NSOLO WA REVISTA | KODI UMAMBO WA MULUNGU​—USABVEKANJI KWA IMWE?

Thangwi Yanji Umambo Wa Mulungu Ndi Wakufunika?

Pikwi na pikwi pya anthu pa dziko yonsene asakhulupira Umambo wa Mulungu. Iwo asatowezera pidalonga Yezu kuna atowereri ace toera kuphembera: ‘Umambo wanu mbudze. Pinafuna imwe mbapicitwe pantsi pano ninga kudzulu.’​—Mateo 6:10

Mbwenye mu ndzidzi wakuti anthu azinji asapangiza cifuno kakamwe ku Umambo wa Mulungu, pisaoneka kuti magereja mazinji nkhabe kuupasa ntengo kakamwe. Munjira ineyi, nyakulemba pyakucitika anacemerwa H. G. Wells alonga kuti mphyakuwangisa kakamwe kuti Yezu “agomezera kakamwe . . . cipfundziso cikhathula iye Umambo Wakudzulu,” mbwenye mwakusiyana, cipfundziso ceneci nee ciri na “ntengo kakamwe . . . mu pipfundziso pya magereja mazinji Acikristu.”

Mwakusiyana na magereja anewa, Mboni za Yahova asagomezera kakamwe Umambo wa Mulungu. Mwacitsandzo: Revista inaleri imwe isabuluswa mu pilongero pyakukwana 220. Makopya cifupi na mamiliyau 46 a revista ibodzi na ibodzi asadhindwa, natenepa, revista ineyi ndiyo basi inagawirwa kakamwe pa dziko yonsene. Kodi cifuniro cikulu ca revista ineyi ndi cipi? Onani nsolo onsene wa revista: Ncenjezi Wakudziwisa Umambo Wa Yahova.a

Thangwi yanji Mboni za Yahova asawangisira kakamwe toera kudziwisa Umambo wa Mulungu? Thangwi ikulu ndi yakuti ife tisakhulupira kuti Umambo wa Mulungu ndi nsolo ukulu wa bukhu yakufunika kakamwe pa dziko yapantsi​—Bhibhlya. Kusiyapo pyenepi, ife tisanyindira kuti Umambo wa Mulungu ndiwo basi unafuna kudzamalisa nyatwa zinathimbana na anthu lero.

M’basa yakudziwisa anthu Umambo wa Mulungu, Mboni za Yahova asawangisira kakamwe toera kutowezera citsandzo ca Yezu. Pikhakhala iye pa dziko yapantsi, Umambo wa Mulungu ukhali wakufunika kakamwe mu umaso wa Yezu, pontho ukhali nsolo wa utumiki wace. (Luka 4:43) Thangwi yanji Umambo ukhali wakufunika kakamwe kwa Yezu? Kodi Umambo unoyu usabvekanji kwa imwe? Tisakuphembani toera kudinga matawiro a Bhibhlya anapangizwa m’misolo inatowerera.

[Cidzindikiro capantsi]