Kuphedza Abale a Kristu Na Ntima Onsene

‘Pyonsene pidacitira imwe kuli m’bodzi wa abale anga ang’ono, mwapicitira ine pano.’​—MAT. 25:40.

MUNATAWIRA TANI?

Kodi Yahova athimizira tani kubvesesa kwathu nsangani wa mabira na mbuzi?

Mbani adapaswa basa yakumwaza mphangwa?

Thangwi yanji uno ndi ndzidzi toera kuphedza abale a Kristu?

1, 2. (a) Ndi misangani ipi idalonga Yezu na axamwali ace apantima? (Onani cithundzithundzi cakutoma.) (b) Tisafunika kudziwanji thangwi ya nsangani wa mabira na mbuzi?

YEZU akulonga na axamwali ace apantima, Pedhro, Andreya, Tyago na Jwau. Iwo akhadamala kwene kubva misangani ya Yezu inalonga pya m’bandazi wakukhulupirika na wandzeru, amiyali khumi, na wa matalento. Yezu amalisa makani ace na nsangani unango ubodzi. Iye alonga pya ndzidzi wakuti ‘Mwana wa munthu’ anadzatonga ‘anthu a madzindza onsene.’ Nsangani unoyu wakhuya kakamwe anyakupfundzace! Mu nsangani unoyu, Yezu alonga pya misoka miwiri​—wa mabira na wa mbuzi. Iye agomezera pya nsoka wacitatu udalonga iye ninga “abale” a “Mambo.”​—Lerini Mateo 25:31-46.

² Atumiki a Yahova atoma kale kakamwe kusaka kubvesesa nsangani unoyu, thangwi mu nsangani unoyu Yezu alonga pya kupulumuka na kufa kwa anthu. Iye apangiza kuti thangwi yanji anango anadzatambira umaso wakukhonda mala, mu ndzidzi wakuti anango anadzafudzwa kwenda na kwenda. Umaso wathu usanyindira kubvesesa kwathu na kucita pinthu mwakubverana na undimomwene udalonga Yezu. Nakuti umaso uli pangozwi, tisafunika kubvundzika: Kodi Yahova asabvekesa tani mwapang’ono pang’ono nsangani unoyu? Thangwi yanji tinakwanisa kulonga kuti nsangani unoyu usagomezera kufunika kwa basa yakumwaza mphangwa? Mbani adapaswa basa yakumwaza mphangwa? Thangwi yanji uno ndi ndzidzi toera kuphedza na ntima onsene “Mambo” na ale anacemera iye “abale anga”?

KODI KUBVESESA KWATHU KUSATHIMIZIRIKA TANI?

3, 4. (a) Ndi pinthu pipi pisafunika ife kudziwa toera kubvesesa nsangani wa mabira na mbuzi? (b) Kodi revista A Sentinela yafokotoza tani nsangani unoyu mu caka 1881?

³ Toera kubvesesa mwakukwana nsangani wa mabira na mbuzi, tisafunika kudziwa matawiro a mibvundzo iyi: Mbani “Mwana wa munthu” peno “Mambo?” Mbani “mabira na mbuzi?” Mbani “abale” a Mambo? Kodi “Mwana wa munthu” anadzatonga lini mabira na mbuzi? Na thangwi yanji anango asacemerwa mabira peno mbuzi?

⁴ Mu caka 1881, revista ya A Sentinela yafokotoza kuti “Mwana wa munthu” peno “Mambo” ndi Yezu. Anyakupfundza Bhibhlya akutoma abvesesa kuti fala yakuti “abale anga” idalembwa m’Bhibhlya ya Versão Rei Jaime n’Cingerezi, ikhalonga pya ale anafuna kudzatonga na Kristu kuphatanizambo anthu onsene angadzakhala pontho aungwiro pa dziko yapantsi. Iwo akhanyerezera kuti kupambulwa kwa mabira na mbuzi kunadzacitwa nkati mwa Utongi wa Kristu wa Pyaka Cikwi. Iwo akhakhulupira kuti anthu anadzaoniwa ninga mabira thangwi yakukhala maso mwakubverana na midida yaufuni wa Mulungu.

5. Kodi atumiki a Mulungu athimizira tani kubvesesa kwawo mu pyaka 1920?

⁵ Pakutoma kwa pyaka 1920, Yahova aphedza atumiki ace toera kusasanyira kubvesesa kwawo nsangani unoyu. A Sentinela ya 15 de Outubro de 1923 n’Cingerezi, yalonga kuti “Mwana wa munthu” ndi Yezu. Mbwenye iyo yaphatisira Malemba toera kufokotoza kuti abale a Kristu ndi ale basi anafuna kudzatonga na iye kudzulu. Yalongambo kuti mabira ndi ale anadikhira kukhala pantsi pano mu utongi wa Umambo wa Kristu. Thangwi ya ndzidzi wa kupambulwa kwa mabira na mbuzi, nsolo unoyu walonga kuti abale a Kristu anadzatonga pabodzi na iye kudzulu mu Utongi wa Pyaka Cikwi, natenepa, iwo nee mbadafunika kuphedzwa peno kukhonderwa ciphedzo na ale anafuna kukhala pa dziko yapantsi. Munjira ineyi, kupambulwa kwa mabira na mbuzi mbakudacitika pa ndzidzi wakuti Utongi wa Pyaka Cikwi udzati kutoma. Kwa ale anafuna kuoniwa ninga mabira, nsolo unoyu walonga kuti anthu anewa mbadaoniwa munjira ineyi thangwi yakudzindikira Yezu ninga Mbuya wawo mbanyindira kuti ndi Umambo basi unafuna kubweresa makhaliro adidi.

6. Kodi kubvesesa kwathu kwathimizirika tani pontho mu pyaka 1990?

⁶ Kubvesesa kupswa kweneku, kwacitisa atumiki a Yahova kunyerezera kuti anthu akhatongwa ninga mabira peno mbuzi, mu ndzidzi wakumala kwa makhaliro ano a pinthu, mwakubverana na kutawira kwawo mphangwa za Umambo. Mbwenye pakati pa pyaka 1990, maonero athu asasanyirwa pontho papswa. Misolo miwiri ya revista ya A Sentinela ya 15 de Outubro de 1995, yapangiza kulandana kwa mafala a Yezu adalembwa m’bukhu ya Mateo 24:29-31 (lerini) na ale anagumanika pa Mateo 25:31, 32. (Lerini.)a Natenepa, nsolo unoyu walonga: “Kutongwa kwa mabira na mbuzi kunadzacitika ntsogolo.” Mphapo lini? “Pyenepi pinadzacitika ingadzatoma ‘nyatwa ikulu’ inalongwa pa Mateo 24:29, 30, pa ndzidzi wakuti Mwana wa munthu ‘anadzabwera m’mbiri yace.’ . . . Buluka penepo, pakumala kufudzwa kwa makhaliro onsene akuipa, Yezu anadzatonga anthu.”

7. Kodi lero tisabvesesa tani nsangani wa mabira na mbuzi?

⁷ Lero, ife tisabvesesa mwadidi nsangani wa mabira na mbuzi. Tisadziwa kuti “Mwana wa munthu,” na Mambo, ndi Yezu. Adalonga iye ninga “abale anga” ndi amuna na akazi akudzodzwa na nzimu akuti anadzatonga pabodzi na Kristu kudzulu. (Arom. 8:16, 17) “Mabira” na “mbuzi” asaimirira anthu a madzindza onsene. Anthu anewa nee adzodzwa na nzimu wakucena. Ndiye tani pya ndzidzi wakutongwa? Kutongwa kweneku kunadzacitika cifupi na kumala kwa nyatwa ikulu yakuti iri dhuzi na kutoma. Mphapo, thangwi yanji anthu anadzatongwa ninga mabira peno mbuzi? Pyenepi pisanyindira njira idatsalakanira iwo abale akudzodzwa a Kristu adasalikira pa dziko yapantsi. Nakuti kumala kwa makhaliro ano a pinthu kuli cifupi kakamwe, tisapereka takhuta kakamwe thangwi yakuti mwapang’ono pang’ono Yahova abvekesa mwadidi nsangani unoyu na inango yakulandana na unoyu idalembwa pa Mateo kapitulu 24 na 25!

KODI NSANGANI UNOYU USAGOMEZERA TANI BASA YAKUMWAZA MPHANGWA?

8, 9. Thangwi yanji mabira asaoniwa ninga “anyakulungama”?

⁸ Mu nsangani wa mabira na mbuzi, Yezu nee alonga pakweca pya basa yakumwaza mphangwa. Mphapo, thangwi yanji tisalonga kuti nsangani unoyu usagomezera kufunika kwa basa yakumwaza mphangwa?

⁹ Thangwi yakutoma, onani kuti Yezu akhapfundzisa mu kuphatisira misangani. Mwandimomwene, Yezu nee akhafuna kulonga kuti anadzagawadi mabira na mbuzi. Munjira ibodzi ene, Yezu nee akhafuna kulonga kuti onsene anatongwa ninga mabira asafunika kupereka cakudya na nguwo kuna anyakudzodzwa, kuenda kaaona angaduwala peno angakhala nkaidi. Mbuto mwace, iye akhalonga mwakuphiphirisa pya maonero akhafuna kupangiza mabira kuna abale ace. Iye alonga kuti mabira ndi “anyakulungama” thangwi iwo adzindikira kuti Kristu ali na nsoka wa abale akudzodzwa pa dziko yapantsi, pontho mabira asaphedza na ntima onsene Akristu akudzodzwa mu ndzidzi uno wakunentsa wa ntsiku zakumalisa.​—Mat. 10:40-42; 25:40, 46; 2 Tim. 3:1-5.

10. Kodi mabira anakwanisa tani kuphedza abale a Kristu?

¹⁰ Thangwi yaciwiri, onani mafala anango a Yezu. Yezu akhalonga pya cidzindikiro ca kuonekera kwace na ca kumala kwa makhaliro ano a pinthu. (Mat. 24:3) Pakutoma kwene kwa makani ace, Yezu apangiza kuti cidzindikiro mbacidaphataniza cinthu cakufunika kakamwe​—mphangwa zadidi za Umambo mbazidamwazwa kwa “anthu a mitundu yonsene” pa dziko. (Mat. 24:14) Mbadzati kulonga pya mabira na mbuzi, Yezu alonga nsangani wa matalento. Ninga pidapfundza ife mu nsolo udamala, Yezu alonga nsangani unoyu toera kuphedza anyakupfundzace akudzodzwa, “abale ace,” kuti iwo akhafunika kukhala aphinga m’basa yakumwaza mphangwa. Mbwenye nsoka ung’ono wa anyakudzodzwa adasalikira pa dziko yapantsi mu ndzidzi wakuonekera kwa Yezu, asathimbana na pinentso pikulu—kumwaza mphangwa kwa “anthu a mitundu yonsene” kumala mbakudzati kufika. Nsangani wa mabira na mbuzi usapangiza kuti anyakudzodzwa mbadafuna ciphedzo. Natenepa, njira ikulu kakamwe yakuti ale anaoniwa ninga mabira anakwanisa kuphedza abale a Kristu, ndi kuaphedza m’basa yakumwaza mphangwa. Mphapo, ninji pinaphataniza kupereka ciphedzo ceneci? Kodi pisaphataniza basi ene kupereka kobiri, pinthu pyakumanungo na cibalangazo, peno pisaphataniza pizinji?

MBANI ASAFUNIKA KUMWAZA MPHANGWA?

11. Ndi mbvundzo upi wakuti anango mbadaucita, mphapo thangwi yanji?

¹¹ Lero, mwa mamiliyau masere a anyakupfundza a Yezu, azinji nee ndi anyakudzodzwa. Iwo nee atambiriswa matalento adapereka Yezu kuna atumiki ace akudzodzwa. (Mat. 25:14-18) Mbvundzo ndi uyu: ‘Kodi mwandimomwene, basa yakumwaza mphangwa isaphatanizambo ale akuti nee adzodzwa na nzimu wakucena?’ Onani mathangwi mangasi akuti ntawiro ndi inde.

12. Tisapfundzanji kubulukira m’mafala a Yezu adalembwa pa Mateo 28:18, 19?

¹² Yezu apanga anyakupfundzace onsene toera kumwaza mphangwa. Pidamala iye kulamuswa muli akufa, Yezu apanga atowereri ace toera kucita anyakupfundza, na kupfundzisa anthu toera kutoweza matongero ‘onsene’ adaapanga iye. Mwa matongero anewa, isagumanika basa yakumwaza mphangwa. (Lerini Mateo 28:18, 19.) Natenepa, anyakupfundza onsene a Kristu asafunika kumwaza mphangwa, mwakukhonda tsalakana khala asadikhira kuenda kudzulu peno kukhala pa dziko yapantsi.​—Mach. 10:42.

13. Kodi masomphenya adaona mpostolo Jwau asapangizanji? Thangwi yanji?

¹³ Bukhu ya Apokalipse isapangiza kuti basa yakumwaza mphangwa mbidacitwa na Akristu akudzodzwa na anango. Yezu apasa mpostolo Jwau masomphenya a ‘mankhadzi wankazi’​—anthu akukwana 144.000 akuti anadzatonga pabodzi na Kristu kudzulu. Jwau aona anthu anewa mbakacita ncemerero kuna anthu toera ‘kudzamwa madzi akupasa umaso mwakukhonda lipa.’ (Apok. 14:1, 3; 22:17) Madzi anewa asaphiphirisa ntsembe ya ciomboli idapereka Yezu toera kuphedza anthu kuti akhale na umaso wakusowa madawo na kufa. (Mat. 20:28; Jwau 3:16; 1 Jwau 4:9, 10) Ciomboli ndi ntsonga ikulu kakamwe ya mphangwa zinamwaza ife, pontho anyakudzodzwa asatsogolera basa ineyi mu kuphedza anthu toera kupfundza pya ciomboli na kuphindula naco. (1 Akor. 1:23) Mbwenye m’masomphenya anewa, mpostolo Jwau aona anthu anango akuti nee asacita khundu ya nsoka unoyu. Iwo asapangwambo toera kulonga kuti, “Bwera!” Anthu anewa asabvera ntemo unoyu, mbacemera anango toera kumwa madzi akupasa umaso. Nsoka waciwiri unoyu ndi ale anadikhira kukhala pa dziko yapantsi. Natenepa, masomphenya anewa asapangiza kuti onsene anatawira ncemerero toera “kubwera” ali na basa yakumwaza mphangwa kwa anango.

14. Ninji pinaphatanizwa mu kubvera “mwambo wa Kristu”?

¹⁴ Onsene anabvera “mwambo wa Kristu” asafunika kumwaza mphangwa. (Agal. 6:2) Yahova asadikhira kuti alambiri ace onsene abvere midida ibodzi ene. Mwacitsandzo, iye apanga Aisraele: ‘Matongero a Aisraele na a anthu akunja anakhala pakati panu, ndi sawasawa.’ (Eks. 12:49; Lev. 24:22) Akristu nee ali pantsi pa Mwambo wa Mose. Mwakukhonda tsalakana khala ndife akudzodzwa peno nkhabe, tonsene tisafunika kubvera “mwambo wa Kristu.” Mwambo unoyu usaphataniza pyonsene pidapfundzisa Yezu. Cinthu cakufunika kakamwe mu pipfundziso pya Yezu ndi cakuti anyakupfundzace asafunika kupangiza ufuni. (Jwau 13:35; Tgo. 2:8) Njira ibodzi yakupangiza kuti tisafuna Mulungu, Kristu, na anyakuendekana athu ndi kumwaza mphangwa zadidi za Umambo.​—Jwau 15:10; Mach. 1:8.

15. Thangwi yanji ntemo wa Yezu usaphatisirwa kwa anyakupfundzace onsene?

¹⁵ Mafala adalonga Yezu kuna nsoka ung’ono kazinji kene asaphatisirwambo kuna anyakupfundzace azinji. Mwacitsandzo, Yezu acita cibverano ca Umambo na anyakupfundzace 11, mbwenye cibverano ceneci cisaphataniza anyakudzodzwa onsene akukwana 144.000. (Luka 22:29, 30; Apok. 5:10; 7:4-8) Munjira ibodzi ene, Yezu apanga nsoka ung’ono wa anyakupfundzace​—ale adaonana na iye pakumala kulamuka muli akufa, toera kumwaza mphangwa. (Mach. 10:40-42; 1 Akor. 15:6) Mbwenye anyakupfundzace onsene a pyaka dzana yakutoma adzindikira kuti ntemo unoyu ukhaphatisirwambo kwa iwo, maseze iwo nee abva na makutu awo mafala a Yezu. (Mach. 8:4; 1 Ped. 1:8) Munjira ibodzi ene, lero Yezu nee asalonga na amwazi mphangwa za Umambo akukwana mamiliyau masere. Mbwenye onsene asadziwa kuti asafunika kukhulupira Kristu na kupanga anango pya cikhulupiro cawo kubulukira m’basa yakumwaza mphangwa.​—Tgo. 2:18.

UNO NDI NDZIDZI TOERA KUPHEDZERA NA NTIMA ONSENE

16-18. Kodi ale anadikhira kuoniwa ninga mabira asaphedzera tani abale a Kristu? Thangwi yanji asafunika kucita pyenepi cincino?

¹⁶ Sathani akumenya nkhondo na abale a Kristu akudzodzwa adasalikira pa dziko yapantsi. Iye anadzathimiza kuwangisira kwace munaona iye kuti ‘ndzidzi ung’ono’ uli na iye ukumala. (Apok. 12:9, 12, 17) Mwakukhonda tsalakana mayesero akuwanga asafunika iwo kupirira, Akristu akudzodzwa asapitiriza kutsogolera basa ikulu kakamwe yakumwaza mphangwa m’mbiri ya anthu. Mwakukhonda penula, Yezu ali na iwo, mbatsogolera kuwangisira kwawo.​—Mat. 28:19.

¹⁷ Anthu azinji akuti anadzaoniwa ninga mabira, asaona kuti ndi mwai ukulu kuphedza abale a Kristu, tayu basi m’basa yakumwaza mphangwa, mbwenye munjira zinango zakufunika. Mwacitsandzo, iwo asacita pyakupereka pyawo na kuphedza kumanga Nyumba za Umambo, Nyumba za Misonkhano, na maofesi a filiali. Iwo asabvera na ntima onsene akulu a mpingo na anango anakhazikiswa na ‘m’bandazi wakukhulupirika na wandzeru’ toera kutsogolera.​—Mat. 24:45-47, Mphangwa Zadidi; Aheb. 13:17.

¹⁸ Mwakukhonda dembuka, aanju anadzasiya kuphatirira mphepo zinai zakufudza toera kutomesa nyatwa ikulu. Pyenepi pinadzacitika abale akudzodzwa a Kristu angamala kutambira cidzindikiro cawo cakumalisa. (Apok. 7:1-3) Mbidzati kutoma nkhondo ya Armagedoni, Yezu anadzakwata anyakudzodzwa onsene toera kuenda kudzulu. (Mat. 13:41-43) Natenepa, uno ndi ndzidzi wakuti ale anadikhira kuoniwa ninga mabira, asafunika kuphedza abale a Kristu na ntima onsene.

[Cidzindikiro capantsi]