Khalani Maso Mwakubverana Na Phembero Yacitsandzo Khundu 1

‘Dzina yanu mbiceneswe.’​—MAT. 6:9.

MUSAKUMBUKA?

Tisapfundzanji kubulukira m’mafala akuti “Baba wathu”?

Thangwi yanji tisafunika kuphembera kuti dzina Ya Mulungu iceneswe?

Tinakhala tani maso mwakubverana na phembo yakuti cifuniro ca Mulungu cicitike pantsi pano?

1. Mu utumiki wathu, tinaphatisira tani phembero inagumanika pa Mateo 6:9-13?

ANTHU azinji asadziwa kakamwe mafala a Phembero ya Mbuya. Mu utumiki wathu wa nyumba na nyumba kazinji kene tisaphatisira mafala anewa toera kuphedza anaciro nyumba toera kubvesesa kuti Umambo wa Mulungu ndi utongi wandimomwene wakuti unadzabweresa macinjo akutsandzayisa pa dziko yapantsi. Peno tisaphatisira phembo yakutoma ya phembero ineyi toera kupangiza kuti Mulungu ali na dzina yakuti isafunika kuceneswa.​—Mat. 6:9.

2. Tisadziwa tani kuti Yezu nee akhafuna kuti phembero yacitsandzo ibwerezerwe fala na fala ndzidzi onsene unacita ife phembero?

² Kodi Yezu akhafuna kuti phembero ineyi ibwerezerwe fala na fala ndzidzi onsene unacita ife phembero, ninga pinacita mauphemberi mazinji? Nkhabe. Mbadzati kupangiza phembero ineyi ninga citsandzo, iye alonga: “Pakucita phembero, lekani kulonga pinthu pibodzi pyene mwakubwereza-bwereza.” (Mat. 6:7, Tradução do Novo Mundo) Pa ndzidzi unango, iye acita phembero ibodzi ene, mbwenye aphatisira mafala akusiyana. (Luka 11:1-4) Natenepa, Yezu atiphedza kudziwa kuti ndi pinthu pipi pisafunika ife kuphemba na ndi pipi pisafunika ife kuikha pa mbuto yakutoma. Munjira ineyi, mphyakuthema kulonga kuti ineyi ndi phembero yacitsandzo.

3. Ndi mibvundzo ipi isafunika ife kunyerezera mwacidikhodikho munadinga ife phembero yacitsandzo?

³ Mu nsolo uno na unatowerera, tinadzadinga mabvekero a phembero yacitsandzo. Munacita ife pyenepi, bvundzikani: ‘Kodi phembero yacitsandzo inandiphedza tani toera kusasanyira maphembero anga? Cakufunika kakamwe, kodi ndikukhala maso mwakubverana na phembero yacitsandzo?’

“BABA WATHU MULI KUDZULU”

4. Kodi mafala akuti “Baba wathu” asatikumbusanji? Ndi munjira ipi Yahova ndi “Baba” wa Akristu anadikhira kukhala pa dziko yapantsi?

⁴ Mafala akuti “Baba wathu,” tayu “Baba wanga,” asatikumbusa kuti ndife nsoka wa abale akuti mwandimomwene asafunana unango na ndzace. (1 Ped. 2:17) Unoyu ndi mwai ukulu kakamwe! Akristu akudzodzwa akuti asasankhulwa na Yahova toera kuenda kudzulu, asacemera Yahova ninga “Baba” wawo munjira yakupambulika. (Arom. 8:15-17) Akristu anadikhira kukhala pa dziko yapantsi kwenda na kwenda, anakwanisambo kucemera Yahova ninga “Baba.” Yahova asaapasa umaso, na mwaufuni asakwanirisa pifuno pya alambiri ace onsene. Pakumala kukhala aungwiro na kupangiza kukhulupirika kwawo pa mayesero akumalisa, ale anadikhira kukhala pa dziko yapantsi, anadzacemerwa ana a Mulungu munjira yakukwana.​—Arom. 8:21; Apok. 20:7, 8.

5, 6. Ndi muoni upi wadidi wakuti anyakubala anakwanisa kupasa anawo? Kodi mwana m’bodzi na m’bodzi asafunika kucitanji na muoni unoyu? (Onani cithundzithundzi cakutoma.)

⁵ Anyakubala asapasa anawo muoni wadidi angaapfundzisa kuphembera na kuaphedza kuona Yahova ninga Baba wacitsalakano. M’bale unango wakuti cincino ndi muyang’aniri wa cisa ku Afrika Wakubangwe asakumbuka: “Kubulukira pa ntsiku idabalwa anathu acikazi, ndikhacita phembero na iwo ntsiku zonsene camasiku, kusiyapo ndingabuluka panyumba. Anathu kazinji kene asalonga kuti nee asakumbuka mafala akhalonga ife pa maphembero anewa akhacita ife camasiku. Mbwenye iwo asakumbuka makhaliro adidi, ndzidzi wakupambulika toera kulonga na Baba wathu, Yahova, na mabvero akupfulika na citsidzikizo. Pikhakwanisa iwo kulonga, ndaawangisa toera kuphembera mwakugaluza kuti ndikwanise kubva mafala na mabvero akhapangiza iwo kuna Yahova. Unoyu ukhali ndzidzi wadidi kakamwe toera kudzindikira pya muntima mwawo. Buluka penepo ndaaphedza kuti asafunika kuphatisira mafala a phembero yacitsandzo toera maphembero awo akhale na mabvekero akuthema.”

⁶ Natenepa, ana a m’bale apitiriza kuthambaruka mwadidi mwauzimu. Lero iwo ali akutsandzaya m’mabanja mwawo. Pabodzi na amuna awo asatumikira Mulungu m’basa ya ndzidzi onsene. Anyakubala anakwanisa kupasa anawo muoni ukulu kakamwe​—kukulisa uxamwali wakuwanga na Yahova. Mbwenye mwana m’bodzi na m’bodzi asafunika kutsidzikiza ekhene uxamwali wace na Yahova. Pyenepi pisaphataniza kupfundza kufuna dzina ya Mulungu, na kuitsalakana mwacilemedzo kakamwe.​—Sal. 5:11, 12; 91:14.

‘DZINA YANU MBICENESWE’

7. Ndi mwai upi uli na mbumba ya Mulungu, mphapo mwai unoyu usaphatanizanji?

⁷ Ndi mwai ukulu kakamwe kwa ife kudziwa dzina ya Mulungu na kucita khundu ya ‘mbumba inacemerwa na dzinace.’ (Mach. 15:14; Iza. 43:10) Ife tisaphemba Baba wathu wakudzulu: ‘Dzina yanu mbiceneswe.’ Tisaphembambo Yahova kuti atiphedze toera kucalira kucita peno kulonga cinthu cakuti mbicidapswipisa dzinace yakucena. Ife nkhabe funa kukhala ninga anthu anango a pyaka dzana yakutoma akuti nee akhaphatisira pikhapfundzisa iwo. Mpostolo Paulu aalembera tenepa: ‘Dzina ya Mulungu isanyoziwa pakati pa anthu akunja thangwi ya imwe.’​—Arom. 2:21-24.

8, 9. Perekani citsandzo cinapangiza kuti Yahova asapasa nkhombo ale anafuna kucenesa dzinace.

⁸ Ife tisacita pyonsene pinakwanisa ife toera kucenesa dzina ya Mulungu. Pidamala kufa mamunace, mulongo unango wa ku Noruega asala na mwana wa pyaka piwiri pyakubalwa. Iye alonga: “Ukhali ndzidzi wakunentsa kakamwe mu umaso wanga. Ndikhaphembera ntsiku zonsene, ndzidzi onsene toera ndikhale na mphambvu yakukhala na maonero akulinganira toera ndikhonde kupasa mwai Sathani wa kuxola Yahova thangwi ya kucita cisankhulo cakusowa ndzeru peno kusowa cikhulupiro. Ndikhafuna kucenesa dzina ya Yahova, na ndikhafuna kuti mwananga aone pontho babace mu Paradizu.”​—Mis. 27:11.

⁹ Kodi Yahova atawira maphembero ace? Inde. Mulongo unoyu atambira ciphedzo thangwi ya kusonkhana ndzidzi onsene na abale na alongo. Pidapita pyaka pixanu, iye amanga banja na nkulu wa mpingo. Mwanace cincino ali na pyaka 20 pyakubalwa, iye ndi wakubatizwa. Iye alonga: “Ndiri wakutsandzaya kakamwe thangwi mamunanga andiphedza kukuza mwananga.”

10. Ninji pinafunika toera dzina ya Mulungu iceneswe mwakukwana?

¹⁰ Ninji pinafunika toera dzina ya Mulungu iceneswe mwakukwana na ikhonde kuxolwa? Toera pyenepi picitike, Yahova anadzafudza onsene akuti mwanyakhomo asakhonda utongi wace ukulu. (Lerini Ezekyele 38:22, 23.) Pa ndzidzi unoyu, anthu anadzakhala aungwiro, onsene kudzulu na pa dziko yapantsi anadzalambira Yahova. Pyonsene pinafuna kunyerezera iwo, kulonga na kucita pinadzapasa cilemedzo dzina yakucena ya Mulungu. Buluka penepo, Babathu waufuni wakudzulu anadzakhala ‘pinthu pyonsene kwa onsene.’​—1 Akor. 15:28.

‘UMAMBO WANU MBUDZE’

11, 12. Mu caka 1876, Yahova aphedza mbumba yace toera kubvesesanji?

¹¹ Yezu mbadzati kubwerera kudzulu, apostolo ace abvundza: ‘Mbuya, ndi ntsiku zino zinafuna imwe kukhazikisa umambo kwa Israele?’ Ntawiro wa Yezu wapangiza kuti nee ukhali ndzidzi toera kudziwa ntsiku yakuti Umambo wa Mulungu mbudatoma kutonga. Yezu apanga anyakupfundzace toera kuikha manyerezero ku basa yakufunika kakamwe yakumwaza mphangwa yakuti iwo akhafunika kuicita. (Lerini Machitiro 1:6-8.) Kusiyapo pyenepi, Yezu apfundzisa atowereri ace toera kuphembera kuti Umambo wa Mulungu udze. Natenepa, kubulukira mu ndzidzi wa apostolo, Akristu asapitiriza kucita phembero ineyi.

¹² Mu ndzidzi wakuti Yezu akhali cifupi toera atome kutonga kudzulu mu Umambo wa Mulungu, Yahova aphedza mbumba yace toera kubvesesa ndzidzi wakucitika kwa pinthu pyenepi. Mu caka 1876, Charles Taze Russel alemba nsolo wakuti “Tempos dos Gentios: Quando Terminam?,” mbupangiza caka 1914 ninga caka cakufunika. Nsolo unoyu walandanisa ‘midzidzi minomwe’ inalongwa mu profesiya ya Danyele na ‘kumala kwa midzidzi ya ajentiyu’ idalongwa na Yezu.a​—Dan. 4:16; Luka 21:24.

13. Ninji pidacitika mu caka 1914? Mphapo pinacitika pa dziko kutomera mu caka ceneci pisapangizanji?

¹³ Mu caka 1914, yatoma nkhondo ku Europa—nkhondo ineyi yamwazika mbiphataniza madziko onsene. Pidamala nkhondo ineyi mu caka 1918, kwaoneka njala na muliri wa nyampwanda udapha anthu azinji kupiringana ale adafa pa nkhondo. Natenepa, ‘cidzindikiro’ cidalonga Yezu toera kupangiza kukhazikiswa kwace kwakukhonda oneka ninga Mambo mupswa wa dziko yapantsi catoma kukwanirisika. (Mat. 24:3-8; Luka 21:10, 11) Pidzindikiro pizinji pisapangiza caka 1914 ninga ndzidzi ‘udapaswa nthimba’ Mbuya Yezu Kristu. ‘Iye aenda kakunda anyamalwa ace toera kukwanirisa kukunda kwace.’ (Apok. 6:2) Iye acenesa kudzulu mu kucita nkhondo na Sathani pabodzi na mademonyo ace, mbaaponya pa dziko yapantsi. Kubulukira pa ndzidzi unoyu, anthu asaona undimomwene wa mafala awa akupumirwa: ‘Dzedze yafika pantsi pano na ku bara thangwi Dyabo atcitha kuli imwe mbakhala na ukali wakugopswa, mbadziwambo kuti ndzidzi wace ndi ung’ono basi.’​—Apok. 12:7-12.

14. (a) Thangwi yanji tisapitiriza kuphembera kuti Umambo wa Mulungu udze? (b) Ndi basa ipi isafunika ife kuicita cincino?

¹⁴ Profesiya idalembwa pa Apokalipse 12:7-12 isafokotoza thangwi yanji kukhazikiswa kwa Umambo wa Mulungu kwacitika mu ndzidzi ubodzi ene udatoma nyatwa zakuti zisapitiriza kuthabusa anthu. Maseze Yezu akutonga kudzulu, Sathani akupitiriza kutonga pa dziko yapantsi. Natenepa, ife tinapitiriza kuphemba kuti Umambo wa Mulungu udze mpaka Yezu kukunda anyamalwa ace na kufudza anyakuipa pa dziko yapantsi. Mpaka ndzidzi unoyu, tisafunika kukhala maso mwakubverana na maphembero anewa na kupitiriza kukhala aphinga m’basa yakumwaza mphangwa za Umambo. Yezu alonga mwanyapantsi: ‘Mphangwa zadidi za Umambo zinadzamwazwa pa dziko yonsene, toera ukhale umboni kwa anthu a mitundu yonsene. Pingamala ipi, unadzabwera ndzidzi wa kumalisiratu pyonsene.’​—Mat. 24:14.

‘PINAFUNA IMWE MBAPICITWE PANTSI PANO’

15, 16. Tinakhala tani maso mwakubverana na phembo yakuti cifuno ca Mulungu cicitwe pa dziko yapantsi?

¹⁵ Mu pyaka 6.000 nduli, cifuno ca Mulungu cikhacitwa mwakukwana pa dziko yapantsi. Thangwi yace Yahova mbadakwanisa kulonga kuti pinthu pyonsene pikhadacita iye pikhali ‘pyadidi maningi.’ (Gen. 1:31) Buluka penepo Sathani apanduka, kutomera pa ndzidzi unoyu anthu azinji nee asacita cifuno ca Mulungu pa dziko yapantsi. Mbwenye lero, tiri na mwai wakukhala mu ndzidzi wakuti Mboni zakukwana mamiliyau masere asaphembera kuti cifuno ca Mulungu cicitwe pantsi pano. Iwo asawangisira toera kukhala maso mwakubverana na phembero ineyi. Iwo asacita pyenepi kubulukira m’makhaliro awo na kukhala aphinga m’basa yakucita anyakupfundza.

¹⁶ Mwacitsandzo, mulongo unango adabatizwa mu caka 1948 wakuti atumikira ninga misionaryo ku Afrika alonga: “Mwakubverana na phembero yacitsandzo, ndisaphembera kazinji kene toera anthu akulandana na mabira amwazirwe mphangwa na kuphedzwa toera kudziwa Yahova ndzidzi mbuciripo. Pontho, ndingafuna kumwazira mphangwa munthu, ndisaphemba udziwisi toera kukhuya ntima wace. Kwa anthu akulandana na mabira adagumanika kale, ndisaphemba Yahova toera apase nkhombo kuwangisira kwathu toera kuatsalakana.” Mulongo unoyu wa pyaka 80 pyakubalwa apembera kakamwe mu utumiki wace, na ciphedzo ca anango, iye aphedza anthu azinji toera kukhala Mboni za Yahova. Mwakukhonda penula, imwe musadziwambo anthu anango a citsandzo cadidi akuti asaperekeka toera kucita cifuno ca Mulungu mwakukhonda tsalakana kugwesera kwawo.​—Lerini Afilipi 2:17.

17. Musapibva tani munganyerezera pinafuna kucita Yahova mu ndzidzi wakuti cifuno cace cinadzacitwa mwakukwana pantsi pano?

¹⁷ Mpaka kufudzwa kwa anyamalwa a Umambo wa Mulungu pa dziko yapantsi, ife tinadzapitiriza kuphembera kuti cifuno ca Mulungu cicitwe. Buluka penepo, cifuno ca Mulungu cinadzacitwa mwakukwana mu ndzidzi wakuti pikwi na pikwi pya anthu anadzalamuswa muli akufa mu paradizu pa dziko yapantsi. Yezu alonga: ‘Lekani kudzuma na ipyo thangwi unadzafika ndzidzi wakuti anthu onsene anagona mu nthumbi anadzabva fala yanga. Penepo iwo anadzalamuka.’ (Jwau 5:28, 29) Pinadzakhala pyakutsandzayisa kakamwe kukhala maso toera kutambira anyakufunika athu adafa! ‘Mulungu anadzapukuta misozi yonsene m’maso mwathu.’ (Apok. 21:4) Mwa anyakulamuswa muli akufa, azinji ndi “anyakuipa” akuti afa mbadzati kudziwa undimomwene wa Yahova na wa Mwanace. Unadzakhala mwai kupfundzisa anthu anewa pya cifuno ca Yahova toera akwanise kukhala na ‘umaso wakukhonda mala.’​—Mach. 24:15; Jwau 17:3.

18. Ndi pinthu pipi pyakufunika kakamwe kwa anthu?

¹⁸ Ntendere na kubverana kwa dziko yonsene pisanyindira kuceneswa kwa dzina ya Yahova mu kuphatisira Umambo wa Mulungu. Natenepa, kutawirwa kwa maphembo matatu a phembero yacitsandzo, kunadzakwanirisa pifuno pikulu pya anthu. Mbudzati kufika ndzidzi unoyu, tiri na pifuno pinango pikulu pinai pinalongwa mu phembero ineyi ya Yezu. Tinadzadinga pyenepi mu nsolo unatowerera.

[Cidzindikiro capantsi]