Pfunziro Ya Bukhu Yakuti Lambirani Mulungu

Bukhu yakuti Lambirani Mulungu Mbodzi Basi Wandimomwene yacitwa towera kupfunzwa na anthu apswa pakumala kupfunza bukhu yakuti Biblya Isapfunzisanji. Kupfunza kwathu bukhu ineyi pa Pfunziro Ya Bukhu Yampingo kunadzatikhunganya kuiphatisira mwadidi m’utumiki na kudzatiphedza kukulisa kufuna kwathu pabodzi na kupereka takhuta kwa Yahova na gulu yace. Kodi tinaphindula tani mwakukwana na pfunziro yathu ya bukhu yakuti Lambirani Mulungu?

Macitiro A Pfunziro: Nakuti tinadzapfunza hafu ya nsolo pa sumana ibodzi na ibodzi, ayang’aniri a pfunziro ya bukhu asafunika kugawa nzidzi mwanzeru. Iwo asafunika kudinga ndima zakutoma mwakucimbiza towera nzidzi uzinji aukoyere mphangwa zakufunika, zakuti kazinji kene zisagumanika kunkhomo kwa nsolo. Kudinga kwacigwagwa bokosi ya kubwerezera pidapfunzwa kunkhomo kwa pfunziro ibodzi na ibodzi kunadzaphedza anyakubvesera kukoya ntsonga zikulu.

Cifupi na hafu ya misolo ya bukhu yakuti Lambirani Mulungu iri na mabvunzo adalembwa nkati towera kudingwa na kunyerezerwa. Citsanzo ca pyenepi cisagumanika m’tsamba 48-9. Si kwakufunika tayu kuleri mabvunzo anewa pabodzi na ndima. Munadingwa iwo pa nsoka wa pfunziro ya bukhu, muyang’aniri asafunika kucitisa kuti malemba akusowa mafala m’ndima aleriwi na adingwe nzidzi ungakhalapo.

Khunganyikani Mwanyapantsi: Kukhunganya mwanyapantsi pfunziro pisaphataniza pizinji kusiyapo kukudza matawiro. Kunyerezera mwadidi malemba akusowa mafala m’ndima nee kunadzatiphedza kukhunganya matawiro athu basi tayu, mbwenye cikulu kakamwe mitima yathu. (Esd. 7:10) Ife tonsene tingakwanise kucita nkhundu towera kuwangisana na matawiro anthu akupicepesa.—Arom. 1:11, 12.

Pfunziro yathu ya bukhu yakuti Lambirani Mulungu inadzatiphedza kufendedzera kakamwe Yahova na kutikhunganya towera kuphedza anthu akuona ntima kugumanyikana na ife m’kumulambira. (Sal. 95:6; Tgo. 4:8) Tendeni tonsene tiphindule mwakukwana na masasanyiro adidi anewa auzimu.