Iwo Aikha Citsanzo Ca Kukhulupirika

¹ M’caka ca 1937 kwatomeswa njira ipswa ya kumwaza mphangwa kwa nzidzi onsene—basa ya upainiya wakupambulika. Amuna na akazi akukwanisa na aluso m’utumiki Wacikristu, mwakufuna atawira basa ya kutumikira ku mbuto zonsene zikhatumwa iwo na gulu. Lero, pakupita madzana a piaka, apainiya akupambulika akupitiriza na kuikha citsanzo ca kukhulupirika cakuthema kusangizirwa.—Aheb. 6:12.

² Iwo Atsogolera Basa: Kubulukira pakutoma, apainiya akupambulika atsogolera basa ya kumwaza mphangwa m’kuphatisira gramafone yakufamba nayo pa misuwo ya anaciro nyumba. Iwo aphatisirambo pyakugravarwi ninga phata towera kuceza pinagumanika m’Biblya pa maulendo akubwerezera. Pyenepi pyacitwa m’mizinda mikulu ikhali na mipingo yakukhazikiswa kale. M’kupita kwa nzidzi, apainiya akupambulika akhatumizwa m’mbuto zakuti zikhali na kufuna kukulu kwa amwazi mphangwa za Umambo. Iwo apitiriza kucezera anthu onsene adapangiza kufuna mphangwa za Umambo na acitisa mapfunziro a Biblya. Ninga cakubwereswa ca kuwangisira kwawo mwaphinga, kwakhazikiswa madzana a mipingo ipswa. Kuwangisira kwawo kumwaza mphangwa zadidi kwaphedza kukula kwa gulu inaona ife lero. (Iza. 60:22) Apainiya akupambulika akupitiriza kucita basa yakufunika m’kumwaza mphangwa zadidi “kuli pinthu pyonsene pidachitwa pantsi pa thambo.”—Akol. 1:23.

³ Athema Kusangizirwa: Apainiya akupambulika anango asacita basa ya utumiki wa nzidzi onsene m’piaka pizinji. M’piaka pyenepi, cikhulupiro ca amuna na akazi anewa akukhulupirika casefiwa m’makhaliro akusiyana-siyana. (1 Ped. 1:6, 7) Iwo akhali dzololo kusiya pinthu pyakumanungo towera kutumikira m’mbuto zakuti ziri na kufuna kwakupambulika. Cincino anango a iwo ali akugwesera na ali na ungumi wakunensa, peno akuthimbana na nyatwa zinango. (2 Akor. 4:16, 17) Ngakhale tenepa, iwo akupitiriza “mu unkhalamba mwene [kubala] misapo.” (Sal. 92:14) Iwo asaikha cinyindiro cawo kwa Yahova na akutambira nkhombo zace.—Sal. 34:8; Mis. 10:22.

⁴ Mwandimomwene, apainiya akupambulika athema kusimbwa kakamwe na ife. Khala imwe muli na mwai wa kukhala na apainiya akupambulika m’mpingo mwanu, gulani nzidzi towera kuceza nawo na phindulani na luso yawo. Pangizani kupereka takhuta ku basa yawo ninga amwazi mphangwa za Umambo akukhulupirika. Khalani akuwangiswa na kukhala kwawo dzololo. Onsene ale anasangizira cikhulupiro cawo angakwanisembo kukhala akutawirika kwa Yahova na kutambira nkhombo thangwi iye ‘asakomerwa na anthu analonga [peno anacita] pya maso.’—Mis. 12:22.