Kukumbuka Ciomboli Mwakupangiza Kupereka Takhuta
1 Mu kubvera ntemo wa Yezu, kuzungulira dziko yonsene yapantsi Akristu anadzagumanyikana N’sabudu, 22 ya nthanda ya Murope, dzuwa ingabira towera kucita cikumbuso ca kufa kwa Yezu Kristu. (Luka 22:19; 1 Akor. 11:23-26) Ife tisakulumizika kucita pyenepi mu kupangiza kupereka kwathu takhuta thangwi ya pidacitwa pa ntsiku ineyi m’piaka 1.975 ndulimu. Mu kukoya umumphu waungwiro mpaka kufa mu njira yakubva kupha kakamwe pa ntanda wakusikimiza, Yezu acenesa dzina ya Babace, mbapereka ntawiro wadidi ku uxoli wa Sathani.—Yobe 1:11; Mis. 27:11.
2 Ciropa ca Yezu cacitisa kuti cibverano cipswa ciphate basa, mbicicitisa kuti anthu akusowa ungwiro akwatiwe mbakhala ninga ana a Mulungu na cidikhiro cakutonga pabodzi na Kristu mu Umambo wakudzulu. (Yer. 31:31-34; Mko. 14:24) Pontho, Mulungu apangiza mwapakweca kuti asafuna kakamwe anthu mu kupereka Mwanace wapantima ninga ntsembe, ninga mudafokotozera Yezu ene kwa Nikodemu.—Jwau 3:16.
3 Cemererani Anango: Utumiki Wathu Wa Umambo wa nthanda ya Thongwe wapereka maonero a kucita ndandanda wa anyakudziwana nawo na kuapasa ncemerero wawo ene. Kodi mwatoma kucemerera ale ali pa ndandanda wanu? Kodi mwatoma kucita masasanyiro akucita khundu mwakukwana m’basa yakugawira micemerero yakuti inatoma pa 1 ya nthanda ya Murope, towera kucemerera anthu ku Cikumbuso? Ale anafuna kudzagumanika anadzabva mphangwa za Malemba zakuti zingakwanise kuwangisa cikhulupiro ku ciomboli na kutsogolera ku umaso wakukhonda mala.—Arom. 10:17.
4 Onsene ale anakwanisa asafunika kucita masasanyiro akufika nakweru towera kupasa bweraniko ale adatawira ncemerero wakupambulika. Nakuti kazinji kene anthu asanjipa pa Cikumbuso, ndi pyakufunika kwa ife kutsalakana mwadidi anthu apswa pabodzi na anango akuti nee asagumanika pa misonkhano m’midzidzi yonsene.
5 Khunganyani Ntima Wanu: Examine as Escrituras Diariamente — 2008 na Calendário wa 2008 ali na ndandanda wakupambulika wa kuleri Biblya pa ndzidzi wa Cikumbiso wakuti unatoma pa 17 ya nthanda ya Murope. Kudinga pinthu pyakufunika pidacitika nkati mwa ntsiku zakumalisa za umaso wa Yezu wa pa dziko yapantsi, kunadzakuphedzani kukhunganya ntima wanu towera kucita Cikumbuso. (Esd. 7:10) Phembero pabodzi na kunyerezera mwacidikhodikho pa pyakucitika pyenepi pinadzathimizira kupereka kwanu takhuta thangwi ya kufuna kwa Yahova na Mwanace mu kupereka ciomboli.—Sal. 143:5.
6 Munafika duzi ndzidzi wa Cikumbuso, tendeni tikhunganyike mwacidikhodikho na kuphedza anango kuti akhunganyikembo towera tigumanike pa cakucitika ceneci cakufunika kakamwe. Kukumbuka ciomboli mwakupereka takhuta kunadzawangisa uxamwali wathu na Yahova pabodzi na Mwanace. (2 Akor. 5:14, 15) Pontho kunadzatikulumiza kuasangizira mu kupangiza kufuna kwakuzimana kwa anango.—1 Jwau 4:11.
[Study Questions]
1, 2. Thangwi yanji tisafunika kukumbuka ciomboli mwakukomerwa?
3. Kodi anadzaphindula tani ale anafuna kudzagumanika pa Cikumbuso?
4. Thangwi yanji tisafunika kufika nakweru pa Cikumbuso?
5. Kodi munakwanisa tani kukhunganya ntima wanu pa cakucitika ceneci?
6. Kodi kuthimizira kupereka kwathu takhuta ku ciomboli kunadzatikhuya tani?