Pitirizani Kudikhira!
“Maseze adembuke, pitiriza kudikhira.”—HAB. 2:3, Tradução do Novo Mundo.
NYIMBO: 32, 45
MUNATAWIRA TANI?
Ndi mathangwi api ali na ife toera kunyindira kuti tikukhala mu ntsiku zakumalisa?
Maseze panango tatoma kale kudikhira, thangwi yanji nee tisafunika kubwerera nduli?
Tinapangiza tani kuti tisapitiriza kudikhira kumala kwa makhaliro ano a pinthu?
1, 2. Ndi makhaliro api anapangiza atumiki a Yahova kutomera kale?
ATUMIKI a Yahova atoma kale kudikhira kukwanirisika kwa maprofesiya a Bhibhlya. Mwacitsandzo, Yeremiya adikhira kuti nzinda wa Yuda mbudafudzwa, iwo wafudzwa na Abhabhilonya mu caka 607 M.N.W. (Yer. 25:8-11) Izaiya apumirwa toera kulonga mwanyapantsi kuti Ayuda adaendeswa ku ubitcu mbadabwerera. Iye alonga: “Anyakutsandzaya ndi ale anapitiriza kundikhira.” (Iza. 30:18, NM) Maprofesiya a Mikeya akhalonga pya atumiki a Mulungu. Iye apangiza kutonga kwace: ‘Ine ndinadzapitiriza kudikhira Yahova.’ (Mik. 7:7) Mu pyaka pizinji, atumiki a Mulungu akhadikhirambo kukwanirisika kwa maprofesiya analonga pya Mesiya peno Kristu.—Luka 3:15; 1 Ped. 1:10-12.a
2 Lero, atumiki a Mulungu asapitirizambo kudikhira, thangwi maprofesiya analonga pya Mesiya asapitiriza kukwanirisika. Mukuphatisira Umambo Waumesiya, mwakukhonda dembuka, Yahova anadzamalisa nyatwa za anthu mu kufudza anyakuipa na kupulumusa atumiki ace mu dziko ino yakuti iri m’manja mwa Sathani. (1 Jwau 5:19) Natenepa, tisafunika kupitiriza kucita pyonsene pinakwanisa ife toera kukhala akukhunganyika, mbatidikhira kuti ntsiku ya Yahova inafika mwakukhonda dembuka.
3. Khala tatoma kale kudikhira, ndi mbvundzo upi wakuti panango tinaucita?
3 Ninga atumiki a Yahova, tisafuna kakamwe kuti cifuno ca Mulungu ‘cicitwe pa dziko yapantsi ninga kudzulu.’ (Mat. 6:10) Mbwenye khala tatoma kale kudikhira, panango tinatoma kunyerezera: ‘Thangwi yanji tisafunika kupitiriza kudikhira kuti kumala kunafika mwakukhonda dembuka?’ Tendeni tidinge pyenepi.
THANGWI YANJI TISAFUNIKA KUPITIRIZA KUDIKHIRA?
4. Ndi ipi thangwi yakutoma iri na ife toera kupitiriza kudikhira?
4 Bhibhlya isapangiza pakweca makhaliro anafunika ife kupangiza lero, mu ndzidzi wakuti makhaliro ano a pinthu ali dhuzi na kufudzwa. Yezu apanga anyakupfundzace toera ‘kupitiriza kukhala dzololo’ na ‘kupitiriza kukhala maso.’ (Mat. 24:42; Luka 21:34-36) Anewa ndi mathangwi adidi kakamwe toera kupitiriza kudikhira, thangwi Yezu atipanga kuti tisafunika kucita pyenepi! Na thangwi ineyi, gulu ya Yahova isapitiriza kutikumbusa kuti tisafunika ‘kudikhira na kukumbuka mwadidi ntsiku ya Yahova’ na kuikha cidikhiro cathu ku dziko ipswa idapikira Mulungu.—Lerini 2 Pedro 3:11-13.
5. Thangwi yanji tisafunika kakamwe kukhala dzololo mu ndzidzi uno?
5 Maseze Akristu a pyaka dzana yakutoma akhafunika kupitiriza kudikhira ntsiku ya Yahova, lero mphyakufunikambo kakamwe kwa ife. Thangwi yanji? Thangwi tikukhala mu ntsiku yakuonekera kwa Kristu. Cidzindikiro cakuonekera kwace cisaoneka pakweca kutomera mu caka 1914. Kutekera kwa makhaliro a dziko na kumwazwa kwa mphangwa pa dziko yonsene, ndi cipangizo cakuti tikukhala mu ndzidzi wa ‘kumala kwa makhaliro ano a pinthu.’ (Mat. 24:3, 7-14) Yezu nee alonga kuti ndi ndzidzi ungasi unafuna dikhira ife kumala mbakudzati fika, natenepa, tisafunika kukhala dzololo nee kuodzira.
6. Thangwi yanji tisadikhira kuti makhaliro a dziko anapitiriza kutekera mu ndzidzi wakuti kumala kuli cifupi?
6 Mbwenye panango tinabvundza: Kodi ‘kumala kwa makhaliro ano a pinthu’ kusabveka ndzidzi wantsogolo wakuti makhaliro a dziko anadzatekera kakamwe? Mwandimomwene, Bhibhlya isapangiza kuti uipi unadzathimizirika kakamwe mu “ntsiku zakumalisa.” (2 Tim. 3:1, 13; Mat. 24:21; Apok. 12:12) Natenepa, tisadikhira kuti makhaliro akuipa a dziko anapitiriza kutekera.
7. Lemba ya Mateo 24:37-39 isapangizanji thangwi ya makhaliro a dziko mu ntsiku zakumalisa?
7 Anango mbadanyerezera kuti ‘nyatwa ikulu’ mbidzati kufika, makhaliro akuipa anatekera kakamwe mbizioneka nkhondo m’madziko onsene, anthu onsene mbathabuka na mautenda peno njala. (Apok. 7:14) Pyenepi mbapidacitika, ale anapenula pyonsene panango mbadatawira kuti profesiya ya Bhibhlya ikukwanirisika. Mbwenye Yezu alonga kuti anthu azinji nee mbadadzindikira cipangizo cakuonekera kwace, mbadzudzumika na mabasa a ntsiku na ntsiku mpaka ndembulembu kakamwe. (Lerini Mateo 24:37-39.) Natenepa, Bhibhlya nee isapangiza kuti mu ntsiku zakumalisa makhaliro a dziko mbadatekera kakamwe kwakuti anthu mbadakakamizika toera kutawira kuti kumala kuli cifupi.—Luka 17:20; 2 Ped. 3:3, 4.
8. Ninji pinaoneka pakweca kwa ale anabvera uphungu wa Yezu wa kupitiriza “kukhala dzololo”?
8 Munjira inango, cidzindikiro cidapereka Yezu cikhafunika kuoneka pakweca toera kuphedza ale akuti mbadapitiriza kubvera uphungu wa Yezu wa kupitiriza “kukhala dzololo.” (Mat. 24:27, 42) Ndi pyenepi pinacitika kutomera mu caka 1914. Kubulukira mu caka ceneci mpaka lero, cidzindikiro cakuonekera kwa Yezu cikukwanirisika. Mwandimomwene, lero tikukhala mu ndzidzi ‘wakumala kwa makhaliro ano a pinthu’—ndzidzi wakucepa mpaka kufudzwa kwa makhaliro ano akuipa.
9. Ndi api mathangwi ali na ife toera kudikhira kumala kwa makhaliro ano a pinthu?
9 Mphapo, thangwi yanji lero Akristu asafunika kupitiriza kudikhira? Thangwi ife tisabvera Yezu Kristu. Pontho tisadzindikira cipangizo cakuonekera kwace. Kudikhira kwathu nee kusabveka kuti tiri na cipendamiro cakukhulupira pyonsene, mbwenye tiri na mathangwi akuwanga a Bhibhlya anatikulumiza toera kukhonda bwerera nduli, kucalira kuodzira, mbatidikhira kumala kwa makhaliro ano akuipa a pinthu.
MPAKA LINI?
10, 11. (a) Thangwi yanji Yezu apanga anyakupfundzace toera kukhala maso? (b) Yezu apanga anyakupfundzace toera kucitanji angaona kuti kumala kuli kudembuka mwakusiyana na pikhanyerezera iwo? (Onani cithundzithundzi cakutoma.)
10 Azinji a ife asatumikira Yahova mu pyaka pizinji mbadikhira na ntima onsene kufika kwa ntsiku yace. Mbwenye mwakukhonda tsalakana ndzidzi udatoma ife kudikhira, tisafunika kupitiriza kudikhira kuti ntsiku ineyi inafika. Kumbukani pidacenjeza Yezu anyakupfundzace: ‘Cenjerani mphapo, mukhale dzololo, mbamucita maphembero, thangwi nee musadziwa kufika kwa ndzidzi unoyu. Ndi ninga munthu adacita ulendo mbasiya nyumba yace na anyabasa ace, mbapasa nyabasa m’bodzi na m’bodzi basa yace, mbapanga muoneri wa nsuwo kuti acenjere. Natenepa, pitirizani kuyang’anira, thangwi nee musadziwa ndzidzi unadzabwera mwanaciro nyumba, peno anadzabwera namaulo, peno tcititciti, peno m’madzongwe, peno pa kuca kunja namacibese. Citani mpholemphole gopa iye angabwera mwakukhonda dikhira, anakugumanani mukugona. Pinakupangani ine, ndinapipangambo anthu onsene: Khalani maso.’—Mko. 13:33-37.
11 Pidamala iwo kudzindikira kuti Yezu atoma kutonga mu caka 1914, atowereri a Yezu abvesesa kuti kumala kunafika mwakukhonda dembuka. Natenepa, iwo apangiza kukhunganyika kwawo mu kuthimizira basa yakumwaza mphangwa. Yezu apangiza kuti panango mbadafika mwakudembuka, ‘tcititciti, peno m’madzongwe, peno pa kuca kunja namacibese.’ Mbapidacitika munjira ineyi, kodi atowereri a Yezu akhafunika kucitanji? Yezu alonga: ‘Khalani maso.’ Natenepa, maseze kuti panango tatoma kale kudikhira, nee pisabveka kuti kumala kuciri kutali peno kuti nee kunafika mu ndzidzi wathu.
12. Kodi Habakuki abvundzisanji kuna Yahova, mphapo Mulungu antawira tani?
12 Nyerezerani pya mprofeta Habakuki adapaswa basa yakulonga mwanyapantsi kufudzwa kwa Yerusalemu. Pa ndzidzi udatoma iye basa ineyi, pikhadalongwa kale kuti nzinda unoyu mbudafudzwa. Makhaliro akhadatekera kwakuti ‘anthu akuipa akhatcinga anthu adidi, ulinganiri mbukhonda kuonekabve.’ Natenepa, si pyakudzumisa tayu kuti Habakuki abvundza: ‘Mpaka lini ndinadembetera ciphedzo canu Yahova?’ Mbuto mwakupangiza ntsiku yakumala kwa nyatwa, Yahova apasa cinyindiro mprofeta Habakuki kuti kufudzwa kwa nzinda nee ‘mbakudadembuka.’ Mulungu apanga Habakuki toera ‘kupitiriza kudikhira.’—Lerini Habakuki 1:1-4; 2:3.
13. Ndi manyerezero api akuti Habakuki mbadakwanisa kukhala nawo? Thangwi yanji pyenepi pikhali pyakusowa ndzeru?
13 Nyerezerani kuti Habakuki afewa manungo mbanyerezera: ‘Ndatoma kale maningi kubva pya kufudzwa kwa Yerusalemu. Kodi kumala nee kuciri kutali? Si pyakuthema tayu kupitiriza kudziwisa profesiya ineyi khala nzinda nee unafudzwa mwakucimbiza. Anango anacitambo basa ineyi.’ Mbadakhala na manyerezero anewa, Habakuki mbadaluza uxamwali wace na Yahova, pontho mbadaluza umaso wace pakufudzwa kwa Yerusalemu na Abhabhilonya!
14. Thangwi yanji tinadzapereka takhuta kuti Yahova aticenjeza toera kupitiriza kudikhira ndzidzi wakumala?
14 Mu dziko ipswa, tinadzakhala na mathangwi toera kunyerezera mwacidikhodikho kuti maprofesiya onsene analonga pya ntsiku zakumalisa akwanirisika ninga mudapikira Yahova. Kunyerezera pyenepi mu dziko ipswa, kunadzawangisa cinyindiro cathu cakuti Yahova anadzakwanirisambo mapikiro ace adasala. (Lerini Yoswa 23:14.) Mwandimomwene, tinadzapereka takhuta kuna Mulungu wakuti ndiye anadziwa ‘ntsiku na midzidzi idakhazikisa iye,’ mbatiphemba toera tikhale maso mbatidziwa kuti ‘kumala kwa pyonsene kuli cifupi.’—Mach. 1:7; 1 Ped. 4:7.
KUDIKHIRA SI KUFUNYA MANJA TAYU!
15, 16. Thangwi yanji tisafunika kuthimizira basa yathu yakumwaza mphangwa mu ndzidzi uno?
15 Tisadikhira kuti gulu ya Yahova inadzapitiriza kutikumbusa kuti tisafunika kucita pinthu mwakucimbiza mu ndzidzi unatumikira ife Mulungu. Macenjezo anewa nee asaperekwa toera tipitirize kucita pizinji m’basa ya Mulungu, mbwenye toera kutiphedza kuti tipitirize kudzindikira kuti cipangizo cakuonekera kwa Kristu cikukwanirisika lero. Natenepa, uno ndi ndzidzi toera kukomeresa Yahova na kumwaza mphangwa zadidi za Umambo mwaphinga!—Mat. 6:33; Mko. 13:10.
16 Mulongo unango alonga: “Tingamwaza mphangwa zadidi za Umambo wa Mulungu, ife . . . tinakwanisa kuphedzera kuombolwa kwa anthu toera apulumuke pakufudzwa kwa dziko ino.” Mulongo unoyu asadziwa mwadidi pya kuombolwa kwa anthu, thangwi mu caka 1945 iye na mamunace apulumuka pa ngozwi ikulu kakamwe ya kulobzweka kwa xitima ya m’madzi yadidi kakamwe ikhacemerwa Wilhelm Gustloff. Pa ndzidzi wakunentsa kakamwe ninga unoyu, munthu mbadakwanisa kupangiza maonero akuphonyeka. Mulongo unoyu asakumbuka nkazi unango adapitiriza kulira: “Mapasta anga! Mapasta anga! Mikufu yanga ine! Mikufu yanga yonsene yasala mu xitima. Ndaluza pinthu pyanga pyonsene!” Mwakusiyana na nkazi unoyu, azinji akhacita ulendo aikha pangozwi umaso wawo mbawangisira toera kuombola andzawo adagwa m’bara ineyi yakutonthola kakamwe. Ninga anthu anewa adacita pyonsene toera kuphedza anango, ife tisacita pyonsene pinakwanisa ife toera kuphedza anthu. Tisapitiriza kucita pyenepi mwakucimbiza, mbatiphedza anango toera kupulumuka pa ngozwi ikulu kakamwe ndzidzi mbuciripo.
17. Ndi mathangwi api ali na ife toera kukhulupira kuti kumala kunafika mwakukhonda dembuka?
17 Makhaliro a dziko asapangiza pakweca kuti profesiya ya Bhibhlya analonga pya ntsiku zakumalisa ikukwanirisika, pontho kuti kumala kwa makhaliro ano akuipa kuli cifupi kakamwe. Natenepa, nee tisafunika kunyerezera kuti ndzidzi uciripo kakamwe mpaka “nyanga khumi” na ‘cinyama peno cikala’ cinalongwa pa Apokalipse 17:16 cisandukire Bhabhilonya Wankulu wakuti ndi mauphemberi onsene authambi. Tendeni tikumbuke kuti Mulungu “anadzaikha m’mitima mwawo” cifuno cakucita pyenepi, ipyo pinacitika mwakucimbiza na mwakukhonda dikhira! (Apok. 17:17) Kumala kwa makhaliro ano a pinthu nee kuli kutali. Na thangwi ineyi, tisafunika kubvera cenjezo ya Yezu: ‘Cenjerani, gopa mitima yanu inadzafewa na kudyesa, na kuledzera, na kutsalakana pya umaso, gopambo ntsiku ineyi ingafika mwakukhonda dikhira inadzakututumusani.’ (Luka 21:34, 35; Apok. 16:15) Tendeni tikhale akutonga kutumikira Yahova na manyerezero akuti ndzidzi udasala ndi wakucepa, mbatinyindira kuti Yahova ‘asacita pinthu toera kuphedza ale anapitiriza kudikhira mwa iye.’—Iza. 64:4.
18. Ndi mbvundzo upi unafuna ife kudinga mu nsolo unatowerera?
18 Munadikhira ife kumala kwa makhaliro ano a pinthu, tendeni tibvere mafala a nyakupfundza Yuda: ‘Anga apantima, khalani akuwanga kubulukira mu cikhulupiro canu cakucena kakamwe! Phemberani mwa nzimu wakucena toera mupitirize mu ufuni wa Mulungu mu ndzidzi unadikhira imwe ntsisi za Mbuya Yezu Kristu mpaka kutambira umaso wakukhonda mala.’ (Yuda 20, 21) Mphapo tinapangiza tani kuti tisakhala maso munjira inapangiza kuti tisadikhira dziko ipswa idapikira Mulungu? Tinadzadinga pyenepi mu nsolo unatowerera.
[Cidzindikiro capantsi]
a Toera kuona ndandanda wa maprofesiya mangasi analonga pya Mesiya na kukwanirisika kwawo, onani tsamba 200 ya bukhu, Kodi Mwandimomwene Bhibhlya Isapfundzisanji?