‘Nyakutsanzaya Ndi Munthu Anapirira Mayesero’
1 Akristu onsene asathimbana na mitcingo peno mayesero. (2 Tim. 3:12) Mayesero angakwanise kubwera mu njira ya utenda, kusowa kobiri, kutcingwa, peno mu njira zinango zizinji. Mayesero akubwereswa na Sathani ali na cifuno ca kupungula mphinga yathu, towera kuticitisa kuti tikhonde tsalakana utumiki wathu Wacikristu, peno towera kuticitisa kusiya kutumikira Mulungu. (Yobe 1:9-11) Kodi kupirira mayesero kusatsogolera tani ku kutsanzaya?—2 Ped. 2:9.
2 Khalani Akukhunganyika Towera Kuthimbana Na Mayesero: Yahova atipasa Mafalace a undimomwene, kuphataniza pyakucitika na pipfunziso pya umaso wa Yezu. Mu kubvesera mafala a Yezu na kuabvera, ife tisaikha phata yakuwanga na mu njira ineyi tisakhunganyika towera kupirira mayesero. (Luka 6:47-49) Pontho ife tisakhala na mphambvu kubulukira ku masasanyiro anango—abale athu Acikristu, misonkhano ya mpingo na mabukhu akubuluswa m’Biblya anacitwa na nsoka wa mbandazi wakukhulupirika na wanzeru. Kusiyapo pyenepi, tisaphatisirambo muoni wa phembero udapaswa ife na Mulungu.—Mat. 6:13.
3 Pontho Yahova asatipasa cidikhiro. Munakulisa ife cidikhiro cathu ku mapikiro a Yahova, cidikhiro cathu cisadzakhala ninga ‘nangula yakukhulupirika ya moyo wathu.’ (Aheb. 6:19) M’midzidzi ya Biblya, cipo bote ikhasiyiwa ku gombe yakusowa nangula, ngakhale makhaliro akudambo akhale adidi. Mwakudzidzimusa conzi cingatoma, kuponya nangula mwanyapantsi kukhacitisa kuti bote ikhonde menyeka pa mwala. Mu njira ibodzibodzi, kuwangisa cikhulupiro m’mapikiro a Mulungu cincino, kunadzaticitisa kukhala akukhazikika pyonzi pya nyatwa pingabwera. Mayesero angakwanise kutoma mwakudzidzimusa kakamwe. Maseze basa ya kumwaza mphangwa ya Paulu na Barnabe ikhafuniwa pakutoma ku Listra, makhaliro acinja mwakucimbiza mu nzidzi udafika Ayuda akuti akhali apingizi.—Mach. 14:8-19.
4 Kupirira Kusabweresa Kutsanzaya: Kupitiriza kumwaza mphangwa mwakukhonda tsalakana upingizi kusatipasa ntendere wa manyerezero. Ife tisakomerwa munaoniwa ife kukhala akuthema kuoneswa nyatwa thangwi yakuphedza Kristu. (Mach. 5:40, 41) Kupirira mayesero kusatiphedza kukulisa makhaliro a kucepeseka, kubvera na kupirira mu njira zonsene. (Deut. 8:16; Aheb. 5:8; Tgo. 1:2, 3) Pyenepi pisatipfunzisa kunyindira Yahova, kunyindira mapikiro ace na kuthawira kwa iye.—Mis. 18:10.
5 Ife tisadziwa kuti mayesero ndi a nzidzi wakucepa. (2 Akor. 4:17, 18) Mayesero asatipasa miyai yakupangiza kufuna kwathu kukulu Yahova. Mu kupirira mayesero, ife tingakwanise kupereka ntawiro ku mipambiziro ya Sathani. Ndi thangwi yace nee tisabwerera nduli tayu! ‘Nyakutsanzaya ndi munthu anapirira mayesero thangwi angamala anadzatambira nthimba ya moyo.’—Tgo. 1:12.
[Caption on page 1]
(Ikupitiriza pa tsa. 2 coluna 3)
[Caption on page 2]
Anapirira Mayesero (Upitirizo)