Tinakwanisadi Kukomeresa Mulungu?

Panango mwaleri kale pya anthu analongwa mwakusimbwa m’Bhibhlya mbamulonga mwekhene, ‘Ine nkhabe kwanisa kukhala ninga iwo!’ Panango mwanyerezera, ‘Nee ndine waungwiro peno waulungami na mwandimomwene ndzidzi onsene nkhabe kwanisa kucita pyadidi.’

Yobe asalongwa ninga “munthu wadidi na wa ulinganiri.” (Yobe 1:1) Loti akhacemerwa “munthu wakulungama.” (2 Pedro 2:8) Dhavidhi asalongwa kuti ‘akhacita pinafuna’ Mulungu. (1 Amambo 14:8) Mbwenye, tendeni tidinge umaso wa anthu anewa analongwa m’Bhibhlya. Tinadzaona kuti (1) iwo acita madawo, (2) tinakwanisa kupfundza pizinji kubulukira ku citsandzo cawo na (3) anthu akusowa ungwiro anakwanisadi kukomeresa Mulungu.

IWO ACITA MADAWO

Yobe atamba nyatwa zizinji zakuti zikhaoneka ninga zakusowa mathangwi. Iye akhali na maonero akudawika mbanyerezera kuti Mulungu nkhabe kuntsalakana maseze Ankhulupire peno nkhabe. (Yobe 9:20-22) Yobe akhali na cinyindiro ca ulungami wace kwakuti kwa anango pikhaoneka ninga iye akhali wakulungama kakamwe kupiringana Mulungu.​—Yobe 32:1, 2; 35:1, 2.

Loti anyinyirika kucita cisankhulo cadidi na cakukhonda nentsa. Iye akhatsukwala kakamwe thangwi yaulukwali ukhacitwa na anthu a mu Sodoma na Gomora, ngakhale ‘kupswipa ntima’ thangwi ya makhaliro awo. (2 Pedro 2:8) Mulungu alonga kuti akhafuna kufudza mizinda ineyi yakuipa na kupulumusa Loti pabodzi na banjace. Panango munakwanisa kunyerezera kuti Loti wakuti akhanentseka mbadakhala wakutoma kuthawa. Mu ndzidzi unoyu wakufunika iye adzakhala wakudembuka. Aanju adatumwa toera kudzapulumusa iye na banjace acita kuaphata manja toera kuabulusa kunja kwa nzinda kuti akhale akutsidzikizika.​—Genesi 19:15, 16.

Dhavidhi ndzidzi unango apangiza kukhonda kudzitonga mbacita upombo na nkazi mwanaciro. Mwakutsukwalisa, mukufuna kuphimbira madawo, Dhavidhi acitisa kuti mamuna wa nkazi unoyu aphiwe. (2 Samwele, kapitulu 11) Bhibhlya isalonga kuti ‘Yahova aipirwa kakamwe na pidacita Dhavidhi.’​—2 Samwele 11:27.

Yobe, Loti na Dhavidhi, onsene acita madawo, anango akhali madawo makulu kakamwe. Mbwenye ninga pinafuna kudinga ife, na ntima onsene iwo akhali na cifuno cakutumikira Mulungu mwakubvera. Iwo akhali na cifuno cikulu cakupangiza kuti atcinyuka na kusasanyira madawo awo. Natenepa, Mulungu aatawira, pontho m’Bhibhlya yonsene iwo asalongwa ninga akukhulupirika.

TINAPFUNDZANJI?

Ninga anthu akusowa ungwiro, ife nkhabe kwanisa kucalira madawo. (Aroma 3:23) Mbwenye tingaacita, tisafunika kutcinyuka na kucita pinakwanisa ife toera kusasanyira pinthu.

Kodi Yobe, Loti na Dhavidhi asasanyira tani madawo awo? Yobe akhali wakukhulupirika muntima mwace. Pidamala iye kulonga na Mulungu, Yobe asasanyira manyerezero ace akuphonyeka mbatcinyuka thangwi ya pidalonga iye. (Yobe 42:6) Maonero a Loti thangwi ya makhaliro aulukwali a anthu a mu Sodoma na Gomora akhali akubverana na midida ya Mulungu. Kudawa kwace kukhali kukhonda cita pinthu mwakucimbiza pa ndzidzi ukhafuna iye kupulumuswa. Pakumalisira iye athawa mizinda ikhafuna kufudzwa mbacalira kutonga kwa Mulungu. Mwakubvera iye nee ayang’ana nduli mukunyerezera pinthu pidasiya iye. Maseze Dhavidhi acita madawo makulu mu kuswa mwambo wa Mulungu, iye apangiza pikhali muntima mwace mu kutcinyuka na ntima onsene mbaphemba kulekererwa na Mulungu.​—Masalmo 51.

Maonero adidi a Mulungu kwa amuna anewa ndi akubverana na pinadikhira iye kuna anthu akusowa ungwiro. Mulungu ‘asadziwa kuti tacitwa nanji; asakumbuka kuti ndife mataka.’ (Masalmo 103:14) Mphapo, khala Mulungu asadziwa kuti tinacimwana kucalira madawo, asadikhiranji kuna ife?

KODI ANTHU AKUSOWA UNGWIRO ANAKOMERESA TANI MULUNGU?

Uphungu wa Dhavidhi kuna mwanace Salomoni usatipasa maonero akuti tinakomeresa tani Mulungu. ‘Iwe Salomoni, mwananga, dziwa Mulungu wa babako mbuntumikira na ntima wako onsene.’ (1 Pya dziko ya Israele 28:9) Kodi ntima onsene ninji? Ndi ntima wakufuna Mulungu na wakutonga kudziwa cifuno cace na kucicita. Ntima unoyu nee ndi waungwiro, mbwenye ndi ntima wakufuna kutumikira Mulungu mwakubvera, pontho wakutawira kusandikwa. Thangwi ya kufuna kwawo Mulungu na cifuno cakubvera, Mulungu aona Yobe ninga ‘wakusowa madawo,’ Loti ninga “wakulungama” na Dhavidhi ninga ‘nyakucita pikhafuna’ Mulungu. Maseze acita madawo, iwo akwanisa kukomeresa Mulungu.

Natenepa khala tiri na manyerezero akudawika akuti nee tikhafunika kukhala nawo, kulonga cinthu cakuti catipasa manyadzo, peno tadzindikira kuti tadawa, tisafunika kupfundza kubulukira ku pitsandzo pidadinga ife. Mulungu asadziwa kuti cincino ife nkhabe kwanisa kucita pinthu mwaungwiro. Mbwenye, iye asadikhira kuti tinfune na tiwangisire kumbvera. Tingabvera na ntima onsene, tinakwanisa kukhala na cinyindiro cakuti tinakomeresambo Mulungu.

[Ntsonga ikulu pa tsamba 13]

Mulungu ‘asadziwa kuti tacitwa nanji; asakumbuka kuti ndife mataka.’​—Masalmo 103:14

[Ntsonga ikulu pa tsamba 14]

Ntima onsene ndi wakufuna kucita cifuno ca Mulungu na usakulumizwa na cifuno cikulu ca kuntumikira mwakubvera