Pfunzisani Ananu Towera Asimbe Yahova
1 Masalmo 148:12, 13 asawangisa aphale na atsikana towera ‘asimbe dzina ya Mbuya peno Yahova.’ Malemba ali na pitsanzo pizinji pya anapiana adacita pyenepi. Mwacitsanzo, ‘Samwele mukhakhala iye mwana akhachitira mabasa Mbuya.’ (1 Sam. 2:18) Ndi ‘kantsikana’ kadapanga nkazi wa Naamani kuti mprofeta wa Yahova wa ku Israele mbadakwanisa kuwangisa matanya a Naamani. (2 Am. 5:1-3) Mudapita Yezu mu templo mbacita pirengo pikulu, “ana” ndiwo adakhuwa: “Hosanna, Mwana wa Davide.” (Mat. 21:15) Kodi anyakubala anakwanisa tani kupfunzisa anawo towera asimbe Yahova?
1. Kodi anapiana angakwanise kusimba Yahova?
2 Citsanzo: Mbasati kupfunzisa peno kukhomera undimomwene mu mitima ya anawo, ababa Aciisraele akhapfunziswa pakutoma kufuna Yahova na kukoya matongero ace mu mitima yawo ene. (Deut. 6:5-9) Khala imwe musalonga munjira yadidi pya utumiki na kucita utumiki unoyu kukhala khundu ya ndandanda wanu wa sumana na sumana, ananu anadzaonambo utumiki ninga wakufunika na wakutsanzayisa.
2. Thangwi yanji ndi pyakufunika kwa anyakubala kupereka citsanzo cadidi kwa anawo?
3 Mulongo unango asakumbuka: “Mukhakula ine, mabasa a ntsiku na ntsiku a banja yathu akhaphataniza kucita khundu mu utumiki wa m’munda pa kumala kwa sumana ibodzi na ibodzi. Ndikakwanisa kuona kuti anyakubala anga mwandimomwene akhakomerwa na kumwaza mphangwa. Ife tikakula mbitikaona utumiki ninga cinthu cakukomeresa.” Mulongo unoyu akhala m’mwazi mphangwa okhonda batizwa mukakhala iye na piaka pinomwe pyakubalwa na ali mu caka cacimakumatatu na citatu mu basa ya nzidzi onsene.
3. Kodi mulongo unango aphindula tani na citsanzo ca anyakubala ace?
4 Cipfunziso Cakuthimizirika: Citisani kuti ananu acitembo khundu munacita imwe basa ya utumiki. Panango iwo angakwanise kuliza cingalingali ca nsuwo, kupereka katsamba kwa mwanaciro nyumba, peno kuleri lemba. Pyenepi pinadzathimizira cifuno cawo na kuaphedza kukhala na cinyindiro mu luso yawo ya kumwaza mphangwa za Umambo. Munakula iwo, kucita kwawo khundu mu utumiki kusafunika kuthimizirike. Natenepa, aphedzeni kuti athambaruke na kukhala na pifuno pyauzimu.
4. Kodi kupfunzisa ana kuti athambaruke kusabvekanji?
5 Lekani kudembuka tayu kulonga na akulu a mpingo mungaona kuti ananu athema kukhala amwazi mphangwa okhonda batizwa na munalonga iwo kuti asafuna kukhala amwazi mphangwa. Kukhala m’mwazi mphangwa kunadzathimizira kupitawirira kwawo towera kusimba Yahova. Kumbukani kuti mwana nkhabe funika kudziwa pizinji ninga pinadziwa m’mwazi mphangwa wankulu mbasati kukhala wakuthema tayu. Kodi mwananu asadziwa pipfunziso pyakutoma pya Biblya? Kodi iye asakoya midida yakulungama ya Biblya? Kodi iye asafuna kucita khundu mu utumiki na kudziwiwa ninga m’bodzi wa Mboni za Yahova? Khala ndi tenepo, akulu a mpingo angakwanise mphapo kuona khala iye athema kukhala m’mwazi mphangwa okhonda kubatizwa.—Onani nthimiziro wa Utumiki Wathu Wa Umambo wa nthanda ya Bwinja ya 2007, tsamba 5-8.
5. Kodi ndi ninji cinafunika kwa mwana towera atheme kukhala m’mwazi mphangwa okhonda batizwa?
6 Kupfunzisa anapiana towera asimbe Yahova kubulukira mu ntima wawo kusafunika kuwangisira. Mbwenye, nkhabepo pinthu pinabweresa kutsanzaya kukulu kwa anyakubala kupiringana kuona anawo mbakathambaruka mwauzimu. Cakufunika kakamwe ndi cakuti Yahova asakomerwa munalonga anapiana mabasa ace akudzumisa.
6. Thangwi yanji ndi pyakuphindulisa kwa anyakubala kupfunzisa anawo?