BHIBHLYA ISACINJA UMASO WA ANTHU
Mibvundzo Mitatu Idacinja Umaso Wanga
Yakulongwa na Doris Eldred
CAKA CAKUBALWA: 1949
DZIKO YAKUBALWA: ESTADOS UNIDOS
MBIRI: KUSAKA CIFUNIRO CA UMASO
MBIRI YANGA: Ndakula ku Ancram, nzinda ung’ono, kunkwiriro kwa Nova York, E.U.A. Nzinda wakuti ukhali na mazunde mazinji. Na thangwi ineyi, ukhali na ng’ombe zizinji kupiringana anthu.
Banja yathu ikhaenda ku gereja ibodzi basi mu nzinda unoyu. Madimingu onsene namacibese, Yavu akhapukuta ntsapato zanga, buluka penepo mbandienda kuxikola yakupfundzisa ana pyauphemberi na Bhibhlya ing’ono yakucena idapaswa ine na mbuyanga. Ine na abale anga awiri tikhapfundziswa kuphata basa mwakuwanga, kulemedza na kuphedza anyakuendekana athu, pontho kupereka takhuta thangwi ya nkhombo zathu.
Mudakula ine, ndabuluka panyumba pathu mbandidzakhala mpfundzisi. Ndikhali na mibvundzo mizinji thangwi ya Mulungu na umaso. Anango mwa anyakupfundza anga akhali a maluso. Anango nkhabe, mbwenye akhaphata basa mwakuwanga kakamwe. Anango akhali akulamala, anango a ungumi wadidi kakamwe. Ndikhapibva kuti makhaliro nee akhali mwadidi. Midzidzi inango anyakubala a ana anewa akunentseka akhalonga mafala ninga awa, “Mulungu asafuna kuti mwananga akhale tenepa.” Ndikhabvundzika thangwi yanji Mulungu asalekerera akhombwani anango kubalwa akulamala. Mwandimomwene, khombwani nee asacita cinthu cakuipa.
Ndanyerezerambo, ‘Ndi cinthu cipi cakufunika cakuti ndisafunika kucicita mu umaso wanga?’ Ndikhaona umaso wanga ukhamala mwakucimbiza. Ndakula m’banja yadidi, ndapfundza maxikola adidi, pontho ndikhaphata basa yakuti ndikhaifuna. Mbwenye pinthu pyenepi pikhaoneka ninga pyapezi kwa ine. Kusiyapo pyenepi, ndikhadikhira kumanga banja, kukhala na nyumba yadidi, ana na kupitiriza kuphata basa mpaka kukalamba mbandienda kakhala ku nyumba inatsalakanwa ankhalamba. Ndikhabvundzika khala pana pinthu pinango toera kupicita mu umaso.
BHIBHLYA YACINJA TANI UMASO WANGA: Ntsiku inango mu ndzidzi wa malimwe, ndaenda ku Europa pabodzi na apfundzisi andzanga. Taenda ku Westminster Abbey, Notre-Dame de Paris, na ku Vaticano, kuphatanizambo na magereja mazinji mang’ono. Mbuto zonsene zikhaenda ine, ndikhacita mibvundzo yanga. Pidabwerera ine kunyumba ku Sloatsburg, Nova York, ndaenda magereja mazinji. Mbwenye nee ibodzi yandipasa matawiro akuphata ntima.
Ntsiku inango, nyakupfundza wanga wa pyaka 12 andifendedzera mbandicita mibvundzo mitatu. Wakutoma, andibvundza khala ndisadziwa kuti iye akhali m’bodzi wa Mboni za Yahova. Ndantawira kuti inde. Waciwiri, andibvundza khala ndisafuna kudziwa pizinji thangwi ya Mboni za Yahova. Ndantawira pontho kuti inde. Wacitatu, andibvundza kunakhala ine. Mudampanga ine, taona kuti ndikhakhala cifupi na kunyumba kwawo. Ine nee ndikhadziwa kuti mibvundzo ineyi mitatu idandicita ntsikana mbidacinja umaso wanga kwenda na kwenda.
Mwakukhonda dembuka, iye abwera na njinga kunyumba kwanga mbinditoma kupfundza Bhibhlya na iye. Ndancita mibvundzo ikhacita ine atsogoleri azinji a mauphemberi. Mwakusiyana na atsogoleri anewa, iye andipasa matawiro akubveka mwadidi na akuphata ntima mukuphatisira Bhibhlya yanga—matawiro akuti cipo ndaabva kale!
Pidapfundza ine m’Bhibhlya pyanditsandzayisa kakamwe. Ndakhuyiwa kakamwe mudaleri ine 1 Jwau 5:19, inalonga kuti: “Anthu onsene, anadzadza pantsi pano, ali m’manja mwa mademonyo.” Ndadziwa kuti anacitisa pinthu pyakuipa pinaona ife nee ndi Mulungu, mbwenye Sathani, pontho kuti Mulungu anadzamalisa makhaliro anewa. (Apokalipse 21:3, 4) Ndadzindikira kuti Bhibhlya ingafokotozwa mwadidi isaphindulisa. Maseze ntsikana akhandipfundzisa akhali Mboni ya Yahova wa pyaka 12, ndadzindikira kuti undimomwene nkhabe tsalakana thunga ya munthu anaulonga.
Natenepa, ndafuna kuona khala Mboni za Yahova zisacita pinapfundzisa iwo. Mwacitsandzo, ntsikana agomezera kuti Akristu andimomwene asapangiza makhaliro a kupirira na kukoma ntima. (Agalata 5:22, 23) Ndatonga kumuyesera khala asapangiza makhaliro anewa. Ntsiku inango, ndanyerezera kufika mwakudembuka panyumba toera kupfundza. Ndabvundzika: ‘Kodi iye anandidikhira? Khala ndi tepo, nee ndinangumana ali wakuipirwa thangwi yakudembuka kwanga?’ Mudatcita ine m’motokala mwanga, ndamuona mbakandidikhira kutsogolo kwa nyumba yanga. Iye andithamangira mbalonga: “Ndikhafuna kuenda kapanga mama toera timenyere ntokodzi nyumba ya ungumi na apolixa toera kudziwa khala muli mwadidi, thangwi cipo mwadembuka pa pfundziro yathu. Ndikhadzudzumika kakamwe thangwi ya imwe!”
Ntsiku inango, ndancita mbvundzo mbandinyerezera kuti mbudanentsa kakamwe kwa ntsikana unoyu wa pyaka 12 toera kuutawira. Ndikhafuna kuona khala mbadakwanisa kuutawira. Mudambvundza ine, iye andiyang’ana mbalonga: “Unoyu ndi mbvundzo wakunentsa kakamwe. Ndinaulemba toera kabvundza anyakubala anga.” Mwandimomwene, paulendo unango wa pfundziro yathu, iye abweresa revista ya Ncenjezi yakuti ikhali na ntawiro wa mbvundzo wanga. Pyenepi ndi pidanditundusa kuna Mboni za Yahova—mabukhu awo akubuluswa m’Bhibhlya atawira mibvundzo yanga yonsene. Ndapitiriza kupfundza na ntsikana unoyu, pontho caka cibodzi patsogolo pace ndabatizwa ninga m’bodzi wa Mboni za Yahova.a
NDAPHINDULA TANI: Mudadziwa ine matawiro akuphata ntima a mibvundzo yanga, ndafuna kuadziwisambo anango. (Mateo 12:35) Pakutoma, acibale anga akhanditcinga thangwi ya pikhulupiro pyanga pipswa. Mukupita kwa ndzidzi, acinja maonero awo. Mama mbali nkhalamba atoma kupfundza Bhibhlya. Maseze iye alowa mbadzati batizwa, ndiri na cinyindiro cakuti akhadatonga kutumikira Yahova.
Mu caka 1978, ndamanga banja na m’bale anacemerwa Elias Kazan. Mu caka 1981, ine na Elias tacemerwa toera katumikira ku Beteli ya Estados Unidos.b Mwakutsukwalisa, pidatumikira ife basi ene pyaka pinai, Elias alowa. Maseze ndikhali nzice, ndikhapitiriza na basa pa Beteli yakuti ikhandicitisa kukhonda nyerezera pizinji na kundipasa cibalangazo.
Mu caka 2006, ndamanga pontho banja na Richard Eldred, m’bale wa banja ya Beteli. Ine na Richard tikupitiriza na mwai wakutumikira pa Beteli. Kudziwa undimomwene unalonga pya Mulungu, ndisapibva kuti ndagumana tayu basi matawiro akhasaka ine, mbwenye ndagumanambo cifuniro candimomwene ca umaso kutomera pa mibvundzo mitatu idandicita ntsikana.
[Pidzindikiro pyapantsi]
a Ntsikana unoyu pabodzi na abaleace akulu, aphedza apfundzisi awo axanu kupfundza Bhibhlya na kutoma kulambira Yahova.
b “Beteli,” isabveka “Nyumba ya Mulungu,” fala inaphatisirwa na Mboni za Yahova toera kulonga maofesi a filiali pa dziko yonsene yapantsi. (Genesi 28:17, 19) Abale na alongo a banja ya Beteli asacita mabasa akusiyana-siyana akuti asaphedzera basa yakupfundzisa ya Mboni za Yahova.