Ife Tisalemedza Kakamwe Miyai Yathu!
1 Kutomera kukhalapo kwa anthu, Yahova apereka kwa anzakazi ace miyai mizinji yakusiyana-siyana. Iye aapasa miyai mwakukhonda kutsalakana khala ndi mamuna peno nkazi, thunga yawo, peno makhaliro awo a umaso. (Luka 1:41, 42; Mach. 7:46; Afil. 1:29) Kodi ndi miyai ipi inapereka iye kwa ife lero?
2 Mingasi Ya Miyai Yathu: Ife tiri na mwai wa kupfunziswa na Yahova. (Mat. 13:11, 15) Mwai unango uli na ife ndi kusimba Yahova kubulukira m’matawiro athu m’misonkhano yathu ya mpingo. (Sal. 35:18) Tingakhala na mwai wakutawira, ife tisacita pyenepi mwaphinga. Mu njira ibodzibodzi, tingaona kupitawirira kwathu konsene m’mpingo ninga mwai, tidzakwanirisa kupitawirira kweneku mu njira yadidi kakamwe inakwanisira luso yathu. Kodi ife tisacita khundu mwakukhonda phonya m’mwai wa kucenesa na kusasanyira Nyumba ya Umambo?
3 Maseze mamiliyau a anthu asabvunzika khala maphembero awo asabviwa na Mulungu, ife tiri na mwai wa kubverwa maphembero athu na Munthu wankulu kakamwe wa kudzulu na pantsi. (Mis. 15:29) Yahova ene asabvesera maphembero a anzakazi ace. (1 Ped. 3:12) Iye nkhabe ikha madire a nzidzi unafunika ife kunfikira m’phembero tayu. Ndi muoni wakulemedzeka tani uli ife, wakuphembera mu “midzidzi yonsene” inafuna ife!—Aef. 6:18.
4 “Anyakuphedza A Mulungu”: Ubodzi wa mwai wathu wadidi kakamwe ndi wa kumwaza mphangwa zadidi za Umambo wa Mulungu ninga “anyakuphedza a Mulungu.” (1 Akor. 3:9) Iyo ndi basa inabweresa citsanzayo na cithonthoso. (Jwau 4:34) Yahova nee akhafunikira kuphatisira anthu towera kucita basa ineyi, mbwenye iye atipasa basa ineyi ninga cipangizo ca kutifuna kwace. (Luka 19:39, 40) Mukucita tenepo, Yahova hadapasa mwai unoyu kwa munthu onsene mbakhonda kusankhula tayu. Ale anacita khundu mu utumiki unoyu wapakweca asafunika kukwanirisa na kukhala na makhaliro akuthema auzimu. (Iza. 52:11) Kodi ife tisapangiza kuti tisalemedza mwai unoyu mukucita utumiki kukhala khundu yakufunika kakamwe m’mabasa athu a sumana na sumana?
5 Miyai yakubuluka kwa Yahova isaphindulisa umaso wathu. (Mis. 10:22) Lekani kuiona ninga yakusowa basa tayu! Tingalemedzadi miyai yathu ya basa, tinakomeresa Babathu wakudzulu, Mpasi wa “misapo yadidi yonsene na myoni yakulungama kakamwe yonsene.”—Tgo. 1:17.