KUTAWIRWA KWA MIBVUNDZO YA BHIBHLYA

Thangwi Yanji Tisafunika Kukumbuka Kufa Kwa Yezu?

Kufa kwa Yezu kukhali kwakufunika kakamwe mu mbiri​—iye afa toera kubwezera umaso wa anthu ninga mukhafunikira iwo. Anthu nee acitwa toera kucita pinthu pyakuipa, kuduwala peno kufa. (Genesi 1:31) Mbwenye kufa kwapita n’dziko yapantsi thangwi ya mamuna wakutoma, Adhamu. Yezu apereka umaso wace toera kutipulumusa ku madawo na kufa.​—Lerini Mateo 20:28; Aroma 6:23.

Mulungu apangiza ufuni wakupambulika mu kutuma Mwanace pa dziko yapantsi toera kutifera. (1 Jwau 4:9, 10) Yezu apanga atowereri ace toera kukumbuka kufa kwace, basi ene mukuphatisira nkate na vinyu. Kucita pyenepi pyaka pyonsene ndi cipangizo cakupereka kwathu takhuta ku ufuni udapangiza Mulungu na Yezu.​—Lerini Luka 22:19, 20.

Mbani Asafunika Kudya Nkate Na Kumwa Vinyu?

Mudapanga Yezu pakutoma atowereri ace kuti akumbuke kufa kwace, peno cibverano. (Mateo 26:26-28) Pyenepi pyapasa cinyindiro iwo na numero inango yakucepa ca kudzakhala amambo na anyantsembe pabodzi na iye kudzulu. Ngakhale kuti pikwi na pikwi pya anthu asakumbuka kufa kwa Yezu, ale basi ali n’cibverano ndiwo anadya nkate na kumwa vinyu.​—Lerini Apokalipse 5:10.

Cifupi na pyaka 2.000, Yahova asasankhula anthu anewa anafuna kudzakhala amambo. (Luka 12:32) Iwo ndi numero yakucepa mukulandanisa na ale anafuna kudzakhala pa dziko yapantsi kwenda na kwenda.​—Lerini Apokalipse 7:4, 9, 17.

Toera kudziwa pizinji onani nsolo 5 wa bukhu iyi yakubuluswa na Mboni za Yahova

Isagumanikambo mu www.jw.org/seh