Kulumizani Kupereka Takhuta Ku Makhaliro Okhonda Landanisika A Yahova
1 M’utumiki wathu, tisacita pizinji kupiringana kupfunzisa anango undimomwene wakutoma wa Biblya. Tisaphedza anthu kudziwa Yahova ninga munthu na kukulumiza kupereka takhuta ku makhaliro ace okhonda landanisika. Munapfunza anthu a ntima wadidi undimomwene wa pya Mulungu, pyenepi pisaakhuya kakamwe, mbipiakulumiza kucita macinjo m’umaso wawo towera ‘akhale a maso ninga munafunika kuli anthu a Mbuya. Iye Mbuya akomerwe na iwo pa pyonsene.’—Akol. 1:9, 10; 3:9, 10.
2 Bukhu Ipswa Ya Pfunziro: Pakutoma pene, bukhu yakuti Biblya Isapfunzisanji isagomezera makhaliro a Yahova. Nsolo wakutomene usatawira mabvunzo ninga awa: Kodi Mulungu asakutsalakananidi?, Kodi Mulungu akhala tani?, na Kodi mphyakukwanisika kufendedzera Mulungu? Nsolo unoyu usagomezerambo kucena kwa Yahova, (ndima 10), ulungami wace na kubva kwace ntsisi (ndima 11), kufuna kwace (ndima 13), mphambvu zace (ndima 16), ntsisi yace, kupfulika kwace, kufunisisa kwace kulekerera, kupirira kwace na kukhulupirika kwace (ndima 19). Ndima 20 isaphataniza pinthu m’kulonga tenepa: “Munathimizira imwe kupfunza pya Yahova, iye anadzakhala wandimomwene kakamwe kwa imwe na munadzakhala na mathangwi mazinji a kumfuna na kubva kuti muli duzi na iye.”
3 Kodi tinakwanisa tani kuphatisira bukhu yakuti Biblya Isapfunzisanji towera kuphedza anyakupfunza a Biblya kufendedzera Yahova? Pakumala kupfunza ndima inagomezera ubodzi wa makhaliro a Mulungu, tingakwanise kubvunza nyakupfunza: “Kodi pisakupanganinji pyenepi pya umunthu wa Yahova?” peno “Kodi pyenepi pisapangiza tani njira inakutsalakanani Mulungu ninga munthu?” M’kuphatisira mabvunzo anewa m’midzidzi inango pakupfunzisa, tisapfunzisa anyakupfunza athu kunyerezera pinapfunza iwo na kuaphedza kukulisa kupereka kwawo takhuta ku makhaliro okhonda landanisika a Yahova.
4 Phatisirani Bokosi Ya Kubwerezera Pidapfunzwa: Kunkhomo kwa nsolo ubodzi na ubodzi, phembani nyakupfunza kuti alonge m’mafala ace ene ntsonga ibodzi na ibodzi inagumanika m’bokosi yakuti “Pipfunziso Pya Biblya.” Dingani malemba anagumanika mwenemo. Towera kukulumiza nyakupfunza kulonga piri m’ntima mwace, m’midzidzi inango mungakwanise kubvunza kuti: “Kodi musaona tani pinapfunzisa Biblya pa ntsonga ineyi?” M’kucita pyenepi, nee mukugomezera ntsonga zikulu basi za nsolo tayu mbwenye munakwanisambo kudziwa mwapakweca pinakhulupiradi nyakupfunza. Pyenepi pinadzaphedza nyakupfunza kutoma kukulisa uxamwali na Yahova.