Undimomwene Unalonga Pya Ntsogolo
Mwabvundzika kale kuti ninji pinafuna kucitika ntsogolo? Bhibhlya isatipanga pinthu pyakufunika kakamwe pyakuti mwakukhonda dembuka pinadzacitikira anthu onsene pa dziko yapantsi.
Yezu afokotoza kuti tinadziwa tani “kuti Umambo wa Mulungu uli cifupi.” (Luka 21:31) Iye alonga kuti, pa dziko yapantsi mbapadaoneka nkhondo, piteketeke pikulu, njala na mautenda m’mbuto zakusiyana-siyana, pinthu pyakuti tisapiona lero mbapikacitika.—Luka 21:10-17.
Bhibhlya isapangizambo kuti tinakwanisa kudziwa “ntsiku zakumalisa” thangwi ya makhaliro akuipa anapangiza anthu. Munakwanisa kuleri pinthu pyenepi pa 2 Timoti 3:1-5. Mungaona pinthu pyenepi mbapikacitika lero, mwakukhonda penula, imwe musatawira kuti profesiya ineyi ya m’Bhibhlya ikukwanirisika.
Pyenepi pisabvekanji? Umambo wa Mulungu uli cifupi toera kucita macinjo makulu pa dziko yapantsi kuti anthu akhale na umaso wadidi. (Luka 21:36) M’Bhibhlya, Mulungu apikira pinthu pyadidi pa dziko na kuna anthu anafuna kukhala mwenemo. Onani pitsandzo pingasi.
UTONGI WADIDI
‘Yezu apaswa mphambvu, mbiri na umambo, toera atumikire anthu a mbumba zonsene, a madziko onsene na a pilongero pyonsene. Utongi wace ndi wakwenda na kwenda, pontho umambo wace, nee unadzafudzwa.’ —DANYELE 7:14, Tradução do Novo Mundo.
Pyenepi pisabvekanji: Imwe munatsandzaya kakamwe na umaso mungatongwa na Mwana wa Mulungu adakhazikisa iye ninga Mambo.
UNGUMI WADIDI
‘Nee munthu m’bodzi anadzalonga: Ndiri kubva kupha.’—IZAIYA 33:24, NM.
Pyenepi pisabvekanji: Imwe nee munadzabva kupha; munadzakhala na ungumi wadidi ntsiku zonsene.
NTENDERE WANDIMOMWENE
‘Iye anamalisa nkhondo pa dziko yonsene yapantsi.’—MASALMO 46:9.
Pyenepi pisabvekanji: Nee kunadzaonekabve nkhondo nee nyatwa zonsene zinabwereswa thangwi ya nkhondo.
DZIKO YAPANTSI INADZAKHALA NA ANTHU ADIDI
‘Anyakuipa anadzafudzwa, mbwenye anyakupfulika anadzakhala pa dziko yapantsi.’—MASALMO 37:10, 11, NM.
Pyenepi pisabvekanji: Mwenemo nee munadzaoneka anthu anacita pinthu pyakuipa, basi ene anthu anabvera Mulungu.
DZIKO YAPANTSI INADZAKHALA PARAIZU
‘Iwo anadzamanga nyumba mbakhalamo, pontho analima minda mbadya misapo yace.’—IZAIYA 65:21, 22.
Pyenepi pisabvekanji: Dziko yonsene yapantsi inadzakhala yakubalika kakamwe. Mulungu anakwanirisa phembo inacita ife toera cifuniro cace cicitike “pa dziko yapantsi.”—Mateu 6:10