Kodi Imwe Muna Cisa Canu Cene?
1 Cisa canu cene ndi cire cidapaswa iwe. Panango ciri pa mbuto yadidi yakuti munakwanisa kucifika mwakucimbiza na kumwaza mphangwa mwekhene peno na mmwazi mphangwa unango. Ngakhale kuti ndi pyadidi kuphedza masasanyiro a mpingo a kupereka umboni ninga nsoka pingakwanisika, kukhala na cisa canu cene towera kuphata basa m’midzidzi inango kunaphedza kupereka umboni mwakukwana, makamaka m’mipingo yakuti iri na pisa pizinji.—Mach. 10:42.
2 Maphindu: Anango akhala na maphindu akuthimizirika m’kumwaza mphangwa m’cisa cawo cene cifupi na mbuto yawo ya basa m’nzidzi wakupuma peno pakukotoka kwene kubasa. Anango akomerwa kuphata basa pabodzi na banja kwa anyakuendekana awo m’nzidzi ubodzi peno mbadzati kutoma Pfunziro ya Bukhu ya Mpingo. Ninga phindu, maulendo akubwerezera na mapfunziro a Biblya anagumanika angakwanise kukhala paduzi, pinacitisa kuphatisira mwadidi mphambvu, nzidzi na mpfuma. Nakuti pizinji pinakwanisa kukwaniriswa m’nzidzi wakucepa, kukhala na cisa canu cene kungaphedze anango kukhala apainiya akuphedza m’nzidzi na nzidzi peno kulembesa ninga apainiya anzidzi onsene. Mwakuthimizira, kuphata basa m’cisa cathu cene na kukhala akudziwika na anaciro nyumba kunakwanisa kutiphedza kuwina cinyindiro cawo na kucinja upereki umboni wathu mwakubverana na makhaliro awo, kucita utumiki wathu kukhala wadidi kakamwe.
3 Mpainiya unango wakuti awangiswa na muyang’aniri wa cisa towera kukhala na cisa cace cene alonga: “Ndatawira uphungu unoyu na mwakukhonda dembuka ndakhala wakudziwika mwadidi na kukhala na uxamwali na anaciro nyumba m’cisa canga. Ndacinja midzidzi ya maulendo anga akubwerezera mwakubverana na makhaliro awo. Ninga phindu, maulendo anga akubwerezera athimizirika pa 35 mpaka 80 pa nthanda, na ndiri na mapfunziro a Biblya a panyumba akukwana manomwe.”
4 Kodi Munacita Tani Pyenepi: Khala musafuna kuphemba cisa canu cene, longani na ntumiki anatsalakana pisa. Khalani aufulu towera kuphemba mmwazi mphangwa unango towera kuphata basa pabodzi na imwe, na koyani pyakulembwa pya nyumba zokhonda gumanika anthu. Musafunika kuwangisira towera kumalisa cisa nkati mwa nthanda zinai. Khala mphyakunensa kwa imwe kucita pyenepi, mungakwanise kuphemba muyang’aniri wanu wa Pfunziro ya Bukhu ya Mpingo peno anango kuti akuphedzeni. Pakumala nthanda zinai, imwe munakwanisa kubweza cisa cidamala kuphatwa basa peno kuphemba kuciphata pontho. Natenepa, imwe nkhabe funika kupitiriza na cisa cibodzi cene kwenda na kwenda mbwenye cibwezeni towera anango akwanise kuciphembambo. Khala imwe muli pa mpingo wakuti uli na pisa pyakucepa na mphyakucimwanika kukhala na cisa canu cene, panango munakwanisa kuphemba khundu ibodzi ya cisa kwa muyang’aniri wanu wa pfunziro ya bukhu.
5 Basa yathu ya kumwaza mphangwa “[pantsi] ponsene” ndi yakunensa kakamwe. (Mat. 24:14) Pyenepi pisafunika kuwangisira kubverana mwadidi. M’kuthimizira nsoka wakupereka umboni m’kumwaza mphangwa m’cisa canu cene pinatiphedza kufikira anthu azinji na mphangwa zadidi.
[Study Questions]
1. Kodi ndi ninji cisa canu cene?
2. Kodi ndi maphindu api mangasi a kukhala na cisa canu cene?
3. Kodi ndi maphindu api adatambira mpainiya adakhala na cisa cace cene?
4. Kodi munakwanisa tani kukhala na kuphata basa m’cisa canu cene?
5. Kodi ndi ninji pinafunika towera kukwanirisa basa yathu yakumwaza mphangwa?