução do Novo Mundo) Akufa “nkhabe dziwa cinthu cibodzi cene.” (Koelete 9:5) Khala moyo usafa, pontho nkhabe dziwa pinthu, mbudathabuka tani na “moto wa kwenda na kwenda” peno kubva kupha thangwi ya kulekaniswa na Mulungu?

M’Bhibhlya, kazinji kene mafala Acihebere na Acigrego anathumburuzwa “infernu” asabveka nthumbi ya anthu onsene. Mwacitsandzo, mu ndzidzi ukathabuka Yobe na utenda wakugoswa kakamwe, iye aphembera: “Ndisadikhira kuti munandibisa mu nthumbi [“mu infernu,” Versão Douay-Rheims].” (Yobe 14:13, Holy Bible—Easy-to-Read Version) Yobe akhafuna kupuma, tayu m’mbuto yakuthabuswa peno yakuthaukirana na Mulungu, mbwenye mu nthumbi.

THANGWI YANJI KUDZIWA PYENEPI NDI KWAKUFUNIKA Uipi nee usaticitisa kufuna Mulungu; mbwenye usatithaukirisa. Rocío wakuti asakhala ku Mexiko alonga, “Kutomera pa uwana wanga, ndikhapfundziswa pipfundziso pya infernu ya moto. Ndikhagopa kakamwe mbandinyerezera kuti Mulungu nkhabe makhaliro adidi. Ndikhanyerezera kuti iye akhali waukali na wakukhonda kulekerera.”

Pinalonga Bhibhlya thangwi ya matongero a Mulungu na makhaliro a anyakufa pyacinja maonero a Rocío thangwi ya Mulungu. Iye alonga: “Ndakhala wakusudzuka kwakuti ndikhali ninga ndatula ntolo wakulemera kakamwe ukhali m’manyerezero mwanga. Ndatoma kunyindira kuti Mulungu asafuna pinthu pyadidi kwa ife, pontho iye asatifuna, natenepa ndinakwanisambo kunfuna. Iye asakhala ninga baba wakuti asaphata mikono ya anace mbafuna pinthu pyadidi kwa iwo.”​—Izaiya 41:13.

Anthu azinji asathimbana na kugopa infernu ya moto, mbwenye Mulungu nee asafuna kuti imwe muntumikire thangwi musan’gopa. M’mbuto mwace, Yezu alonga: ‘Ufune Yahova, Mulungu wako.’ (Marko 12:29, 30) Kusiyapo pyenepi, tingadziwa lero kuti Mulungu nkhabe cita pinthu mwakukhonda kulungama, ife tinakwanisambo kunyindira matongero ace antsogolo. Ninga xamwali wa Yobe, Eliyu, tinakwanisa kulonga na cinyindiro: “Mulungu nkhabe kuchita pyakuipa tayu nee pyakusowa ulinganiri tayu.”​—Yobe 34:10.