Tonsene Tingakwanise Kucita Khundu M’kucita Anyakupfunza Apswa

¹ Kuwangisira kwa munthu m’bodzi basi nkhabe citisa kuti paoneke nyakupfunza mupswa. Yahova angakwanise kuphatisira “anyakuphedza” ace onsene towera kuphedza anyakupfunza Biblya kuti akule mwauzimu. (1 Akor. 3:6-9) M’bodzi na m’bodzi asaphedza anyakupfunza apswa tayu basi na matawiro athu m’misonkhano Yacikristu mbwenyembo na makhaliro athu adidi, akuti asapereka cipangizo cikulu ca kuphata basa kwa nzimu wa Mulungu m’umaso wathu. (Jwau 13:35; Agal. 5:22, 23; Aef. 4:22, 23) Kodi tinacitanji pontho towera kuphedza anyakupfunza apswa?

² Ninga Mpingo: Ife tonsene tingakwanise kupangiza cifuno kwa ale anatoma kwene kusonkhana m’kuenda kaamwanyika mwadidi na kuceza nawo misonkhano mbisati toma na pakumala kwayo. M’kunyerezera kugumanika kwace pakutoma pa nsonkhano wa mpingo, mamuna m’bodzi alonga: “M’ntsiku ibodzi basi ndadziwa anthu azinji akukhala na kufuna kwandimomwene, acilendo kakamwe, kupiringana akhadadziwa ine m’igreja idakula ine. Pikhali pakweca kuti ndagumana undimomwene.” Iye abatizwa pakupita nthanda zinomwe pakumala kugumanika kwace pa nsonkhano wakutoma.

³ Nyakupfunza Biblya angathambaruka mwauzimu nsimbeni mwakubulukira m’ntima. Kodi iye apirira mpingizo? Kodi iye asagumanika pa misonkhano mokhonda phonya? Kodi iye akhala na cipapo ca kutawira pa nsonkhano? Kodi iye alembesa dzina yace m’Xikola Ya Utumiki Wa Mulungu peno atoma kucita khundu m’utumiki? Nsimbeni thangwi ya kuthambaruka kunacita iye. Pyenepi pinadzamuwangisa na kumpasa cipapo.—Mis. 25:11.

⁴ Ninga Ncitisi Wa Pfunziro Ya Biblya: Amwazi mphangwa anango akwanisa kuphedza anyakupfunza awo a Biblya kudziwana na ciwalo cibodzi na cibodzi ca mpingo m’kuphemba amwazi mphangwa anango towera kuaperekera ku pfunziro. Lekani kudembuka kuphemba nyakupfunza Biblya kuti aende ku misonkhano ya mpingo tayu. Munatoma iye kugumanika pa misonkhano ya mpingo, mpangizeni abale anango. Kodi iye akuwangisira kuti amalise nkhaliro wakuipa, ninga kufumali? Kodi pana munthu m’banja yace anakhondesa pfunziro yace? Iye angakwanise kuphindula m’kuceza na mmwazi mphangwa wakuti athimbana na akunda nyatwa ibodzibodzi.—1 Ped. 5:9.

⁵ Anyakupfunza apswa asafuna ciphedzo cauzimu ca m’mpingo. Tonsene tingakwanise kuaphedza m’kupita kwawo patsogolo mwauzimu m’kupangiza citsalakano cathu cakubulukira m’ntima.