Nyerezerani Mwacidikhodikho Pinthu Pyauzimu

‘Pyenepi upinyerezere, mbupikumbukira toera kuthambaruka kwako kuoneke pakweca pamaso pa anthu onsene.’​—1 TIM. 4:15.

NYIMBO: 22, 52

MBAMUDATAWIRA TANI?

Pisabvekanji kunyerezera mwacidikhodikho?

Ndi pinthu pipi pingasi pyadidi pyakuti tinakwanisa kupinyerezera mwacidikhodikho?

Ndi api maphindu akunyerezera mwacidikhodikho Mafala a Mulungu ntsiku zonsene?

1, 2. Ninji pinacitisa anthu kukhala akusiyana na pinyama?

CILONGERO cisaphedza anthu toera kuleri, kulemba, kulonga, kubvesesa mafala analongwa, kucita phembero, na kuimba nyimbo zakusimba Yahova. Pinthu pyenepi ndi pyakudzumatirisa, pontho pisaphataniza makhundu a ongo akuti asiyentista adzati kuabvesesa mwakukwana. Na ciphedzo ca makhaliro anewa akupambulika a ongo, tisakwanisa kupfundza cilongero. Mpfundzisi unango wa pilongero alonga: “Luso iri na ana anthu toera kupfundza cilongero ndi cibodzi mwa cipangizo ca makhaliro akupambulika a [anthu].”

² Luso yathu yakuphatisira cilongero ndi muoni udatipasa Yahova. (Sal. 139:14; Apok. 4:11) Yahova atipasambo ongo wakuti ndi muoni wakupambulika unatisiyanisa na pinyama. Anthu acitwa ‘mwakulandana na Mulungu.’ Anthu ali na luso yakusankhula, natenepa, anakwanisa kusankhula kuphatisira cilongero cawo toera kusimba Yahova.​—Gen. 1:27.

3. Ndi muoni upi wadidi kakamwe udatipasa Yahova toera kukhala na udziwisi?

³ Yahova ndi Nciti wa cilongero, iye atipasa Bhibhlya toera kupangiza kuti tinakwanisa tani kunsimba. Bhibhlya isagumanika yonsene peno makhundu anango mu pilongero pyakukwana 2.800. Tingaleri mbatinyerezera mwacidikhodikho pinalonga Bhibhlya tinakwanisa kukhala na manyerezero a Mulungu. (Sal. 40:5; 92:5; 139:17) Natenepa, manyerezero a Yahova anatiphedza toera kukhala na ‘udziwisi wakuti unatiphedza toera kupulumuka.’​—Lerini 2 Timoti 3:14-17.

4. Pisabvekanji kunyerezera mwacidikhodikho? Ndi mibvundzo ipi inafuna ife kudinga mu nsolo uno?

⁴ Kunyerezera mwacidikhodikho pisabveka kuikha manyerezero pa cinthu peno kucidinga mwacidikhodikho, mwakukhonda tsalakana khala ndi cadidi peno cakuipa. (Sal. 77:12; Mis. 24:1, 2) Pinthu pyadidi kakamwe pyakuti pinatiphedza tingapinyerezera mwacidikhodikho ndi pinapfundza ife kwa Yahova na Yezu Kristu. (Jwau 17:3) Mu nsolo uno tinadzadinga mibvundzo iyi: Tinaleri tani munjira yakuti tinakwanisa kupinyerezera mwacidikhodikho? Ndi pinthu pipi piri na ife toera kunyerezera mwacidikhodikho? Ninji cinafuna kutiphedza toera kukomerwa na kunyerezera mwacidikhodikho?

MUNAPHINDULA TANI NA PFUNDZIRO YANU?

5, 6. Mu ndzidzi unaleri imwe, ninji cinafuna kukuphedzani toera kubvesesa na kukumbukira pinaleri imwe?

⁵ Ongo usatiphedza kucita pinthu pyakudzumisa, kazinji kene mwakukhonda kupinyerezera, ninga kupuma, kufamba, peno kutcova njinga. Mwakutsukwalisa, tinakwanisa kuleri nee kunyerezera. Natenepa, mphyadidi kuikha manyerezero ku mabvekero a mphangwa zinaleri ife. Pakumala kuleri ndima peno mbamudzati kutoma nsolo ung’ono unango wa mphangwa zinaleri imwe, musafunika kulimira toera kunyerezera mwacidikhodikho mphangwa zidaleri imwe. Dingani kuti mwapfundzanji, pontho onesesani khala mwazibvesesa mwadidi. Mbwenye pinthu pyakudzudzumisa na kukhonda kuikha manyerezero pa mbuto, pinaticitisa kunyerezera pinthu pinango mu ndzidzi unaleri ife. Tinacalira tani pyenepi?

⁶ A siyentista adzindikira kuti kuleri mwakugaluza kusaphedza toera kukumbukira mphangwa zinalerwi. Yahova, Nciti wa ongo wathu asadziwa pyenepi. Mbwenye Yahova apanga Yoswa toera kuleri bukhu ya Mwambo ‘mwacipantsi-pantsi.’ (Lerini Yoswa 1:8.) Mungaleri Bhibhlya mwacipantsi-pantsi, munaona kuti mphyakukhonda nentsa kakamwe kukhazikika na kukumbukira pinapfundza imwe.

7. Ndi upi ndzidzi wadidi toera kunyerezera mwacidikhodikho Mafala a Mulungu? (Onani cithundzithundzi cakutoma.)

⁷ Maseze kuleri nee kusaphemba kuwangisira, kunyerezera mwacidikhodikho kusaphemba kukhazikika. Natenepa, si pyadidi tayu kunyerezera mwacidikhodikho pa ndzidzi wakuti mwaneta. Mphyadidi kusaka mbuto yakusowa dzumbi, yakuti nkhabe pinthu pizinji pyakudzudzumisa. Nyamasalmo Dhavidhi aona kuti ndzidzi wadidi toera kunyerezera mwacidikhodikho ndi unakhala iye pa talimba camasiku mbadzati kugona. (Sal. 63:6) Yezu wakuti akhali waungwiro, asankhula mbuto zakusowa dzumbi toera kunyerezera mwacidikhodikho na kucita phembero.​—Luka 6:12.

PINTHU PYADIDI TOERA KUNYEREZERA MWACIDIKHODIKHO

8. (a) Kusiyapo Bhibhlya, ninji pontho pisafunika ife kupinyerezera mwacidikhodikho? (b) Kodi Yahova asaona tani tingakhazikisa ndzidzi toera kunyerezera pya iye?

⁸ Kunyerezera mwacidikhodikho pinaleri imwe m’Bhibhlya mphyadidi kakamwe, mbwenye pana pinango toera kupinyerezera. Mwacitsandzo, mungaona pinthu pyakudzumisa pidacita Mulungu, limirani mbamubvundzika: ‘Pyenepi pisandipfundzisanji thangwi ya Yahova?’ Pyenepi pinakukulumizani toera kusimba Yahova mu phembero na kulonga mabvero anu pakucedza na anango. (Sal. 104:24; Mach. 14:17) Yahova asapasa ntengo kakamwe tinganyerezera mwacidikhodikho, tingacita phembero, mbatilonga na anango thangwi ya iye. Thangwi ya ntsiku zino zakumalisa, Bhibhlya isalonga: “Pa ndzidzi unoyu, ale akhagopa Yahova alonga unango na ndzace, penepo Yahova akhabvesera na kubvesesa. Yatoma kulembwa pamaso pace bukhu ya cikumbuso kwa ale akhagopa Yahova na ale akhanyerezera mwacidikhodikho pya dzina yace.”—Mal. 3:16, Tradução do Novo Mundo.

9. (a) Kodi Paulu apanga Timoti toera kunyerezeranji? (b) Tinaphatisira tani uphungu wa Paulu pakukhunganyika toera kuenda mu utumiki?

⁹ Mpostolo Paulu apanga Timoti toera ‘kunyerezera mwacidikhodikho’ kuti mafalace, makhaliro ace na mapfundzisiro ace anakhuya tani anango. (Lerini 1 Timoti 4:12-16.) Ninga Timoti, ife tiri na pinthu pizinji kakamwe toera kunyerezera. Mwacitsandzo, tisafunika kukhazikisa ndzidzi toera kunyerezera mwacidikhodikho pakukhunganyika toera kucitisa pfundziro ya Bhibhlya. Tisafunika kukhunganyika mibvundzo yakuti inatiphedza toera kudziwa maonero a nyakupfundza peno citsandzo cakuti cinamphedza toera kuthambaruka. Ndzidzi unaphatisira ife mu pinthu pyenepi ndi wakuphindulisa kakamwe, thangwi pisawangisa cikhulupiro cathu, pontho pisatiphedza toera kukhala apfundzisi adidi na akugalamuka. Pyenepi ndi sawasawa pakukhunganyika toera kuenda mu utumiki. (Lerini Esdra 7:10, NM.) Panango munakwanisa kuleri kapitulu ibodzi ya bukhu ya Machitiro toera kukhala waphinga kakamwe mu utumiki. Munakwanisa kunyerezera mwacidikhodikho pya vesi na mabukhu anafuna imwe kuphatisira pa ntsiku inaenda imwe mu utumiki. (2 Tim. 1:6) Nyerezerani pya anthu a mu cisa canu, ninji cinafuna kukulisa cifuno cawo? Kukhunganyika munjira ineyi kunatikulumiza toera kupereka umboni mwakuphindulisa, ‘na cipangizo ca nzimu na mphambvu’ ya Mafala a Mulungu.​—1 Akor. 2:4.

10. Ndi miyai ipi inango iri na ife toera kunyerezera mwacidikhodikho?

¹⁰ Kodi musalemba ntsonga zinabva imwe pa nkhani yapakweca, pa misonkhano ya cisa na ya gawo? Kudinga ntsonga zenezi kunatipasa miyai yadidi toera kunyerezera mwacidikhodikho pidapfundza ife m’Mafala a Mulungu na mu gulu yace. Tinakwanisambo kunyerezera mphangwa zinaleri ife m’mabukhu mapswa anabuluswa pa nsonkhano wa gawo na za m’marevista a Ncenjezi na Despertai! akuti asabuluswa nthanda zonsene. Tingaleri bukhu ya Anuário mphyadidi kulimira pakumala kuleri cakugumana naco cibodzi na cibodzi. Pyenepi pinatipasa ndzidzi toera kunyerezera pidaleri ife, natenepa, mphangwa zenezi zinakhuya ntima wathu. Tinakwanisa kuikha nthemba pa ntsonga zikulu peno kulemba maonero nkhundu mwa ndima akuti anatiphedza pakukhunganyika ulendo wakubwereza, pa kucedzera abale peno pa nkhani inafuna ife kucita ntsogolo. Mwa pyonsene, tingalimira toera kunyerezera mwacidikhodikho ndzidzi onsene unaleri ife mabukhu akubuluswa m’Bhibhlya pinatipasa mwai toera kubvesesa mwadidi mphangwa zenezi. Pyenepi pinatikulumiza toera kucita phembero mbatipereka takhuta kuna Yahova thangwi ya pinthu pyadidi pinapfundza ife.

NYEREZERANI MWACIDIKHODIKHO MAFALA A MULUNGU NTSIKU ZONSENE

11. Ninji cisafunika ife kunyerezera kakamwe mwacidikhodikho? Mphapo thangwi yanji? (Onani cidzindikiro capantsi.)

¹¹ Mbwenye cinthu cakufunika kakamwe toera kunyerezera mwacidikhodikho ndi Bhibhlya. Nyerezerani kuti muli mu cisa cakuti musakhondeswa kukhala na Bhibhlya.a Mu ndzidzi unoyu nkhabe anafuna kukukhondesani kunyerezera mwacidikhodikho pinthu pidakoya imwe m’manyerezero mwanu, ninga malemba anu a pantima na nyimbo za Umambo. (Mach. 16:25) Pontho, nzimu wa Mulungu unakuphedzani toera kukumbuka pinthu pyadidi pidapfundza imwe.​—Jwau 14:26.

12. Ndi ipi njira ibodzi yakukhazikisa ndandanda yanu yakuleri Bhibhlya?

¹² Tinakwanisa kupambula ntsiku zingasi masumana onsene toera kuleri na kunyerezera mwacidikhodikho pinaleri ife m’makapitulu a ndandanda yakuleri Bhibhlya pa Xikola ya Utumiki wa Mulungu. Ntsiku zinango zinakwanisa kuphatisirwa toera kunyerezera pidalonga Yezu na pidacita iye. Mwakukhonda penula, imwe musatawira kuti mabukhu anadziwika kakamwe ndi a Evanjelyu analonga pya umaso wa Yezu na utumiki wace. (Arom. 10:17; Aheb. 12:2; 1 Ped. 2:21) Atumiki a Mulungu atambira bukhu inafokotoza umaso wa Yezu munjira idacitika pinthu kubulukira pakutoma. Bukhu ineyi ndi ciphedzo cadidi kakamwe, makamaka tingaileri mbatinyerezera mwacidikhodikho na kulandanisa na mphangwa za mabukhu anango a Evanjelyu zinapangizwa m’makapitulu anewa.​—Jwau 14:6.

THANGWI YANJI KUNYEREZERA MWACIDIKHODIKHO NDI KWAKUFUNIKA KAKAMWE?

13, 14. Thangwi yanji mphyadidi kupitiriza kunyerezera mwacidikhodikho pya Yahova na Yezu? Kodi pyenepi pinatikulumiza toera kucitanji?

¹³ Kunyerezera mwacidikhodikho pinthu pyauzimu kunaphedza munthu toera kukhala Nkristu wakukola. (Aheb. 5:14; 6:1) Munthu anaphatisira ndzidzi wakucepa toera kunyerezera pya Yahova na Yezu nee anapitiriza kukhala na cikhulupiro cakuwanga. Munthu unoyu ali pangozwi yakutayika peno kusiya undimomwene mwapang’ono pang’ono. (Aheb. 2:1; 3:12) Yezu acenjeza kuti tingakhonda kubvesera peno kutawira Mafala a Mulungu na ‘ntima wadidi,’ ife nee ‘tinadzaakoya.’ M’mbuto mwace, ife tinapeuswa mwakucimbiza na ‘nyatwa, upfumi na pinthu pyakutsandzayisa umaso.’​—Luka 8:14, 15.

¹⁴ Natenepa, tendeni tipitirize kunyerezera mwacidikhodikho Mafala a Mulungu. Pyenepi pinatikulumiza toera kunyerezera pya mbiri ya Yahova na makhaliro ace anapangizwa m’Bhibhlya. (2 Akor. 3:18) Tinakwanisa kupitiriza kupfundza pizinji kakamwe thangwi ya Babathu wakudzulu na kusangizira makhaliro ace. Unoyu ndi mwai ukulu kakamwe wakuti tinakwanisa kukhala nawo.​—Koel. 3:11.

15, 16. (a) Tisaphindula tani tinganyerezera mwacidikhodikho pinthu pyauzimu? (b) Thangwi yanji midzidzi inango pisanentsa kunyerezera mwacidikhodikho, mbwenye thangwi yanji tisafunika kupitiriza?

¹⁵ Tingapitiriza kunyerezera mwacidikhodikho pinthu pyauzimu, tinapitiriza kukhala a phinga mu undimomwene. Phinga yathu inaphedza Akristu andzathu na ale anacedza na ife mu utumiki. Kunyerezera mwacidikhodikho pidacita Yahova mu kupereka muoni wa ciomboli ca ntsembe ya Yezu, kunatiphedza toera kupasa ntengo uxamwali wathu na Yahova. (Arom. 3:24; Tgo. 4:8) Mark wa ku Afrika Wakubangwe amala pyaka pitatu nkaidi thangwi ya unakatinakati wace Wacikristu, iye alonga: “Kunyerezera mwacidikhodikho kusalandaniswa na kudzindikira pinthu pipswa. Tinganyerezera kakamwe mwacidikhodikho pinthu pyauzimu, tisadzindikira pinthu pizinji kakamwe thangwi ya Yahova Mulungu wathu. Midzidzi inatsukwala ine peno kudzudzumika thangwi ya ntsogolo, ndisakwata Bhibhlya mbandinyerezera mwacidikhodikho lemba. Ndisaona kuti pyenepi pisandiphedza toera kukhurudzika.”

¹⁶ Ndimomwene kuti dziko yadzala na pinthu pizinji pyakudzudzumisa. Natenepa, midzidzi inango pisanentsa kakamwe kunyerezera mwacidikhodikho pinthu pyauzimu. Patrick ndi m’bale unango wakukhulupirika anakhala ku Afrika. Iye alonga: “Manyerezero anga alandana na pasta ya mphangwa ya ntcini wandzeru yakuti yadzala na mphangwa zakufunika na zakukhonda funika zakuti ndisafunika kuzigawa ntsiku zonsene. Ndingadinga manyerezero anga, kazinji kene ndisagumana ‘maonero akudzudzumika,’ natenepa, ndisafunika kuphembera kuna Yahova thangwi ya maonero anewa mbandidzati kunyerezera mwacidikhodikho. Maseze kucita pyenepi kusaphemba ndzidzi ungasi mbandidzati kunyerezera mwacidikhodikho pinthu pyauzimu, ndisaona kuti pyenepi pisandicitisa kukhala cifupi na Yahova. Pyenepi pisafungula manyerezero anga toera kubvesesa undimomwene.” (Sal. 94:19) Mwandimomwene, munthu onsene ‘anadinga Malemba ntsiku zonsene’ mbanyerezera mwacidikhodikho pinapfundza iye, asakhala na maphindu adidi kakamwe!​—Mach. 17:11.

MUSAGUMANA TANI NDZIDZI?

17. Musagumana tani ndzidzi toera kunyerezera mwacidikhodikho?

¹⁷ Anango asabesera toera kuleri, kunyerezera mwacidikhodikho na kucita phembero. Anangombo asacita pyenepi pa ndzidzi wakupuma camasikati. Panango, kwa imwe ndzidzi wadidi toera kuleri Bhibhlya ndi cakumaulo peno mbamudzati kuenda kagona. Anango asaleri camacibese, mbaleri pontho camasiku mbadzati kuenda kagona. Natenepa, onsene asaleri Bhibhlya ‘masiku na masikati’ peno mwakukhonda phonya. (Yos. 1:8) Mbwenye cinthu cakufunika kakamwe ndi kugula ndzidzi. Pyenepi pisabveka kuikha pakhundu pinthu pyakukhonda funika kakamwe toera kukhala na ndzidzi wakunyerezera mwacidikhodikho Mafala a Mulungu.​—Aef. 5:15, 16.

18. Kodi Bhibhlya isapikiranji kwa onsene ananyerezera mwacidikhodikho Mafala a Mulungu mbawangisira toera kuphatisira pinapfundza iwo?

¹⁸ Bhibhlya isapikira kuti Yahova anadzapasa nkhombo onsene ananyerezera mwacidikhodikho pinalonga Mafalace, mbawangisira toera kuphatisira pinapfundza iwo. (Lerini Masalmo 1:1-3.) Yezu alonga: “Anyakutsandzaya ndiwo anabva mafala a Mulungu mbaakoya.” (Luka 11:28) Cinthu cakufunika kakamwe ndi kunyerezera mwacidikhodikho Mafala a Mulungu ntsiku zonsene, pyenepi pinatiphedza toera kupasa mbiri Yahova, Nciti Wankulu wa ongo wathu. Tingacita pyenepi, iye anadzatipasa nkhombo zakutsandzayisa kakamwe lero, na umaso wakukhonda mala mu dziko yace ipswa yaulungami.​—Tgo. 1:25; Apok. 1:3.

[Cidzindikiro capantsi]