Kumanga Banja “Basi Ene Mwa Mbuya” Kusapitiriza Kuphata Basa?

“Ine nkhabe kwanisa kugumana munthu wakumanga naye banja m’mpingo, natenepa ndisagopa kukalamba mbandidzati kumanga banja.”

“Amuna anango akunja kwa mpingo ndi adidi, aufuni, na acitsalakano kakamwe. Iwo nee asaipirwa na uphemberi wanga, pontho asaoneka ninga ndi adidi kakamwe kupiringana abale anango.”

Atumiki anango a Mulungu asalongambo mafala anewa thangwi yakugumana munthu wakumanga naye banja. Ngakhale tenepo, iwo asadziwa mwadidi uphungu udapereka mpostolo Paulu toera kumanga banja “basi ene mwa Mbuya”​—wakuti usafunika kutsogolera makhaliro a Akristu onsene. (1 Akor. 7:39, Tradução do Novo Mundo) Mphapo, thangwi yanji atumiki anewa asalonga mafala anewa?

THANGWI YANJI ANANGO ASAPENULA UPHUNGU UNOYU?

Ale analonga mafala anewa, panango asanyerezera kuti numero ya alongo akuthema ndi ikulu kakamwe kupiringana ya abale. M’madziko mazinji pyenepi ndipyodi. Onani pitsandzo piwiri: Ku dziko ya Koreya, mu medya, mwa Amboni akukhonda manga banja akukwana 100; 57 ndi alongo, 43 ndi abale. Ku dziko ya Kolombiya, mapurusento akukwana 66 a Mboni za Yahova ndi alongo, mapurusento 34 ndi abale.

M’madziko anango, mpingizo ukulu kakamwe ndi wakuti anyakubala akuti nee ndi Mboni za Yahova, panango asaphemba kobiri izinji kakamwe yakusemba nayo. Pyenepi pisacitisa abale akusowa pizinji anentseke maningi toera kumanga banja. Mu kunyerezera mipingizo ineyi, panango mulongo anaona kuti mphyakunentsa kakamwe kugumana munthu toera kumanga naye banja “mwa Mbuya.” Natenepa, panango mulongo anabvundzika: “Mphyakulinganira kunyerezera kuti ndinakwanisa kugumana munthu wakumanga naye banja pakati pa Akristu andzanga?”a

NYINDIRANI YAHOVA

Khala muli na manyerezero anewa, khalani na cinyindiro cakuti Yahova asadziwa mwadidi makhaliro anu. Inde, Yahova asadziwa kudzudzumika kwanu pa nkhani ineyi.​—2 Pya dziko. 6:29, 30.

Ngakhale tenepo, Yahova akhazikisa citsogolero m’Mafalace toera kumanga banja basi ene mwa Mbuya. Thangwi yanji? Thangwi iye asadziwa kuti ndi pinthu pipi pyadidi kwa atumiki ace. Iye asafuna kutsidzikiza atumiki ace ku nyatwa, pontho asafunambo kuti iwo akhale akutsandzaya. Mu ntsiku za Nehemiya pa ndzidzi wakuti Ayuda azinji akhadamanga banja na akazi akuti nee akhalambira Yahova, Nehemiya aakumbusa pya citsandzo cakuipa ca Salomoni. Maseze Salomoni ‘akhafuniwa maningi na Mulungu wace, akazi akunja an’dawisa.’ (Neh. 13:23-26) Natenepa, toera kuphedza alambiri ace, Yahova asatiphemba toera kumanga banja basi ene pakati pa alambiri andimomwene. (Sal. 19:7-10; Iza. 48:17, 18) Akristu andimomwene, asapereka takhuta kakamwe thangwi ya citsalakano caufuni cinapereka Mulungu mbanyindira citsogolero cace. Mu kungonjera Mulungu, iwo asambvera ninga Ntongi wawo Wakudzulu na Pantsi.​—Mis. 1:5.

Mwandimomwene, imwe nkhabe funa “kumangirwa pabodzi pene” na munthu wakuti anakucitisani kukhala kutali na Mulungu. (2 Akor. 6:14) Akristu azinji lero asabvera pitsogolero pinaapasa Mulungu pa ndzidzi wakuthema pyakuti pisaatsidzikiza, natenepa iwo afika pakudzindikira kuti acita pisankhulo pyadidi. Mbwenye anango asasankhula kukhonda kubvera pitsogolero pyenepi.

USAPITIRIZA KUPHATA BASA

Ku Australya, mulongo unango anacemerwa Maggyb alonga pidancitikira mudatoma iye kubanyirana na munthu wakunja: “Ndaluza misonkhano mizinji basi ene toera kukhala na iye. Makhaliro anga auzimu akhadagwa kakamwe.” Mulongo anacemerwa Ratana anakhala ku Indiya, atoma kucita uxamwali na mphale akhapfundza na iye mu sala ibodzi ene. Mphale unoyu atoma kupfundza Bhibhlya. Mbwenye mukupita kwa ndzidzi, iye apangiza kuti cifuno cace cikhale ca kubanyirana naye. Mulongo adzafika pa kusiya undimomwene, mbapita mu uphemberi unango toera kumanga banja.

Citsandzo cinango ndi ca Ndenguè wa ku Camarões. Iye akhali na pyaka 19 pyakubalwa mudamanga iye banja. Mphale akhabanyirana na iye ampanga kuti mbadakwanisa kupitiriza na uphemberi wace. Mbwenye mudapita masumana mawiri pakumala kumanga banja, mamunace ankhondesa kuenda ku misonkhano Yacikristu. Iye alonga: “Ndikhali wakutsoperwa, mbindilira. Ndadzindikira kuti ndikhadaluza cifuniro ca umaso wanga. Ndzidzi onsene ndikhali wakutsukwala na wakutsumbikika.”

Ndimomwene kuti si amuna onsene tayu akukhonda kukhulupira akuti asadzakhala aukali na akusowa maonero akulinganira. Ngakhale tenepo, maseze mukhonde kuthabuka thangwi yakumanga banja na munthu wakuti nee ndi Mboni ya Yahova, kodi pyenepi pinakhuya tani uxamwali wanu na Baba wanu waufuni? Munabva tani mungadziwa kuti nee mwabvera uphungu wadidi udapereka iye kwa imwe toera kukuphedzani? Cakufunika kakamwe, kodi iye mbadaona tani cisankhulo canu?​—Mis. 1:33.

Abale na alongo pa dziko yonsene ali na umboni wakuti kumanga banja “basi ene mwa Mbuya” ndi cisankhulo cadidi kakamwe. Ale akuti adzati kumanga banja ali akutonga toera kukomeresa ntima wa Mulungu mbasankhula kumanga banja basi ene na munthu wakuthema pakati pa alambiri a Mulungu. Mulongo Michiko asakhala ku Japau, mbadzati kumanga banja, acibale ace ayesera kunkakamiza toera kumanga banja na munthu wakunja. Kusiyapo kuthimbana na nkakamizo wa acibale ace, iye aona axamwali ace na ale akhadziwana na iye mbakamanga banja m’mpingo. Iye alonga: “Nakuti ‘Yahova ndi Mulungu wakutsandzaya,’ ndapitiriza kulonga ndekhene kuti kutsandzaya kwathu nee kusanyindira kumanga banja. Ndisakhulupira kuti iye asakwanirisa pifuniro pya ntima wathu. Natenepa, tingacimwana kugumana munthu wakumanga naye banja, maseze tisafuna kumanga banja, mphyadidi kakamwe kwa ife kukhala nzice mu ndzidzi ungasi.” (1 Tim. 1:11, NM) Mukupita kwa ndzidzi, Michiko adzasembwa na m’bale wadidi, pontho iye ali wakutsandzaya thangwi yakudikhira.

Abale anango adikhirambo toera kugumana munthu wakuthema toera kumanga naye banja. Bill wa ku Australya ndi m’bodzi wa iwo. Iye alonga kuti pa ndzidzi unango iye akhadasirira akazi akunja kwa mpingo. Mbwenye iye awangisira kakamwe toera kucalira kucita uxamwali na iwo. Thangwi yanji? Iye nee akhafuna kucita thanyo yakutoma toera ‘kumangirwa pa gole ibodzi ene’ na munthu wakunja. Mu pyaka pizinji, iye ayesera kudziwa alongo angasi, mbwenye iwo nee apangizambo cifuno kwa iye. Bill apitiriza kudikhira, mudapiringana iye pyaka 30 pyakubalwa, agumana mulongo wakuthema mwakubverana na makhaliro ace. Bill alonga: “Nee ndisatsumbikika.” Iye afokotoza: “Ndi nkhombo kwa ine thangwi tisaenda pabodzi mu utumiki, kupfundza pabodzi na kulambira pabodzi. Ndiri wakutsandzaya kudziwana na kucedza pabodzi na axamwali a nkazanga thangwi onsene ndi alambiri a Yahova. Tisawangisa banja yathu mu kuphatisira midida ya Bhibhlya.”

MU NDZIDZI UNADIKHIRA IMWE YAHOVA

Munacitanji mu ndzidzi unadikhira imwe ciphedzo ca Yahova? Cinthu cibodzi, ndi kunyerezera kuti thangwi yanji mwadzati kumanga banja. Mungaona kuti thangwi ikulu ndi kubvera citsogolero ca Bhibhlya cakuti musafunika kumanga banja “basi ene mwa Mbuya,” imwe mwathema kusimbwa thangwi yakubvera kwanu ntemo wa Mulungu. Khalani na cinyindiro cakuti Yahova asakomerwa kakamwe thangwi yakutonga kwanu kubvera Mafalace. (1 Sam. 15:22; Mis. 27:11) Pitirizani kucita phembero kuna Mulungu ‘mbamundziwisa pyonsene pinadzudzumisa ntima wanu.’ (Sal. 62:8) Maphembero anu anakwanisa kukhala na mabvekero mazinji mungaacita mwaphinga na mwakukhonda phonya. Uxamwali wanu na Mulungu unadzawangiswa ntsiku zonsene mungakhala dzololo mwakukhonda tsalakana mayesero onsene anathimbana na imwe. Khalani na cinyindiro cakuti Mulungu asatsalakana atumiki ace onsene akukhulupirika, pontho kuti ndimwe wakufunika kakamwe kwa iye. Iye asatsalakana pyakusowa pyanu pontho anadzakwanirisa pifuno pyanu. Mulungu nee asapikira kuti anadzatipasa munthu wakumanga naye banja. Mbwenye khala imwe musafunadi munthu wakumanga naye banja, Mulungu asadziwa njira yadidi kakamwe toera kukwanirisa pifuno pyanu pyakulinganira.​—Sal. 145:16; Mat. 6:32.

Midzidzi inango munakwanisa kucita phembero ninga nyamasalmo Dhavidhi adalonga kuti: ‘Yahova, nditawireni mwakucimbiza; mphambvu zanga zonsene zamala! Lekani kundibisira nkhope yanu.’ (Sal. 143:5-7, 10) M’midzidzi ineyi, phembani Babanu wakudzulu toera apangize cifuno cace kwa imwe. Munakwanisa kucita pyenepi mu kukhazikisa ndzidzi toera kuleri Bhibhlya na kunyerezera mwacidikhodikho pinthu pinaleri imwe. Natenepa, munadzadziwa mitemo ya Mulungu na kuona kuti iye aphedza tani atumiki ace akale. Mungabvesera Mulungu, munadzakhala na mathangwi mazinji toera kun’nyindira na kumbvera.

Ninji pontho pinafuna kukuphedzani toera pyaka pya uzice wanu pikhale pyakutsandzayisa na pyakuphindulisa? Phatisirani uzice wanu toera kukulisa makhaliro auzimu ninga luso yakudzindikira, kupasa mwakudzala manja, kuphata basa mwaphinga, kukomerwa, kuperekeka kuna Mulungu, na mbiri ya makhaliro adidi. Anewa ndi makhaliro akufunika kakamwe toera kukhala na banja yakutsandzayisa. (Gen. 24:16-21; Rute 1:16, 17; 2:6, 7, 11; Mis. 31:10-27) Ikhani Umambo pa mbuto yakutoma mu kucita khundu mwakukwana m’basa yakumwaza mphangwa, na mabasa anango Acikristu. Kucita pyenepi kunadzakutsidzikizani. Bill adalongwa mu ndima zidamala, alonga thangwi ya pyaka pikhafuna iye kumanga banja: “Pyapita mwakucimbiza kakamwe! Ndaphatisira ndzidzi unoyu toera kutumikira Yahova ninga mpainiya.”

Inde, kumanga banja “basi ene mwa Mbuya” kusapitiriza kuphata basa. Kubvera citsogolero ceneci kunadzakuphedzani toera kupasa mbiri Yahova mbamukhala wakutsandzaya kwenda na kwenda. Bhibhlya isalonga: ‘Wakutsandzaya ndi munthu anagopa Yahova mbakomerwa na kubvera matongero ace. Banja yace inadzaona utende na upfumi, cilungamo cace ndi cakwenda na kwenda.’ (Sal. 112:1, 3) Natenepa, khalani wakutonga toera kubvera ntemo wa Mulungu unalonga pya kumanga banja “basi ene mwa Mbuya.”

[Pidzindikiro pyapantsi]