Khalani Na Cifuno Ca Kucitisa Pfunziro Ya Biblya

¹ “Thukulani maso, yang’anani maminda ali kuchena thangwi pinthu pyamala kola.” (Jwau 4:35) Mwandimomwene mafala anewa adalongwa na Yezu Kristu asaphata basa ku makhaliro anagumanikana na anzakazi Acikristu lero.

² Anthu a ntima wadidi akuti asafuna kupfunziswa na Yahova aciri kugumanika basi. Pyenepi pisaoneka na cilengeso ca anyakupfunza apswa anabatizwa caka na caka. Khala imwe muli wakufunisisa kucitisa pfunziro ya Biblya, kodi musafunika kucitanji?

³ Khalani Na Cifuno: Cakutoma, khalani na cifuno ca kutomesa na kucitisa pfunziro ya Biblya yakukhonda phonya. Kumbukani cifuno canu munaenda imwe ku utumiki wa m’munda. Nakuti basa yathu Yacikristu isaphataniza kupfunzisa, pabodzi na kumwaza mphangwa, ife tonsene tisafunika kuwangisira towera kuthimizira kucita kwathu khundu m’basa ya kucitisa pfunziro ya Biblya.—Mat. 24:14; 28:19, 20.

⁴ Ntsonga Zinango Towera Kuzikumbukira: Phembero yakubulukira mu ntima ndi yakufunika kwa amwazi mphangwa a Umambo. M’midzidzi inango tisagumana anthu akuti acita phembero towera aphedzwe mwauzimu. Ndi mwai tani kuphatisirwa na Yahova towera kugumana na kupfunzisa anthu anewa!—Ageu 2:7; Mach. 10:1, 2. 

⁵ Mulongo unango aphembera towera akhale na pfunziro ya Biblya na buluka penepo agawira pimatsamba pya Gostaria de aprender mais a respeito da Bíblia? ku basa yace. Mudatambira nkazi unango katsamba keneka, akaleri konsene, na atoma kudzadza kuponi, mulongo alonga naye na akwanisa kutomesa pfunziro ya Biblya.

⁶ Amwazi mphangwa anzanu akuti ndi aluso mu kutomesa na kucitisa mapfunziro a Biblya angakwanise kukuphedzani towera mukwanirise cifuno canu ca kucitisa pfunziro ya Biblya. Phemberani towera mukwanise kukhala na pfunziro, na phatisirani piphedzo pyonsene pinagumanika towera mukwanirise cifuno canu. Panango mwakukhonda dembuka munadzatsanzaya na kucitisa pfunziro ya Biblya.