Musadzudzumika Kuti Mbani Anaona Basa Yanu?
BESALELE na Olyabu akhadziwa basa yakumanga nyumba. Ninga mabitcu ku Ejito, iwo akhadacita njerwa zizinji kakamwe. Mbwenye pyenepi akhadapicita kale kakamwe. Cincino, iwo mbadadzakhala amisiri adidi kakamwe mudaphembwa iwo toera kutsogolera basa yakumanga tabernakulu. (Eks. 31:1-11) Ngakhale tenepo, si azinji tayu akhafuna kuona mabasa akudzumisa akhafuna kucita iwo. Kodi iwo mbadafewa manungo thangwi yakukhonda kusimbwa? Kodi akhafunika kudzudzumika kuti mbani akhaona basa yawo? Kodi imwe musadzudzumika kuti mbani asaona basa yanu?
PINTHU PYAKUBALIKA KAKAMWE PIDAONIWA NA ANTHU AKUCEPA
Pyombo pinango pya mu tabernakulu pikhali pyakubalika kakamwe. Mwacitsandzo, nyerezerani pya akerubi andalama akhali padzulu pa bokosi ya cibverano. Mpostolo Paulu aalonga kuti akhali “ambiri.” (Aheb. 9:5) Nyerezerani kudzumisa kwa pithundzithundzi pyenepi pyakucitwa na ndalama yakumenywa na nyundu!—Eks. 37:7-9.
Mbidakhala ndi ndzidzi uno, pinthu pidacita Beselele na Olyabu mbapidathema kupangizwa m’mbuto zakubvekera munakoyiwa pinthu pyakale [museus], toera kuoniwa na anthu azinji. Mbwenye ndi angasi adakwanisa kuona kubalika kwa pinthu pyenepi mu ndzidzi udacitwa ipyo? Akerubi akhakhala M’mbuto Yakucena Kakamwe; natenepa, iwo akhaoniwa kabodzi basi pacaka na nyantsembe wankulu pikhapita iye mwenemu pa Ntsiku Yakuphimbira Madawo. Munjira ineyi, si azinji tayu adaaona.
KUKOMERWA, MASEZE NKHABE KUSIMBWA NA ANANGO
Nyerezerani kuti ndimwe Beselele peno Olyabu. Imwe mwaphata basa yakuwanga toera kusasanya pinthu pyakubalika kakamwe, mbamudabva tani mungadziwa kuti si azinji tayu akhafuna kupiona? Lero, anthu azinji asawanga manungo angasimbwa na kudzumiwa na andzawo. Kwa iwo, kusimbwa ndi ninga termômetro toera kupima ntengo wa mabasa awo. Mbwenye atumiki a Yahova ndi akusiyana. Ninga Beselele na Olyabu, ife tisakomerwa kucita cifuno ca Yahova na kukhala akutawirika kwa iye.
Pikhali Yezu pa dziko yapantsi, atsogoleri a mauphemberi akhali na nsambo wakucita maphembero munjira yakudzumisa anango. Mbwenye Yezu apangiza njira yakusiyana: Kucita phembero yakubulukira muntima mwakukhonda kukhala na cifuno cakusimbwa na anyakubvesera. Ninga maphindu, ‘Baba wanu anaona ncibisobiso anadzakubwezerani.’ (Mat. 6:5, 6) Mwandimomwene, cinthu cakufunika kakamwe si pinanyerezera anango thangwi ya maphembero athu tayu, mbwenye pinanyerezera Yahova. Maonero ace ndiwo anacitisa maphembero athu kukhala a ntengo. Pyenepi ndi sawasawa na cinthu consene cinacita ife m’basa yathu yakucena. Basa yathu nee isakhala na ntengo thangwi ya kusimbwa na anango, mbuto mwace basa ineyi isasimba Yahova, ule ‘anaona mwacibisobiso.’
Pidamala kumangwa tabernakulu, khole ‘yagudumira nsasa wa kusonkhanira, mbiri ya Yahova yadzala mu tabernakulu.’ (Eks. 40:34) Mwakukhonda penula, pyenepi pyapangiza kutawira kwa Yahova! Musanyerezera kuti ndi mabvero api adakhala na Beselele na Olyabu pa ndzidzi unoyu? Maseze madzina awo nee akhadalembwa pa pinthu pidacita iwo, mwandimomwene iwo akomerwa kudziwa kuti Mulungu apasa nkhombo kuwangisira kwawo konsene. (Mis. 10:22) Mu pyaka pidatowerera, mitima yawo ikhakomerwa pikhaona iwo mabasa awo mbakaphatisirwa m’basa ya Yahova. Angadzalamuka muli akufa mu dziko ipswa, mwakukhonda penula, Beselele na Olyabu anadzakomerwa kakamwe kudziwa kuti tabernakulu yaphatisirwa mu ulambiri wakucena mu pyaka 500!
Lero, mu gulu ya Yahova abale na alongo a maluso akulemba pithundzithundzi, kuimba nyimbo, akubulusa mafoto, athumburuzi, na anyakulemba mabukhu—onsene asaphata mabasa awo mwakukhonda dziwika. Munjira ineyi, nkhabe “anaona” pinacita iwo. Pyenepi ndi sawasawa na mabasa mazinji anacitwa m’mipingo yakupiringana 110.000 pa dziko yonsene. Mbani anaona ntumiki anatsalakana makobiri a mpingo mu ndzidzi unalemba iye matsamba akufunika pakumala kwa nthanda? Mbani anaona mulembi wa mpingo mu ndzidzi unakhunganya iye lipoti ya basa ya m’munda? Mbani anaona m’bale peno mulongo mu ndzidzi unacita iye mabasa akusasanyira Nyumba ya Umambo?
Kunkhomo kwa umaso wawo, Beselele na Olyabu nee apaswa miyoni, mikufu, peno pidzindikiro toera kupangiza mabasa awo akudzumisa na kubalika kwa pinthu pidamanga iwo. Mbwenye iwo akhala na cinthu ca ntengo ukulu kakamwe—kutawirwa na Yahova. Ife tiri na cinyindiro cakuti Yahova aona mabasa awo. Tendeni titowezere citsandzo cawo cakuphata basa mwakucepeseka na kuperekeka.