Kukhunganyika — Phata Ya Maulendo Akubwereza Akuphindulisa
1 Yezu akhunganya mwadidi anyakupfunzace towera akhale amwazi akuphindulisa a ‘mphangwa zadidi za umambo.’ (Mat. 4:23; 9:35) Yezu aapfunzisa mu ndzidzi ukhamwaza iwo mphangwa mu Palestina basi. Mbwenye, mbasati kuenda kudzulu, Yezu adziwisa kuti utumiki Wacikristu mbudagumanika pa dziko yonsene yapantsi towera kucita ‘anyakupfunza anthu a mitundu yonsene.’—Mat. 28:19, 20.
2 Basa ineyi mbidaphataniza kucita maulendo akubwereza kwa anthu adapangiza kuti asafuna kubva mphangwa zadidi za Umambo wa Mulungu na kuapfunzisa kuti akoye pinthu pyonsene pidatonga Kristu. Towera kucita maulendo anewa akubwereza akuphindulisa, tisafunika kukhunganyika mwadidi.
3 Khunganyikani Mwanyapantsi: Amwazi mphangwa anango asawangisira towera kusiya mbvunzo kunkhomo kwa ulendo wakutoma na buluka penepo asalonga kuti anabwera pontho towera kudzadinga ntawiro. Iwo asaona kuti kutculula mphangwa zinagumanika m’bukhu Biblya Isapfunzisanji pa ulendo wakubwereza kusaaphedza mbukuacitisa kutomesa pfunziro ya Biblya.
4 Kukhala na marevista a ntundu ubodzi basi nee pisabveka kuti tisafunika kudikhira mpaka kutambira marevista a nthanda inango mbatisati kucita ulendo wakubwereza tayu. Mphyakukwanisika kukulisa cifuno ca anthu mu kudinga mphangwa zidagomezerwa mu revista idamala kuleri munthu unoyu.
5 Khalani Na Cifuno: Mbamusati kucita ulendo wakubwereza, bvungani mphindi zingasi towera kudinga pyakulemba pyanu na kusankhula pinafuna imwe kucita. Mwacitsanzo, dingani ntsonga m’bukhu idasiya imwe. Peno siyani mabukhu anango akuti asabverana na ntsonga idadinga imwe pa ulendo wakutoma. Khala mwasiya mbvunzo pa ulendo wakutoma, mwandimomwene cifuno canu cinadzakhala cakutawira mbvunzo unoyu. Munagomezera imwe lemba yakuti isaphedzera ntsonga inadinga imwe, wangisirani kuleri kubulukira m’Biblya mwene.
6 Cifuno Cathu: Mwandimomwene, cifuno cathu ndi ca kutomesa pfunziro ya Biblya. M’bale unango akhafuna kutomesa pfunziro ya Biblya pa ulendo wakubwereza, mbwenye mamuna akhonda. Ntsiku inango m’bale abwerera pontho na marevista apswa mbalonga: “Lero tiri kutawira mbvunzo ubodzi unacita anthu unagumanika m’Biblya.” Pakumala kubva matawiro a mamuna, m’bale aleri lemba na ndima yakuthema ya bukhu inaphatisirwa pa mapfunziro a Biblya. Pyenepi pyacitisa kuti pfunziro yakukhonda phonya ya Biblya itomeswe.
7 Kubvunga ndzidzi towera kukhunganyika kusacitisa kuti maulendo akubwereza akhale akuphindulisa kakamwe. Kukomerwa kwathu kunadzathimizirika, na panango ife tinadzakhala na mwai wa kuphedza ‘onsene ale adasankhuliwa’ moyo agumane njira ya ku umaso.—Mach. 13:48.
[Study Questions]
1. Kodi utumiki wa Akristu akutoma mbudagumanika mpaka papi?
2. Kodi kubvera ntemo wa Yezu ‘wakucita anyakupfunza’ kusaphatanizanji?
3. Ngakhale pa ulendo wakutoma, kodi munakwanisa tani kufungula njira towera kucita ulendo wakubwereza?
4. Thangwi yanji ife nkhabe funika kudembuka kucita ulendo wakubwereza mpaka kutambira marevista mapswa?
5. Kodi kukhala na cifuno pa kucita ulendo wakubwereza kusaphindulisa mu njira ipi?
6. Kodi cifuno cathu pa kucita maulendo akubwereza ndi cipi?
7. Kodi kukhala wakukhunganyika mwadidi kunakuphedzani tani towera kutomesa pfunziro ya Biblya?