Pangizani Kutsalakana Kwanu Anango—M’kucita Mabvunzo Na Kubvesera
1 Anthu azinji asakomerwa m’kulonga pinanyerezera iwo mbwenye asaipirwa angasumulwa peno kusanyiwa. Natenepa, ninga atumiki Acikristu, tisafunika kupfunza luso ya kudzindikira piri m’ntima mwa munthu m’kucita mabvunzo.—Mis. 20:5.
2 Mabvunzo athu asafunika kucitisa munthu kunyerezera, tayu kunthusa. M’kumwaza mphangwa nyumba na nyumba, mbale asabvunza: “Kodi musadziwa kuti unadzafika nzidzi wakuti anthu anadzatsalakanana mbalemedzana mwadidi unango na nzace?” Mwakubverana na ntawiro unaperekwa, iye asabvunza: “Kodi ndi ninji pinafunika towera pyenepi picitike?” peno “Thangwi yanji musanyerezera tenepa?” M’kupereka umboni wantsusukano na m’zimbuto zapakweca, mbale unango asabvunza anyakubala: “Kodi ndi ninji pinakukomerani kakamwe m’kukhala kwanu ninga nyakubala?” Buluka penepo asabvunza: “Kodi ndi ninji pinakudzudzumisani kakamwe?” Onani kuti mabvunzo awa asacitisa anthu kulonga pinanyerezera iwo mokhonda kuathusa. Nakuti makhaliro asasiyana, panango tisafunika kucinja mphangwa na ntundu wa mabvunzo athu towera abverane na anthu onsene a m’cisa cathu.
3 Kudzindikira Piri M’ntima Mwa Anthu: Khala anthu asafuna kukupangani pinanyerezera iwo, bveserani mwakupirira mwakukhonda kuagwandira. (Tgo. 1:19) Mwakukomerwa perekani takhuta ku pidalonga iwo. (Akol. 4:6) Mungakwanise kulonga kuti: “Ndapibva pidalonga imwe na ndakhuta kakamwe kundipanga pinthu pyenepi.” Asimbeni khala munakwanisa kucita pyenepi kubulukira m’ntima. M’kufuna kuaphedza citani mabvunzo akuthimizira towera kudziwa pinanyerezera iwo na thangwi yanji asapibva tenepa. Sakani ntsonga zinakhuya imwe monsene. Mungafuna kuapangiza lemba, mungakwanise kulonga: “Kodi mwatoma kuona kale ipi ninga njira yakumalisa pyenepi?” Calirani kukhala wakhakama peno wakulongana.—2 Tim. 2:24, 25.
4 Kutawira kwa anango mabvunzo athu kazinji kene kungakwanise kunyindira njira inaabvesera ife. Anthu asakwanisa kuona khala tisaabvesera kubulukira m’ntima. Muyang’aniri unango wa cisa alonga tenepa: “Munapangiza imwe cifuno ca kubvesera anthu mwakupirira, pyenepi pina mphambvu ikulu yakutundusa na ndi cipangizo cadidi ca kutsalakana kwanu anango.” Kubvesera anango kusaapasa cilemedzo, na kungakwanise kuacitisa kubvesera mphangwa zadidi zinafuna ife kugawana nawo.—Arom. 12:10.