“Kwatani Ntolo Wanga”
1 Mu dziko yakudzala na pikakamizo na pidzudzumiso, ife tisakhala a ufulu wandimomwene tingacita pinthu mwakubverana na ncemerero wadidi wa kugumana ntendere peno utsanzayi unapasa Yezu anthu pantsi pa ntolo peno gole yace. (Mat. 11:29, 30) Kutawira ntolo peno gole yakukhala nyakupfunza kusaphataniza kucita basa yakuti si yakunensa basi tayu mbwenyembo yakutsanzayisa. Kusaphataniza kumwaza mphangwa zadidi za Umambo na kuphedza anango towera agumane utsanzayi pabodzi na ife pantsi pa gole yadidi ya Yezu.—Mat. 24:14; 28:19, 20.
2 Utsanzayi Kubulukira Ku Utumiki: Yezu nee aphemba atowereri ace kuti athimizire ntolo wace pa mitolo yawo tayu. Iye aaphemba kuti acinje mitolo yawo yakulemera na yace yakululupa. Ife nee tiri kuthimbanabve na pidzudzumiso na kusowa cidikhiro kwa makhaliro ano a pinthu tayu; pontho nee tisawangisira kukhala na pfuma zakukhonda kunyindirika. (Luka 21:34; 1 Tim. 6:17) Maseze tikhale na pyakucita pizinji na tisafunika kuphata basa towera tigumane pyakufunika pya ntsiku na ntsiku, ife tisaikha kulambira Mulungu pa mbuto yakutoma mu umaso wathu. (Mat. 6:33) Ndzidzi onsene tinadzaona utumiki kukhala wakutsanzayisa, tayu wakunensa, tingakhala na maonero adidi a pinthu pyakufunika kakamwe.—Afil. 1:10.
3 Mwacibaliro, ife tisakomerwa kulonga pyonsene piri mu ntima mwathu. (Luka 6:45) Akristu onsene asatsalakana kakamwe Yahova na nkhombo za Umambo zidapikira iye. Natenepa, ndi pyakutsanzayisa tani kulonga pya “mphangwa zadidi” za pinthu pyadidi na kuduwala pidzudzumiso pyathu munacita ife khundu mu utumiki! (Arom. 10:15) Inde, tingacita cinthu cibodzi cene mu ndzidzi uzinji, tisadzoloerana naco na tisadzacicita mwakutsanzaya kakamwe. Na thangwi ineyi, kubvunga ndzidzi uzinji mu utumiki, tingapikwanisa, kunadzabweresa utsanzayi wakuthimizirika. Na ndi pyakutsanzayisa tani kuona anthu mbakatawira mphangwa zinamwaza ife! (Mach. 15:3) Maseze tigumane anthu akuti nkhabe funa kubva peno akupingiza, utumiki unadzabweresa citsanzayo cauzimu tingakumbuka kuti kuwangisira kwathu kusakomeresa Yahova na kuti maphindu onsene anadzakhala mwakubverana na nkhombo zace.—Mach. 5:41; 1 Akor. 3:9.
4 Mu kutawira ncemerero wa Yezu, ife tisakhala na mwai wa kutumikira pabodzi na iye ninga Mboni za Yahova. (Iza. 43:10; Apok. 1:5) Nkhabepo cinthu cakuti cingakwanise kubweresa citsanzayo cikulu kupiringana ceneci!