Pfunzisani Anango Kuti Afune Yahova
1 Musakumbuka n’dzidzi wakutoma udabva imwe pya Yahova? Ndi ninji cidakucitisani kunfendedzera? Anthu azinji a mitima yadidi anadzakupangani kuti iwo afendedzera dhuzi kakamwe Nciti wathu mu kukhala na cidziwiso ca makhaliro ace akukhonda landanisika, makamaka ntsisi na ufuni wace.—1 Jwau 4:8.
2 ‘Uyu Ndi Mulungu Wathu’: Bukhu yakuti Biblya Isapfunzisanji isagomezera ufuni wa Yahova na kufunika kwa uxamwali wa pantima na iye. Tinakwanisa tani kuphatisira bukhu ineyi towera kupfunzisa anango kuti athimizire kufuna kwawo Mulungu? Munadinga ife ntsonga ipswa, tinakwanisa kucita mibvunzo yakuti inacitisa nyakupfunza kunyerezera, ninga iyi: “Undimomwene uyu usapangizanji thangwi ya Yahova?” peno “Ndi mu njira ipi ntsonga iyi isapangiza kuti Yahova ndi Baba wadidi kakamwe wakuti munthu onsene asanfuna?” Kupfunzisa mu njira ineyi kunakwanisa kuphedza nyakupfunza kukhala na uxamwali wa kuenda na kuenda na Yahova.
3 Munaphedza ife anyakupfunza Bhibhlya kudziwa kuti ndi mwai tani kukhala na cidziwiso ca Mulungu m’bodzi basi wandimomwene na wamaso, iwo anadzadzindikira, ninga mafala a Izaiya, ‘uyu ndi Mulungu wathu.’ (Iza. 25:9) Munafokotoza ife Mafala a Mulungu, tisafunika kugomezera kuti mbumba ya anthu inadzapaswa tani nkhombo thangwi ya kukwanirisika kwa mapikiro a Yahova mukuphatisira utongi wace wa umambo pantsi pa Kristu Yezu.—Iza. 9:6, 7.
4 Cipangizo Ca Kufuna Yahova: Ife tisadziwa kuti kufuna Yahova na ntima onsene, moyo, na nzeru kusaphataniza pizinji kupiringana kulonga kwene basi kuti ndisafuna kakamwe Mulungu. Ife tisafunika kukhala na kuphatisira njira yace ya kunyerezera. (Sal. 97:10) Kufuna Mulungu kusapangizwa na kubvera matongero ace onsene na kupitiriza kucita ‘mabasa akucena a makhaliro na pyakucita pyakuperekeka kwaumulungu,’ ngakhale pakuthimbana na mayesero na mitcingo.—2 Ped. 3:11, Tradução do Novo Mundo, 2 Jwau 6.
5 Kucita cifuno ca Mulungu thangwi ya kunfuna ndi pyakukomeresa. (Sal. 40:8) Nyakupfunza Bhibhlya asafunika kudzindikira kuti matongero onsene a Mulungu aikhwa towera kuphindulisa anzakazi Ace kuenda na kuenda. (Deut. 10:12, 13) Mukukhala wakubverana na citsogolero ca Yahova, munthu asapangiza kupereka takhuta wankulu thangwi ya mabasa Ace onsene adidi. Phedzani nyakupfunza kudziwa kuti kufamba mwakubverana na njira zaulungami za Yahova kunadzacitisa munthu kucalira nyatwa zizinji.
6 Kupasa Nkhombo Ale Anafuna Mulungu: Yahova asatsalakana kakamwe anthu akucepeseka ananfuna, na iye asaapangiza pinthu “[pyakubisika] mu ntima mwa Mulungu.” (1 Akor. 2:9, 10) Na cidziwiso ceneci ca pifuniro pya Yahova, iwo ali na maonero adidi a kutsogolo na cidikhiro cakunyindirika. (Yer. 29:11) Ale anafuna Yahova asadzakhala akuphindula kakamwe na udidi wace. (Eks. 20:6) Iwo asakhala na cidikhiro ca umaso wakukhonda mala thangwi ya ufuni ukulu wa Mulungu kwa iwo.—Jwau 3:16.
7 Tingadziwa mwadidi kakamwe pya Babathu wakudzulu, tinadzakhala na pizinji kakamwe towera kugawana na anango. (Mat. 13:52) Kodi, ndi mwai wadidi tani kupfunzisa anango, na makamaka anathu, kufuna Yahova! (Deut. 6:5-7) Ife, pabodzi na anyakupfunza athu Bhibhlya, tendeni tithimizire kusimba kwathu munatambira ife “udidi” uzinji wa Yahova.—Sal. 145:7.
[Study Questions]
1. Ndi ninji cidacitisa anthu anango kufendedzera Yahova?
2, 3. Tinakwanisa tani kuphatisira bukhu yakuti Biblya Isapfunzisanji towera kuphedza anyakupfunza Bhibhlya kuthimizira kufuna kwawo Yahova?
4, 5. Kufuna Yahova kusabvekanji?
6. Ndi nkhombo zipi zinafuna kutambira munthu thangwi ya kufuna Yahova?
7. Musapibva tani thangwi ya kupfunzisa anango kuti afune Yahova?