NSOLO WA REVISTA | MUNTHU WAKUFUNIKA ANGAFA
Kodi Mphyakuipa Kutsukwala Thangwi Yakuferwa?
Mwanentseka kale mu ndzidzi wakucepa thangwi ya utenda? Panango mwawanga mwakucimbiza mbamuduwala pidacitika. Mbwenye kutsukwala thangwi yakuferwa kwasiyana na pyenepi. M’bukhu yace ya Healing a Spouse’s Grieving Heart, Dr. Alan Wolfelt alonga: “Nkhabepo cinthu ‘cinamalisa’ kutsukwala thangwi yakuferwa.” Mbwenye iye athimiza: “Mukupita kwa ndzidzi na ciphedzo ca anango, kutsukwala kusapunguka.”
Mwacitsandzo, dingani kuti kholo Abhrahamu apibva tani mudalowa nkazace. Bhibhlya isalonga kuti ‘Abhrahamu atoma kutsukwala mbalira thangwi ya nkazace.’ Fala yakuti ‘atoma’ isapangiza kuti iye atsukwala mu ndzidzi uzinji.a Citsandzo cinango ndi Yakobe, mudanyengezwa iye kuti mwanace, Zuze, aphiwa na cikala. Iye atsukwala mu “ntsiku zizinji,” pontho acibale ace acimwana kum’balangaza. Mudapita pyaka pizinji, kufa kwa Zuze kukhapitiriza kuntsukwalisa.—Genesi 23:2; 37:34, 35; 42:36; 45:28.
Abhrahamu atsukwala thangwi yakulowa kwa nkazace, Sara
Lero, pyenepi pisacitikambo na azinji anatsukwala thangwi yakufa kwa wakufunika wawo. Dingani pitsandzo pinatowera.
“Mamunanga Robert, alowa mu ntsiku 9 ya Maluwa ya 2008. Macibese a ntsiku idacitika cidengwa akhali sawasawa na ntsiku zinango. Pakumala kudya cakudya camacibese, ninga mukhacitira ife ntsiku zonsene pakufuna kuenda kubasa, tapangana na mafala akuti ‘ndisakufuna.’ Maseze pyaka pitanthatu pyapita, ndisapitiriza kutsukwala. Nee ndisanyerezera kuti kutsukwala kwanga thangwi yakulowa kwa Robert kunadzamala.”—Gail, wa pyaka 60.
“Maseze papita pyaka pyakupiringana 18 nkazanga mbadamala kulowa, ndisapitiriza kutsukwala thangwi yakulowa kwace. Ndzidzi onsene unaona ine cinthu cacibaliro cakubalika, ndisanyerezera iye, pontho kuti mbadapibva tani kuona pinaona ine.”—Etienne, wa pyaka 84.
Mwandimomwene, kutsukwala mu ndzidzi uzinji ndi kwacibaliro. Anthu asatsukwala munjira zakusiyana-siyana, pontho mbapidakhala pyakusowa ndzeru kutonga njira inatsukwalira munthu unango pa nyatwa. Mu ndzidzi ubodzi ene tisafunika kucalira kupasika mulando khala kutsukwala kwathu kusaoneka ninga kwatekera kakamwe. Tinathimbana tani na kutsukwala?
a Izaki, mwana wa Abhrahamu atsukwalambo mu ndzidzi uzinji. Ninga tinadzaona mu nsolo “Towezerani Cikhulupiro Cawo” mu revista ino, mukupita pyaka pitatu Izaki akhapitiriza kutsukwala thangwi ya kufa kwa mai wace, Sara.—Genesi 24:67.