Bverani Akumbizi A yahova
‘Mubvere atsogoleri anu, mbamuatawira, thangwi iwo asaonera moyo wanu.’—AHEB. 13:17.
MUNATAWIRA TANI?
Kodi akulu a mpingo asakumbiza tani mabira a Mulungu?
Thangwi yanji mabira asafunika kubvesera akumbizi ang’ono?
Thangwi yanji kusowa ungwiro kwa akumbizi ang’ono nee ndi thangwi toera kupwaza uphungu wawo wakubulukira m’Bhibhlya?
1, 2. Thangwi yanji Yahova asalandanisika ekhene ninga nkumbizi?
YAHOVA asalandanisika ekhe ninga nkumbizi. (Ezek. 34:11-14) Pyenepi ndi pyakufunika thangwi pisatiphedza toera kubvesesa kuti Yahova ali tani. Nkumbizi waufuni asaphata basa kakamwe toera kutsalakana umaso na udidi wa mabira ace. Iye asaatsogolera ku mbuto yakuti iri na thongwe iwisi na madzi adidi (Sal. 23:1, 2); asaayang’anira masikati na masiku (Luka 2:8); asaatsidzikiza ku pinyama pyakugopswa (1 Sam. 17:34, 35); asakwata yakumala kwene kubaliwa (Iza. 40:11); asasaka ale adatayika na asatsalakana ale akuphekeka.—Ezek. 34:16.
2 Nakuti mbumba ya Yahova ya ndzidzi wakale ikakhala m’mbuto zakuti azinji akhali akumbizi na anyakulima, iwo akhadziwa mwadidi kulandaniswa kwa Yahova Mulungu ninga nkumbizi waufuni. Iwo akhadziwa kuti bira isafunika kutsalakanwa toera kukula mwadidi. Mu njira ibodzi ene toera anthu akule mwauzimu asafunika citsalakano cibodzi cene. (Mko. 6:34) Mwakusowa citsalakano cauzimu cadidi na citsogolero, anthu asathabuka. Iwo asakhala akusowa citsidzikizo na asaluza makhaliro adidi ninga ‘mabira akusowa nkumbizi” asabalalika. (1 Am. 22:17) Natenepa, mwaufuni Yahova asapereka pinthu pyakufunika kuna mbumba yace.
3. Kodi tinadzadinganji mu nsolo uno?
3 Mafokotozero a Yahova ninga nkumbizi ali na mabvekero adidi kakamwe ngakhale mu ntsiku zino. Yahova asapitiriza kupasa pinthu pyakufunika kuna mbumba yace ninga mabira. Tendeni tione kuti iye atsogolera tani mabira ace na asakwanirisa tani pyakufuna pyawo lero. Tinadzadingambo kuti mabira asafunika kutawira tani citsalakano caufuni ca Yahova.
NKUMBIZI WADIDI ASAKHAZIKISA AKUMBIZI ANANGO ANG’ONO
4. Ndi basa ipi inacita Yezu mu kutsalakana mabira a Yahova?
4 Yahova asankhula Yezu ninga Nsolo wa mpingo Wacikristu. (Aef. 1:22, 23) Ninga “nkumbizi wadidi,” Yezu asapangiza citsalakano ninga ca Babace, cifuniro, na makhaliro adidi. Ngakhale ‘apereka moyo wace kuli mabira.’ (Jwau 10:11, 15) Ineyi ndi nkhombo ikulu kakamwe ntsembe ya ciomboli ya Kristu kuna anthu! (Mat. 20:28) Ceneci ndi cifuniro ca Yahova kuti ‘munthu anakhulupira Yezu, aleke kutayika, mbwenye aone moyo wakukhaliratu!’—Jwau 3:16.
5, 6. (a) Mbani adasankhula Yezu toera kutsalakana mabira ace, na masasanyiro anewa aphindulisa tani mabira ace? (b) Kodi ndi thangwi ipi yakufunika kakamwe kwa ife toera kubvera akulu a mpingo?
5 Kodi mabira asatawira tani citsalakano ca Nkumbizi Wadidi, Yezu Kristu? Yezu alonga, ‘Mabira anga asabva fala yanga, ine ndisaadziwa, iwo asanditowera.’ (Jwau 10:27) Kubvesera fala ya Nkumbizi Wadidi kusabveka kutowerera citsogolero cace mu pinthu pyonsene. Pyenepi pisaphataniza kubverana na akumbizi anango ang’ono auzimu adasankhula iye. Yezu apangiza kuti apostolo ace na anyakupfundzace akhafunika kupitiriza na basa idatoma iye. Iwo akhafunika ‘kupfundzisa’ na ‘kudyesa mabira a Yezu.’ (Mat. 28:19; lerini Jwau 21:15-17.) Mu ndzidzi wakuti mphangwa zadidi ziri kumwazwa, na anyakupfundza akuthimizirika, Yezu asankhula Akristu akukola mwauzimu toera kutsogolera mipingo.—Aef. 4:11, 12.
6 Mudalonga iye na ayang’aniri a mpingo wa pyaka dzana yakutoma ku Efeso, mpostolo Paulu alonga kuti nzimu wakucena waasankhula ninga ayang’aniri “toera kukumbiza mpingo wa Mulungu.” (Mach. 20:28, Tradução do Novo Mundo) Pyenepi ndi sawasawa kwa anyang’aniri Acikristu a lero, nakuti iwo asankhulwambo kubulukira mu pitsogolero pya Malemba akupumirwa na nzimu wakucena. Natenepa, tingabvera ayang’aniri Acikristu tisapangiza cilemedzo cathu kwa Yahova na Yezu, akuti ndi Akumbizi akulu kakamwe. (Luka 10:16) Mwandimomwene, ineyi ndi thangwi ikulu kakamwe toera kungonjera akulu a mpingo. Mbwenye, pana mathangwi anango anacitisa kuti kubvera kweneku kukhala kwa ndzeru.
7. Kodi akulu a mpingo asakuphedzani tani toera kukhala na uxamwali na Yahova?
7 Pakupereka citsogolero kwa anyakukhulupira andzawo, akulu a mpingo asapereka ciwangiso na uphungu wakubulukira m’Bhibhlya peno kubulukira m’midida ya m’Bhibhlya. Cifuno cawo pakupereka pitsogolero pyenepi nee ndi toera kupanga abale awo kuti asafunika kukhala na makhaliro ninga awo. (2 Akor. 1:24) Mbuto mwace, ndi toera kupasa Akristu andzawo pitsogolero pya m’Bhibhlya toera kuaphedza kucita pisankhulo pyadidi, kubverana na kukhazikisa ntendere m’mpingo. (1 Akor. 14:33, 40, Chibverano Chanchino) Akulu a mpingo ‘asaonera moyo’ wa anthu na cifuno cakuphedza munthu m’bodzi na m’bodzi m’mpingo toera kukhala na uxamwali wadidi na Yahova. Natenepa, iwo asafunika kucita mwakucimbiza toera kupereka ciphedzo angaona kuti m’bale peno mulongo asafuna kucita peno acita kale ‘cinthu cakuipa.’ (Agal. 6:1, 2; Yuda 22) Kodi anewa si mathangwi adidi tayu toera ‘kubvera ale anatitsogolera?’—Lerini Ahebere 13:17.
8. Kodi akulu a mpingo asatsidzikiza tani mbumba ya Mulungu?
8 Mpostolo Paulu, akumbizika ekhene mwauzimu, iye alemba kuna abale ace a ku Kolose: ‘Cenjerani gopa munadzanyengererwa na anthu a ndzeru zapezi na zakunama, zinabuluka pa mwambo wa anthu na pa mitemo yapantsi pano, mbwenye zakukhonda kubuluka pa ndzeru za Kristu.’ (Akol. 2:8) Cenjezo ineyi isapangiza thangwi inango toera kubvera uphungu wa m’Bhibhlya unapereka akulu a mpingo. Iwo asatsidzikiza mbumba mu kuyang’anira abale awo thangwi ya ale onsene anafuna kufewesa cikhulupiro cawo. Mpostolo Pedhro acenjeza thangwi ya ‘aprofeta apezi’ na ‘apfundzisi apezi’ akuti mbadayesera ‘kunyengerera anthu’ toera kucita pinthu pyakuipa. (2 Ped. 2:1, 14) Mu ntsiku zino akulu a mpingo asafunikambo kupereka macenjezo mabodzi ene khala mphyakufunika. Ninga amuna Acikristu akukola mwauzimu, iwo ali na maluso mazinji mu umaso wawo. Kusiyapo pyenepi, mbadzati kusankhulwa, iwo asapangiza kuti asabvesesa mwadidi Malemba na akuthema toera kupfundzisa pinthu pyadidi. (1 Tim. 3:2; Tito 1:9) Kukola kwawo mwauzimu, ulinganiri, na udziwisi wawo wa m’Bhibhlya usaacitisa kupereka pitsogolero pyandzeru kuna mbumba.
NKUMBIZI WADIDI ASADYESA NA ASATSIDZIKIZA MABIRA
9. Kodi Yezu asatsogolera tani na asadyesa tani mpingo Wacikristu lero?
9 Kubulukira ku gulu yace, Yahova asapereka cakudya cakunjipa cauzimu kwa abale onsene pa dziko yonsene yapantsi. Uphungu unoyu wa Malemba usaperekwa kubulukira m’mabukhu athu. Kusiyapo pyenepi, m’midzidzi inango gulu isapereka pitsogolero kwa akulu a mpingo, kubulukira m’matsamba peno pitsogolero pinaperekwa na ayang’aniri a cisa na a gawo. Mu njira ineyi mabira asatambira pitsogolero pyakubveka mwadidi.
10. Ndi basa ipi iri na akumbizi auzimu thangwi ya ale adapeuswa mu nkumbi?
10 Mu njira yauzimu, ayang’aniri ali na basa yakutsidzikiza, na kutsalakana ungumi wa piwalo pya mpingo, makamaka ale akuti aphekeka okhene peno akufewa mwauzimu. (Lerini Tyago 5:14, 15.) Anango mwa iwo apeuswa kubulukira mu nkumbi mbasiya kucita mabasa Acikristu. Khala ndi tenepo, kodi nkulu wa mpingo wacitsalakano nee mbadawangisira toera kugumana bira ibodzi na ibodzi yakutayika na kuiphedza toera kubwerera m’mpingo? Mwandimomwene asafunika kupicita! Yezu afokotoza, “Baba wanu wa kudzulu hanafuna tayu kuti mbodzi wa ana awa atayike.”—Mat. 18:12-14.
TISAFUNIKA KUONA TANI MADODO A AKUMBIZI ANG’ONO?
11. Thangwi yanji anango asaona kukhala kwakunentsa kubvera citsogolero ca akulu a mpingo?
11 Yahova na Yezu ndi Akumbizi aungwiro. Mbwenye, akumbizi anango ang’ono adanyindirwa toera kutsalakana mipingo nee ndi aungwiro. Pyenepi pinacitisa kukhala kwakunentsa kwa anango kubvera citsogolero ca akulu a mpingo. Panango anthu anewa anakwanisa kunyerezera kuti: ‘Akulu a mpingo ndi anthu akusowa ungwiro ninga ife. Thangwi yanji tisafunika kubvera uphungu wawo?’ Mwandimomwene, akulu a mpingo ndi akusowa ungwiro. Natenepa, tisafunika kukhala na maonero adidi thangwi ya madodo awo na kufewa kwawo.
12, 13. (a) Kodi tinalonganji thangwi ya madodo a anthu anaphatisira Yahova toera kutsogolera mbumba yace? (b) Thangwi yanji madodo a amuna adaphatisirwa na Yahova alembwa m’Bhibhlya?
12 Bhibhlya isalonga pakweca madodo a ale adaphatisirwa na Yahova toera kutsogolera mbumba yace mu ndzidzi wakale. Mwacitsandzo, Dhavidhi akhadasankhulwa ninga mambo na ntsogoleri wa Israele. Mbwenye, iye agwera m’mayesero mbakhala na nseru wa upombo na wa kupha. (2 Sam. 12:7-9) Dinganimbo pya mpostolo Pedhro. Ngakhale kuti anyindirwa basa ikulu m’mpingo Wacikristu wa pyaka dzana yakutoma, iye acita madodo makulu kakamwe. (Mat. 16:18, 19; Jwau 13:38; 18:27; Agal. 2:11-14) Kusiyapo Yezu, nee munthu m’bodzi adakhala waungwiro kutomera mu ndzidzi wa Adhamu na Eva.
13 Thangwi yanji Yahova acitisa kuti anyakulemba Bhibhlya alembe madodo a anthu akhaphatisira iye? Thangwi ibodzi ndi yakuti Mulungu acita pyenepi toera kupangiza kuti iye anakwanisa kuphatisira anthu akusowa ungwiro toera kutsogolera mbumba yace. Mwandimomwene, ndzidzi onsene iye asacita pyenepi. Natenepa, nee tisafunika kuphatisira kusowa ungwiro kwa ale anatitsogolera lero ninga mathangwi toera kualonga mwakuipa peno kupwaza utsogoleri wawo. Yahova asadikhira kuti ife tilemedze na kubvera abale anewa.—Lerini Eksodo 16:2, 8.
14, 15. Kodi tinapfundzanji kubulukira mu njira idaphatisira Yahova toera kulonga na mbumba yace mu ndzidzi wakale?
14 Kubvera ale anatitsogolera lero ndi kwakufunika kakamwe. Nyerezerani kuti Yahova alonga tani na mbumba yace m’midzidzi yakunentsa yakale. Mudabuluka mbumba ya Israele mu Ejito, Mulungu aatsogolera mu kuphatisira Mose na Aroni. Toera kupulumuka pa muliri wacikhumi Aisraele akhafunika kubvera pitsogolero toera kucita phwando yakupambulika na kukhwaza ciropa ca mwanabira nkhundu-nkhundu mwa misuwo ya nyumba zawo. Iwo nee atambira citsogolero ceneci kubulukira mu fala yakubuluka kudzulu. Mbuto mwace, akhafunika kubvesera akulu Aisraele akuti akhatambira pitsogolero pyakupambulika kubulukira kwa Mose. (Eks. 12:1-7, 21-23, 29) M’midzidzi ineyi, Mose na akulu Aisraele akhali anyamphangwa akupereka pitsogolero pya Yahova kwa mbumba yace. Akulu a mpingo Wacikristu asacitambo pibodzi pyene lero.
15 Panango munakwanisa kunyerezera pyakucitika pizinji pya mbiri ya Bhibhlya pyakuti Yahova akhapereka pitsogolero pya cipulumuso kubulukira mwa anthu peno aanju. Mu pyakucitika pyenepi pyonsene, Mulungu aona kukhala kwakuthema kusankhula anthu toera kutsogolera. Anyamphangwa alonga mu dzina yace, pontho iwo apanga mbumba yace pikhafunika iwo kucita toera kupulumuka mu nyatwa. Kodi ife nkhabe kwanisa kunyerezera kuti Yahova panango anacita pibodzi pyene pa Harmagedoni? Mwandimomwene, lero akulu a mpingo onsene anapaswa basa ya kuimirira Yahova mu gulu yace asafunika kucita mphole-mphole toera akhonde kuphatisira mwakuipa utongi udanyindirwa iwo.
‘NKUMBI UBODZI NA NKUMBIZI M’BODZI’
16. Kodi ndi mafala api anafukika ife kubvesera?
16 Mbumba ya Yahova isacita khundu ya “nkumbi ubodzi” pantsi pa ‘nkumbizi m’bodzi,’ Yezu Kristu. (Jwau 10:16) Yezu apangiza kuti mbadakhala na anyakupfundzace “ntsiku zonsene mpaka kumala kwa pantsi.” (Mat. 28:19) Ninga Mambo wakudzulu, iye asayang’anira pinthu pyonsene pinacitika pyakuti pinatsogolera toera kufudzwa kwa dziko ya Sathani. Toera kukhala akuphatana na akutsidzikizika mu nkumbi wa Mulungu, tisafunika kubvesera mafala anabveka nduli mwathu kuti ndi njira ipi inafunika ife kufamba. Mafala anewa asaphataniza pinalonga nzimu wa Mulungu kubulukira m’Bhibhlya na pinalonga Yahova na Yezu kubulukira kwa ale adaikhwa ninga akumbizi ang’ono.—Lerini Izaiya 30:21; Apokalipse 3:22.
17, 18. (a) Ndi ngozwi ipi inagopesa nkumbi, mbwenye tinakwanisa kunyindiranji? (b) Tinadzadinganji mu nsolo unatowerera?
17 Sathani ‘asandzendza-ndzendza ninga nkhalamu yakulira, mbisaka munthu toera kumudya.’ (1 Ped. 5:8) Ninga cinyama ca ntsanga cakugopswa, iye asanyanyamira nkumbi, mbadikhira mwai toera kupomokera ale anakhonda kukhala maso peno ale adatayika mu nkumbi. Ineyi ndi thangwi yadidi kakamwe yakuti tisafunika kukhala cifupi na nkumbi, pontho cifupi na ‘nkumbizi na muwoneri wa moyo wathu.’ (1 Ped. 2:25) Kulonga pya ale anafuna kupulumuka pa nyatwa ikulu, Apokalipse 7:17 isalonga: ‘Mwanabira Yezu anadzaakumbiza mbaaperekera ku micera ya madzi a moyo. Mulungu anadzapukuta m’maso mwawo misozi yonsene.’ Kodi pikiro ineyi yadidi kakamwe inadzakwaniriswa?
18 Tadinga mabasa akufunika kakamwe a akulu a mpingo Acikristu ninga akumbizi ang’ono auzimu. Mphyadidi kubvundzika, Kodi amuna anewa adasankhulwa anakwanisa tani kukhala na cinyindiro cakuti asatsalakana mabira a Yezu mu njira yakuthema? Ntawiro unadzadingwa mu nsolo unatowerera.
[Foto pa tsamba 22]
[Foto pa tsamba 24]
Ninga nkumbizi asatsidzikiza mabira ace, akulu a mpingo asatsidzikiza mabira adanyindirwa iwo (Onani ndima 8)
[Foto pa tsamba 26]
Akulu a mpingo asasaka kutsidzikiza mabanja akuti ali na nyakubala m’bodzi ku makhaliro akuphekesa (Onani ndima 17, 18)