Sakulirani Misambo Yadidi Na Phindulani Na Nkhombo Zizinji
1 Mudamala imwe kwene kukhala Nkristu, panango mwawangisira kakamwe towera kusakulira mabasa akubverana na kulambira kwanu Yahova akuti asaphataniza kupfunza Biblya, misonkhano Yacikristu, utumiki wa mmunda na kuphembera. Ninga cakubwereswa ca nkhombo za Yahova m’kuwangisira kwanu, imwe mwakula mwauzimu. Mpaka pano, panango papita piaka pingasi mbumudamala kale kubatizwa. Kodi mukupitiriza na misambo yadidi yauzimu idasakulira imwe mudamala imwe kukhala Nkristu?
2 Dingani Pidzoloero Pyanu: Kodi ndi nsambo wanu kuleri phindi ya Mafala a Mulungu ntsiku na ntsiku? Ndi nkhombo zizinji tani zinafuna wina ife m’kucita pyenepi! (Yos. 1:8; Sal. 1:2, 3) M’Israele wakale, mambo mbodzi na mbodzi akhafunika kuleri bukhu ya Mwambo “kuenda na kuenda “ m’umaso wace. Kodi na maphindu anji? Towera kusakulira ntima wakucepeseka na kupfunza kugopa Yahova mbakhonda kusiya kuphatisira matongero Ace. (Deut. 17:18-20) M’njira ibodzibodzi lero, kuleri Biblya ntsiku na ntsiku kusatiphedza kukhala akuona ntima na akulungama m’dziko ino yakuipa. Kusatiphedzambo kukhala akukhunganyika kakamwe ku utumiki wa mmunda.—Afil. 2:15; 2 Tim. 3:17.
3 Yezu akhali na nsambo wa kuenda ku sinagoga, kukhafokotozwa Malemba. (Luka 4:16) Mokhonda penula pyenepi pyamuwangisa towera kuthimbana na mayeso akhafuna tamba iye kutsogolo. Ife tisawangiswambo na pitsogolero pyauzimu pinaperekwa m’misonkhano yampingo na ‘kuwangisana [mwadidi] munthu na munthu.’ (Arom. 1:12, Mphangwa Zadidi) Kugumanyikana na abale athu kusatiphedza kupirira nyatwa za ntsiku zino zakumalisa. (Aheb. 10:24, 25, MZ) Kodi ciciri cidzoloero canu kugumanika pa misonkhano yonsene?
4 Mbiri za Biblya zisatipanga kuti apostolo acita khundu m’kumwaza mphangwa zadidi ‘ntsiku zonsene mu templo na m’mizinda [peno nyumba na nyumba].’ (Mach. 5:42) Maseze tikhonde kukwanisa kumwaza mphangwa ntsiku zonsene, kodi tingakwanise kukhala na cidzoloero ca kucita khundu m’njira zinango za utumiki masumana onsene? M’kucita pyenepi, mokhonda penula tinadzakhaladi aluso m’kuphatisira Mafala a Mulungu, na tinadzatsanzaya na pyakugumana napyo pyakuwangisa m’kugawana na anango undimomwene wa Biblya.
5 Mprofeta Danyeli apaswa nkhombo zizinji na thangwi ya kutumikira kwace Yahova ‘nzidzi onsene’ m’umaso wace onsene. Pyenepi pikhaphataniza nsambo wa kuphembera mokhonda phonya kwa Yahova. (Dan. 6:10, 16, 20) M’njira ibodzibodzi, tingafika kwa Yahova mokhonda phonya m’phembero yakubulukira m’ntima, iye anadzatipasa ninga nkhombo nzimu wace wakucena. (Luka 11:9-13) Kupiringana pyenepi, Yahova anadzatawira m’kukhala duzi na ife, mbaticitisa kukhala akutsanzaya na uxamwali wadidi na iye. (Sal. 25:14; Tgo. 4:8) Ndi phindu ikulu tani! Natenepa, tisafunika kuphata basa mwakuwangisira towera kupitiriza na misambo yadidi yauzimu na titambire nkhombo za Yahova.
[Study Questions]
1. Thangwi yanji ndi kwakuphindulisa kudinga pidzoloero pyanu pyauzimu?
2. Kodi tisaphindula tani na kuleri Biblya ntsiku na ntsiku?
3. Kodi ndi nkhombo zipi zinatambira ife m’kugumanika mokhonda phonya pa misonkhano?
4. Kodi kucita khundu m’utumiki wa mmunda sumana na sumana kusatiphindulisa tani?
5. Thangwi yanji nkhwakufunika kakamwe kuphembera kwa Yahova mokhonda phonya?