Gawirani Marevista Akuti Asapereka Umboni Wa Undimomwene
1 A Sentinela Anunciando o Reino de Jeová na revista inzace Despertai!, ikupitiriza kucita khundu yakufunika kakamwe ya basa ya kumwaza mphangwa za Umambo na kucita anyakupfunza. (Mat. 24:14; 28:19, 20) Ife tisakomerwa na kugawira mwakukhonda phonya marevista anewa mawiri a ndzidzi wakuthema munacita ife khundu m’mabasa akusiyana-siyana a Umambo.
2 M’piaka pizinji ife taona kucinjika kwa kukula na pyankati mwa marevista anewa pabodzi na njira za kuagawira. Macinjo anewa acitwa na cifuno cakuti marevista akhale akukomeresa na akuphindulisa kakamwe, towera kucitisa kuti mphangwa za Umambo zikhuye mitima ya ‘anthu a ntundu onsene kuti apulumuke na towera akhale na cidziwiso cakulinganira ca undimomwene.’—1 Tim. 2:4.
3 Kutomera nthanda ya Thongwe ya 2006, ife tadzakhala a luso kakamwe mukuphatisira njira zakusiyana-siyana za kugawira revista ibodzi ya Despertai! Cincino tinadzaphatisirambo njira zakusiyana-siyana towera kugawira ibodzi mwa marevista mawiri anabuluka pa nthanda A Sentinela Anunciando o Reino de Jeová mu utumiki wathu wapakweca. Maperekero umboni akukhonda nensa a revista ibodzi na ibodzi asagumanika pa tsamba yakumalisa ya Utumiki Wathu Wa Umambo. Kazinji kene maperekero umboni anewa asagomezera ubodzi mwa misolo yakutoma ya mu revista, mbwenye ndimomwene kuti m’midzidzi inango misolo yakukhala na ntsonga zakuti anthu angakwanise kukomerwa nazo isagomezerwambo. Maperekero umboni anewa angakwanise kuphatisirwa mwakuphindulisa kakamwe khala tisadziwa mwadidi nsolo unafuna kugomezera ife na kuphatisira mafala athu ene mbiticinja maperekero umboni mwakubverana na cisa cathu.
4 Maseze Utumiki Wathu Wa Umambo usaphataniza maperekero umboni mawiri a revista ibodzi na ibodzi, khalani waufulu kuphatisira maperekero umboni onsene anafuna imwe. Thangwi ibodzi ya kucita pyenepi ingakwanise kukhala yakuti ubodzi mwa misolo inango ungakhale wakufunika kakamwe mu cisa canu. Peno mungakwanise kupibva kuti munakwanisa kupereka umboni wakuphindulisa mukuphatisira nsolo unango wakuti wakukhuyani kakamwe.
5 Munakhunganya Tani Maperekero Anu Umboni: Cakutoma, dziwani mwadidi nsolo udasankhula imwe towera kuugomezera. Nee pinakwanisika kuti ndzidzi onsene mudziwe misolo yonsene mu revista mbumusati kuigawira mu utumiki wa m’munda tayu. Mbwenye, imwe musafunika kukhala wakugalamuka na wacinyindiro pakulonga misolo idasankhula imwe towera kuigomezera. Mungakwanise kucita pyenepi khala muli wakudzoloerana na mphangwa zinalonga imwe.
6 Caciwiri, khalani na luso yakucinja mwakucimbiza mafala anu pakufuna kulonga mafala akutoma. Mbvunzo wakucitisa kufuna wakuti usabverana na nsolo ungakwanise kucitwa towera kutomesa makani. Ndzidzi onsene nyindirani mphambvu ya Mafala a Mulungu towera kukhuya ntima. (Aheb. 4:12) Sankhulani lemba ibodzi yakuthema yakubverana na ntsonga idalonga imwe, pingakwanisika lemba yakuti iri pa ndima peno yatcululwa mu nsolo unagomezera imwe. Fokotozani kuti tinabveranisa tani lemba na nsolo wa revista.
7 Pa Miyai Yonsene: Towera maperekero umboni akhale akuphindulisa kakamwe, asafunika kuphatisirwa. Citani khundu m’basa yakugawira marevista pabodzi na mpingo Nsabudu. Gawirani marevista kwa anthu akuti atambira kale mabukhu anango. Ndzidzi onsene gawirani marevista kwa anyakupfunza anu a Biblya na kwa anthu anango akuti mungakwanise kuagumana pakucita ulendo wakubwereza. Imwe mungakwanise kugawira marevista kwa anthu analonga na imwe pakuenda ku nsika, pakucita ulendo, peno pa mbuto yakudikhira dotoro. Sasanyirani maperekero anu umboni munaaphatisira imwe nkati mwa nthanda.
8 Marevista A Sentinela na Despertai! ndi akupambulika. Iwo asakuza Yahova ninga Ntongi wankulu wa kudzulu na pantsi. (Mach. 4:24) Iwo asabalangaza anthu na mphangwa zadidi za Umambo wa Mulungu na asacitisa anthu kukhulupira Yezu Kristu. (Mat. 24:14; Mach. 10:43) Mwakuthimizira, iwo asapitiriza kulonga pyakucitika pya dziko munakwanirisa ipyo profesiya ya Biblya. (Mat. 25:13) Phedzani anthu mu cisa canu kuti aphindule na marevista anewa mu kukhunganyika towera kuagawira m’midzidzi yonsene yakuthema!
9 Mungapembera pa kugawira marevista, peno pakucedza pyauzimu mwa uxamwali na munthu unango, khunganyani mbvunzo peno mafala akucitisa munthu kunyerezera towera kufungula njira yakucita ulendo wakubwereza na kucita makani anango auzimu. Khala ndife aphinga mu kudzwala mbeu za undimomwene, tingakwanise kukhala na cinyindiro cakuti Yahova anadzafungula mitima ya ale akuti asafuna na ntima onsene kundziwa na kuntumikira Iye.—1 Akor. 3:6.
[Study Questions]
1. Kodi basa ya A Sentinela na Despertai! ndi yanji?
2. Kodi ndi macinjo api adacitwa mu A Sentinela na Despertai!, na thangwi yanji?
3. Kodi marevista anadzaphatisirwa tani mu utumiki?
4. Thangwi yanji pinakhala pyakuphindulisa kuphatisira maperekero umboni anango kusiyapo anagumanika mu Utumiki Wathu Wa Umambo?
5. Mbamusati kukhunganya maperekero umboni a revista, kodi musafunika kucitanji?
6. Kodi tinakwanisa tani kukhunganya maperekero umboni athu ene?
7. Kodi tinakwanisa tani kupitiriza kusasanyira maperekero athu umboni?
8. Kodi A Sentinela na Despertai! ndi akupambulika mu njira zipi?
9. Kodi tinakwanisa tani kuikha phata ya ulendo wakubwereza?