Towezerani Ule Anapikira Umaso Wakukhonda Mala

1. Ndi luso ipi yakuti inatiphedza toera kutowezera makhaliro a Mulungu?

YAHOVA atipasa luso yakubvesesa mabvero a anango, maseze tidzati kuthimbana na nyatwa ziri na iwo. Ife tinakwanisa kunyerezera makhaliro akuti cipo taatamba. (Lerini Aefesi 5:1, 2.) Tinakwanisa tani kuphatisira mwadidi muoni unoyu udapaswa ife na Mulungu? Tisafunika kucitanji toera muoni unoyu ukhonde kutiphekesa?

2. Kodi nyatwa zathu zisakhuya tani Yahova?

² Mwandimomwene, tisakomerwa kakamwe thangwi Mulungu apikira umaso wakukhonda kufudzika kudzulu kwa anyakudzodzwa akukhulupirika, na umaso wakukhonda mala pa dziko yapantsi kwa “mabira anango” akukhulupirika a Yezu. (Jwau 10:16; 17:3; 1 Akor. 15:53) Mwandimomwene, umaso wakukhonda kufudzika kudzulu na umaso wakukhonda mala pa dziko yapantsi nkhabe kudzakhuyiwabve na nyatwa zinaoneka lero. Yahova asadziwa nyatwa inatamba ife, ninga mukhadziwira iye nyatwa ikhatamba Aisraele ninga mabitcu mu Ejito. Inde, “mu ndzidzi ukhaona iwo nyatwa, pikhali pyakutsukwalisa kwa iye.” (Iza. 63:9, Tradução do Novo Mundo) Mudapita pyaka pizinji, Ayuda akhagopa, thangwi anyamalwa awo akhaapingiza kumanga papswa templo, mbwenye Mulungu alonga: “Ule anakukhuyani, ali kudzokonya n’diso mwanga.” (Zak. 2:8, NM) Ninga mama wakuti asabvera ntsisi kakamwe khombwani wace, Yahova asakulumizika toera kucita pinthu mwaufuni toera kutsalakana atumiki ace. (Iza. 49:15) Inde, Yahova asakwanisa kuikhika pa mbuto ya anango, pontho iye atipasambo luso ineyi.​—Sal. 103:13, 14.

KODI YEZU APANGIZA TANI UFUNI WA MULUNGU?

3. Ninji cinapangiza kuti Yezu akhabvera ntsisi?

³ Yezu abvesesa nyatwa za anango, ngakhale za ale akuti cipo azitamba. Mwacitsandzo, anthu akhagopa kakamwe atsogoleri a mauphemberi, akuti akhaanyengeza na kuaonesa nyatwa thangwi ya mitemo mizinji ikakhazikisa iwo. (Mat. 23:4; Marko 7:1-5; Jwau 7:13) Yezu cipo agopeswa peno kunyengezwa, mbwenye akhakwanisa kubvesesa makhaliro akuti cipo aatamba. Natenepa, “pidaona iye anthu aabvera ntsisi thangwi iwo akhaona nyatwa mbakhala mu umphawi ninga mabira anasowa nkumbizi.” (Mat. 9:36) Ninga Baba wace, Yezu akhali waufuni na wakubvera ntsisi.​—Sal. 103:8.

4. Kodi kuona nyatwa za anango kwakhuya tani Yezu?

⁴ Pidaona iye anthu mbakathabuka, Yezu akulumizika toera kupangiza ufuni kwa iwo. Natenepa, iye apangiza mwadidi ufuni wa Baba wace. Pakumala kucita ulendo wakulapha kakamwe mbakamwaza mphangwa, Yezu na apostolo ace akhafuna kuenda ku mbuto yakusowa dzumbi toera kupuma. Mbwenye nakuti iye abvera ntsisi mwinji wa anthu ukhan’dikhira, Yezu atoma ‘kuapfundzisa pinthu pizinji.’​—Marko 6:30, 31, 34

TINATOWEZERA TANI UFUNI WA YAHOVA?

5, 6. Toera kutowezera ufuni wa Mulungu, tisafunika kutsalakana tani andzathu? Perekani citsandzo. (Onani cithundzithundzi cakutoma.)

⁵ Ife tinakwanisa kutowezera ufuni wa Mulungu kubulukira munjira inatsalakanira ife andzathu. Mwacitsandzo: Nyerezerani kuti mphale Wacikristu anacemerwa Alan akunyerezera pya m’bale wakugwesera wakuti nkhabe kuona mwadidi, pontho nkhabe kwanisa kuleri. Iye nkhabe kwanisambo kufamba mwadidi toera kuenda mu utumiki wa nyumba na nyumba. Alan asakumbuka mafala a Yezu: ‘Ninga munafunira imwe kuti anthu akucitireni, tenepa acitirenimbo imwe.’ (Luka 6:31) Natenepa, Alan asabvundzika: ‘Kodi ndisafuna kuti anthu andicitirenji?’ Ntawiro wace ndi wakuti: ‘Ndisafuna kuti iwo amenye bola pabodzi na ine!’ Mbwenye m’bale wakugwesera nee anakwanisa kumenya bola na iye. Mafala a Yezu asaphemba toera tibvundzike tenepa: ‘Kodi ine mbidafuna kuti ndzanga acitenji kuna ine, khala ndiri m’makhaliro ninga ace?’

⁶ Alan nee ndi wakugwesera, mbwenye asakwanisa kubvesesa makhaliro akuti adzati kuatamba. Iye asaona m’bale wakugwesera mbapangiza citsalakano mu ndzidzi unambvesera iye. Mwapang’ono pang’ono, Alan asabvesesa nyatwa inathimbana na munthu wakugwesera wakuti asanentseka toera kuleri Bhibhlya peno kumwaza mphangwa nyumba na nyumba. Natenepa, Alan asakwanisa kuona kuti anaphedza tani m’bale wakugwesera, mbacita pyonsene pinakwanisa iye toera kumphedza. Ife tinakwanisambo kucita pyenepi. Toera kutowezera ufuni wa Mulungu, tisafunika kuikhika pa mbuto ya abale athu, peno kubvesesa mabvero awo.​—1 Akor. 12:26.

7. Tinakwanisa tani kudziwa mwadidi nyatwa za abale athu?

⁷ Midzidzi inango pisanentsa kubvesesa nyatwa zinathimbana na anango. Azinji asathimbana na nyatwa zakuti cipo tazitamba. Anango asaona nyatwa thangwi ya kulamala, utenda, peno kugwesera. Anango asathimbana na nyatwa ya manyerezero thangwi yakutsukwala, peno kutsalakanwa mwakuipa nduli. Anango asakuza ana okhene peno ali na acibale akuti nee asatumikira Yahova. Anthu onsene asathimbana na nyatwa, kazinji kene nyatwa yakuti tidzati kuitamba. M’makhaliro anewa, tinakwanisa tani kutowezera ufuni wa Mulungu? Tisafunika kubvesera mwacidikhodikho mbatisaka kubvesesa mabvero awo. Pyenepi pinadzatikulumiza toera kutowezera ufuni wa Yahova mu kucita pinthu mwakubverana na pinafuna iwo. Pifuno mphyakusiyana kwa anthu, mbwenye ife tinakwanisa kuwangisa mwauzimu na kupereka ciphedzo cinango cakuthema.​—Lerini Aroma 12:15; 1 Pedro 3:8.

TOWEZERANI KUKOMA NTIMA KWA YAHOVA

8. Ninji pidaphedza Yezu toera kupangiza kukoma ntima?

⁸ Mwana wa Mulungu alonga: ‘Mulungu ngwadidi kuli ale anakhonda kupereka takhuta na kwa anyakuipa.’ (Luka 6:35) Mwandimomwene, Yezu atowezera kukoma ntima kwa Mulungu. Ninji pidaphedza Yezu toera kucita pyenepi? Iye atsalakana anthu munjira yakukoma ntima mu kunyerezera mwanyapantsi kuti mafalace na macitiro ace mbadakhuya tani mabvero a anango. Mwacitsandzo, nkazi wakuti akhadziwiwa ninga nyakudawa afendedzera Yezu na kulira mbapukuta miyendo yace na misozi yace. Yezu adzindikira kuti iye akhadatcinyuka, pontho adziwa kuti mbadatsukwala kakamwe khala am’bulusa mwakukhonda kupangiza kukoma ntima. Mbuto mwace, iye ansimba mbamulekerera. Mu ndzidzi udaipirwa Nfarisi na pikhadacitika, Yezu alongambo naye mwakukoma ntima.​—Luka 7:36-48.

9. Ninji cinafuna kutiphedza toera kutowezera kukoma ntima kwa Mulungu? Perekani citsandzo.

⁹ Tinakwanisa tani kutowezera kukoma ntima kwa Mulungu? Mpostolo Paulu alemba: “Mwanankati wa Mbuya akhonde kuketesana, mbwenye akhale wakubverana na anthu onsene.” (2 Tim. 2:24) Anthu aluso asadzindikira kuti anatsalakana tani makhaliro akunentsa toera kucalira kuphekesa mabvero a anango. Nyerezerani kuti tinapangiza tani makhaliro adidi m’maonero anatowerera: Kubasa, patrau wathu nee asacita mwadidi basa yace. Tinacitanji? M’bale abwera ku misonkhano pakumala nthanda zizinji nee kugumanika ku misonkhano. Tinalonganji kuna iye? Mu utumiki, mwanaciro nyumba alonga kuti, “Ndaphatika kakamwe, natenepa nkhabe ndzidzi toera kucedza na imwe.” Tinakwanisa kulemedza maonero ace? Kunyumba kwanu, mamunanu peno nkazanu abvundza: “Thangwi yanji nee wandipanga pidanyerezera iwe kucita n’Sabudu?” Munadzatawira munjira yakukoma ntima? Kunyerezera mwanyapantsi kuti mafala athu anakhuya tani anango, pinatiphedza toera kudzindikira kuti tinalonga tani na tinacitanji toera kutowezera kukoma ntima kwa Yahova.​—Lerini Misangani 15:28.

TOWEZERANI UDZIWISI WA MULUNGU

10, 11. Ninji cinafuna kutiphedza toera kutowezera udziwisi wa Mulungu? Perekani citsandzo.

¹⁰ Luso yathu yakubvesesa makhaliro akuti cipo taatamba, inatiphedzambo toera kutowezera udziwisi wa Yahova na kuona mwanyapantsi pinthu pinafuna kubwereswa na macitiro athu. Udziwisi ndi ubodzi wa makhaliro akufunika kakamwe a Yahova, iye angafuna, iye anakwanisa kuona mwanyapantsi pyonsene pinafuna kubwereswa na macitiro a anthu. Ife nkhabe luso yakuona pinthu mwanyapantsi, mbwenye mphyadidi kunyerezera kuti pinthu pinafuna ife kucita pinatibwereseranji. Aisraele nee anyerezera pya nyatwa ikhafuna iwo kuona thangwi yakukhonda kubvera Mulungu. Mwakukhonda tsalakana pyonsene pidaacitira Mulungu, Mose adziwa kuti iwo mbadacita pinthu pyakuipa pamaso pa Yahova. Pamaso pa Aisraele onsene, iye aimba nyimbo ya mafala awa: ‘Iwo ndi anthu akukhonda langwa, iwo nkhabe kubvesesa. Mbadakhala andzeru, mbadacita ipi pyonsene, mbadanyerezera pinthu pinafuna kuacitikira.’​—Deut. 31:29, 30; 32:28, 29.

¹¹ Toera kutowezera udziwisi wa Mulungu, mphyadidi kunyerezera mwacidikhodikho kuti macitiro athu anatibwereseranji. Mwacitsandzo, khala tiri kubanyirana tisafunika kudzindikira mphambvu ya cifuno cakupita m’mabonde. Cipo tisafunika kucita masasanyiro peno kucita cinthu cakuti cinaikha pangozwi uxamwali wathu wakufunika kakamwe na Yahova! Mbuto mwace, tendeni ticite pinthu mwakubverana na mafala awa akupumirwa: ‘Nyandzeru pakuona pyakugopswa asabisala, mbwenye nyakusowa ndzeru asapita patsogolo mbaona napyo nyatwa.’​—Mis. 22:3.

CALIRANI KUNYEREZERA PYAKUPHEKESA

12. Kodi manyerezero anakwanisa tani kutiphekesa?

¹² Munthu wandzeru asacita mpholemphole na pinanyerezera iye. Manyerezero athu anakwanisa kulandaniswa na moto. Moto ungaphatisirwa mwadidi, unakwanisa kutiphedza toera kuphika cakudya. Mbwenye ungakhonda kuphatisirwa mwadidi, unakwanisa kupisa nyumba yathu, ngakhale kutipha. Munjira ibodzi ene, manyerezero ndi akuphindulisa khala asatiphedza toera kutowezera Yahova. Mbwenye anakwanisa kutiphekesa khala tisaaphatisira toera kunyerezera pifuno pyakuipa. Mwacitsandzo, tingakhala na nsambo wakunyerezera pyaulukwali na pinthu pyakuipa, tinakwanisa kusirira kakamwe pinthu pyenepi mpaka kupicita. Mwandimomwene, pyenepi pinakwanisa kumalisa uxamwali wathu na Yahova.​—Lerini Tyago 1:14, 15.

13. Ndi ntundu upi wa umaso udanyerezera Eva?

¹³ Onani kuti Eva nkazi wakutoma akulisa tani cifuno cakudya nsapo wakukhondeswa wa ‘muti wakudziwa pyadidi na pyakuipa.’ (Gen. 2:16, 17) Nyoka yampanga: ‘Nkhabe, nee munadzafa. Mbwenye Mulungu asadziwa kuti, pa ntsiku inadzadya imwe, maso anu anadzafunguka, na imwe munadzakhala sawasawa na Mulungu, munadzadziwa pyadidi na pyakuipa.’ Eva ‘aona kuti nsapo wa muti ukhali wadidi toera kuudya na kuusirira.’ Ninji pidacitika? ‘Iye akwata nsapo mbadya. Buluka penepo apasambo mamunace, pikhali iwo pabodzi, iye adyambo.’ (Gen. 3:1-6) Kwa Eva, manyerezero a Sathani akhali akutundusa. Mbuto mwakucita pangwa pyadidi na pyakuipa, iye mbadacita pyenepi mwakutongereka. Manyerezero anewa akhali akuphekesa kakamwe! Kubulukira kwa Adhamu, ‘madawo apita pantsi pano, mbakupitambo kufa thangwi ya madawo.’​—Arom. 5:12.

14. Kodi Bhibhlya isatiphedza tani toera kucalira pyaulukwali?

¹⁴ Kudawa kwa Eva m’munda wa Edeni nee kukhaphataniza ulukwali. Mbwenye Yezu acenjeza thangwi yakunyerezera pyaulukwali. Iye alonga: ‘Munthu onsene anayang’anisa nkazi mbansirira, acita naye kale upombo muntima mwace.’ (Mat. 5:28) Kusiyapo pyenepi, Paulu acenjeza: “Lekani kucita masasanyiro mwanyapantsi toera kucita pifuno pyaunyama.”​—Arom. 13:14.

15. Ndi ntundu upi wa mpfuma yakuti tisafunika kuikoya, thangwi yanji?

¹⁵ Ngozwi inango ndi kunyerezera kukhala wakupfuma kakamwe uku mbatikhonda kucita pizinji m’basa ya Mulungu. Mwandimomwene, kwa munthu wakupfuma, ‘pya upfumi wace asapiona ninga malinga akulapha.’ (Mis. 18:11) Yezu alonga nsangani toera kupangiza makhaliro akutsukwalisa a munthu wakuti ‘asakoyereka ekha pya upfumi, mbakhonda kukhala wakupfuma pamaso pa Mulungu.’ (Luka 12:16-21) Yahova asakomerwa tingacita pinthu pyakuti pisantsandzayisa. (Mis. 27:11) Tisakhala akutsandzaya kakamwe tingadziwa kuti ndife akutawirika kwa iye thangwi yakukoya ‘mpfuma kudzulu’! (Mat. 6:20) Mwakukhonda penula, uxamwali wadidi na Yahova ndi mpfuma ya ntengo ukulu kakamwe yakuti tinakwanisa kukhala nayo.

LEKANI KUPITIRIZA KUDZUDZUMIKA

16. Ninji cinafuna kutiphedza tingakhala akudzudzumika?

¹⁶ Nyerezerani kupswipa ntima kunafuna kukhala na ife tingawangisira kakamwe toera ‘kukoya mpfuma pa dziko yapantsi.’ (Mat. 6:19) Yezu aphatisira nsangani toera kupangiza kuti ‘kunyerezera maka pinthu pya pantsi pano, na pya mpfuma yakudzudzumisa’ pinakwanisa kutipingiza kuikha Umambo wa Mulungu pa mbuto yakutoma mu umaso. (Mat. 13:18, 19, 22) Anthu anango asadzudzumika ndzidzi onsene mu kunyerezera pinthu pyakuipa pyakuti pinakwanisa kuacitikira. Mbwenye manyerezero akudzudzumika kakamwe anakwanisa kutiphekesa mwauzimu na ku manungo. Tendeni tinyindire Yahova mbatikumbuka kuti ‘nyatwa peno kudzudzumika kusatsukwalisa munthu, mbwenye fala yadidi isabalangaza.’ (Mis. 12:25) Mafala adidi akuwangisa a munthu wakuti asabvesesa makhaliro athu anakwanisa kutsandzayisa ntima wathu. Kulonga pinthu pinatidzudzumisa kuna anthu anaona pinthu m’maonero a Mulungu, ninga anyakubala athu, ndzathu wa m’banja, peno xamwali wakunyindirika kunatiphedza toera kupungula kudzudzumika kwathu.

17. Kodi Yahova asatiphedza tani toera kuthimbana na kudzudzumika?

¹⁷ Nkhabepo munthu anabvesesa kakamwe kudzudzumika kwathu kupiringana Yahova. Paulu alemba: ‘Lekani kudzudzumika nee na cinthu cibodzi, mbwenye pakucita maphembero, pa kudembetera, pa kucitambo takhuta, mudziwise Mulungu pinthu pyanu pyonsene. Ntendere wa Mulungu wakupiringana ndzeru zonsene unadzakoya mitima yanu na ndzeru zanu mwa Kristu Yezu.’ (Afil. 4:6, 7) Mungadzudzumika, nyerezerani ciphedzo cinatambira imwe kubulukira kuna abale na alongo, akulu a mpingo, m’bandazi wakukhulupirika, aanju, Yezu, na Yahova.

18. Kodi luso yathu yakunyerezera inatiphedza tani?

¹⁸ Mwakubverana na pidadinga ife, manyerezero anakwanisa kutiphedza toera kutowezera makhaliro a Yahova, ninga ufuni. (1 Tim. 1:11; 1 Jwau 4:8) Tinadzatsandzaya tingapangiza ufuni wandimomwene, tinganyerezera mwanyapantsi nyatwa ya macitiro athu, na kucalira kudzudzumika kwakuti kunapingiza kutsandzaya kwathu. Natenepa, tendeni tiphatisire mwadidi luso yathu idapaswa ife na Mulungu toera kunyerezera pya cidikhiro cathu cantsogolo na kutowezera makhaliro a Yahova, ninga ufuni, kukoma ntima, udziwisi, na kutsandzaya.