Kodi Tisafunika Kuphembera Kuna Yezu?

M’MIDZIDZI ya cincino, nyakufufudza acedza na aphale na atsikana akupiringana 800 a mauphemberi akupiringana khumi na mawiri mu kuacita mibvundzo khala asakhulupira kuti Yezu asatawira maphembero. Mapurusento akupiringana 60 a aphale na atsikana alonga kuti Yezu asatawira. Mbwenye ntsikana m’bodzi akhonda mbalonga kuti asatawira ndi Mulungu.

Ndiye tani kwa imwe? Tisafunika kuphembera kuna Yezu peno Mulungu?a Toera kugumana ntawiro, pakutoma tendeni tidinge kuti Yezu apfundzisa tani anyakupfundzace kuphembera.

YEZU ATIPFUNDZISA KUPHEMBERA KUNA ANI?

Yezu atipfundzisa na kutipangiza kuti mbani asafunika ife kuphembera.

CIPFUNDZISO CACE: Mudaphemba nyakupfundzace m’bodzi kuti: ‘Mbuya, tipfundzisenimbo kuphembera,’ Yezu atawira: ‘Imwe mungaphembera, longani tenepa: ‘Baba.’’ (Luka 11:1, 2) Kusiyapo pyenepi, mu Nkhani yace yakudziwika kakamwe ya Paphiri, Yezu adembetera anyakubveserace toera kuphembera. Iye alonga: ‘Phemberani kuna Babanu.’ Mbaapasa cinyindiro kuti, ‘Babanu asadziwa kale pinasowa imwe mbamudzati kumphemba.’ (Mateo 6:6, 8) Namasiku mbadzati kufa, Yezu apanga anyakupfundzace: ‘Pyonsene pinadzaphemba imwe Baba mu dzina yanga, iye anadzakupasani.’ (Jwau 16:23) Natenepa, Yezu atipfundzisa kuphembera kwa Babace wakuti ndi Babathumbo, Yahova Mulungu.​—Jwau 20:17.

CITSANDZO CACE: Mwakubverana na njira ikhapfundzisa iye anango kuphembera, Yezu aphembera payekha: ‘Baba, Mbuya wakudzulu na pantsi, ndinakusimbani.’ (Luka 10:21) Mu ndzidzi unango, ‘Yezu athukula maso ace kudzulu mbati: ‘Baba, ndinapereka takhuta kuna imwe, thangwi mwandibvera.’’(Jwau 11:41) Mu ndzidzi ukhafa iye, aphembera: “Baba, m’manja mwanu ndinapereka nzimu wanga.”(Luka 23:46) Mu kuphembera kuna Babace wakudzulu​—‘Mbuya wakudzulu na pantsi’​—Yezu akhazikisa citsandzo cadidi toera anthu onsene acitowezere. (Mateo 11:25; 26:41, 42; 1 Jwau 2:6) Kodi anyakupfundza akutoma akhatowezera pipfundziso pya Yezu?

AKRISTU AKUTOMA AKHAPHEMBERA KUNA ANI?

M’masumana mangasi Yezu mbadabwerera kale kudzulu, anyakupfundzace akhathabuswa na kuthuswa na anyamalwa awo. (Machitiro 4:18) Mwandimomwene, iwo aphembera​—mphapo aphembera kuna ani? ‘Onsene akhuwa kuna Mulungu,’ mbaphembera ‘mu dzina ya Yezu, ntumiki wace wakucena’ toera Mulungu apitirize kuaphedza. (Machitiro 4:24, 30) Natenepa, anyakupfundza akhatowezera pitsogolero pya Yezu pakucita phembero. Iwo akhaphembera kuna Mulungu, tayu kuna Yezu.

Mukupita kwa pyaka, mpostolo Paulu alonga njira zikhaphatisira iye na andzace toera kuphembera. Mu kulembera Akristu andzace, iye alonga: ‘Ife tinapereka takhuta kuna Mulungu, Babace Mbuyathu Yezu Kristu ntsiku zonsene tingakuphembererani.’ (Akolose 1:3) Paulu alembambo kwa anyakukhulupira andzace kuti ‘ndzidzi onsene apereke takhuta kwa Mulungu, Baba wa pyonsene mu dzina ya Mbuyathu Yezu Kristu.’ (Aefesi 5:20) Kubulukira m’mafala anewa, tinakwanisa kuona kuti Paulu akhawangisa anango toera kuphembera kwa “Mulungu” wace, ‘Baba wa pyonsene’​—mbwenye, mu dzina ya Yezu.​—Akolose  3:17.

Ninga Akristu akutoma, tinakwanisa kupangiza ufuni wathu kuna Yezu mu kubvera uphungu wace wa phembero. (Jwau 14:15) Munaphembera ife kuna Babathu wakudzulu​—kwa iye basi​—mafala a pa Masalmo 116:1, 2 anadzatiphindulisa kakamwe: ‘Ndisafuna Yahova, thangwi asandibvera . . . mbandibvesera ndzidzi onsene.’b

[Pidzindikiro pyapantsi]

[Bokosi pa tsamba 15]

Kodi Iwo Aphembera Kuna Yezu?

Bhibhlya isalonga maulendo akucepa akuti anthu akukhulupirika akhalonga na Yezu mudabwerera iye kudzulu​—na midzidzi inango iwo akhalongambo na aanju. (Machitiro 9:4, 5, 10-16; 10:3, 4; Apokalipse 10:8, 9; 22:20) Kodi anthu anewa akhapembera kuna Yezu na aanju? Nkhabe. Maulendo anewa onsene, pyakucitwa pyenepi pyakudzulu ndipyo pikhatoma kulonga na anthu akukhulupirika. Amuna na akazi akukhulupirika akhaphembera basi ene kuna Mulungu.​—Afilipi 4:6.