Imwe Munakwanisa Kukhala Mpfunzisi!
1 Khundu ibodzi yakuphindulisa kakamwe ya utumiki ndi kupfunzisa munthu undimomwene. Kumuona mbakatawira mphangwa za Umambo na kumphedza kufendezera cifupi Utongi ukulu wa kudzulu na pantsi ndi cinthu cakukomeresa. (Tgo. 4:8) Kupfunzisa munthu wakuti ali na njala ya undimomwene na kumuona mbakacita macinjo akufunika mu umaso wace, m’maonero ace pinthu, na m’makhaliro ace, kusafunika kukhala cifuno ca amwazi mphangwa onsene a Umambo.—Mat. 28:18, 19; [28:19, 20, Tradução do Novo Mundo].
2 Nyindirani Yahova: M’midzidzi yakale, atumiki akukhulupirika akhanyerezera kuti nee mbadakwanisa kucita basa idapaswa iwo na Yahova tayu. Kunyindira Yahova Mulungu kwacitisa Mose, Yeremiya, Amosi na anthu anango akucepeseka kukunda kupenula kwawo peno manyerezero akukhonda kukwanisa kucita basa yakufunika kakamwe. (Eks. 4:10-12; Yer. 1:6, 7; Amosi 7:14, 15) Mpostolo Paulu akhalambo na “chipapo.” Mu njira ipi? Iye alonga kuti pyenepi pikhakwanisika kubulukira kwa “Mulungu wathu.” (1 Ates. 2:2) Inde, ife tonsene tinakwanisa kunyindira Yahova towera atipase ciphedzo, udziwisi, na mphambvu zinafuna ife kuti ticitise mapfunziro a Bhibhlya akuphindulisa.—Iza. 41:10; 1 Akor. 1:26, 27; 1 Ped. 4:11.
3 Tawirani Kupfunziswa: Mpfunzisi wathu Wankulu, Yahova Mulungu, asapereka cipfunziso kubulukira ku programu ya n’dzidzi onsene ya mapfunziro auzimu towera tikwanise kukhala apfunzisi adidi kakamwe. (Iza. 54:13; 2 Tim. 3:16, 17) Tawirani kupfunziswa kweneku mu kubanza miyai yonsene towera kuthimizira kubvesesa kwanu Malemba na kuthimizira luso yanu ya kupfunzisa undimomwene wa Bhibhlya. Ceneci ndi cifuniro cikulu ca Xikola Ya Utumiki Wa Mulungu na Nsonkhano Wa Basa, misonkhano yonsene ya mpingo isatipfunzisa towera kupfunzisa Mafala a Mulungu.
4 Wangisirani towera kupfunza njira zakukhonda nentsa za kupfunzisa ngakhale undimomwene wakuzika wauzimu. Bukhu ya Escola do Ministério, tsamba 227, isafokotoza: “Imwe musafunika kubvesesa mwadidi pinthu pinafuna imwe kulonga kwa anango towera iwombo akwanise kupibvesesa.” Kutawira pa misonkhano kusatiphedza kukoya ntsonga zikulu m’manyerezero athu towera kuziphatisira kutsogolo. Natenepa khunganyikani mwadidi, na cinyindiro ca kupfunzisa kwanu mwadidi cinadzakula.
5 Mwakukhonda penula, kutomera kalene, atumiki Acikristu akhapfunza kubulukira kwa unango na nzace mukhaphata iwo basa pabodzi m’basa yakucita anyakupfunza. (Luka 10:1) Pingakwanisika, bulukani pabodzi na amwazi mphangwa aluso, kuphataniza apainiya, akulu a mpingo, na ayang’aniri a cisa na a gawo, m’basa yakucitisa pfunziro ya Bhibhlya. Onani kuti asaphatisira tani pitsanzo pyakukhonda nentsa na piphedzo pinango pinagumanika m’mabukhu athu towera kufokotoza undimomwene wa Malemba. Aphembeni towera akupangeni kuti munakwanisa tani kukhala mpfunzisi wadidi. (Mis. 1:5; 27:17) Perekani takhuta thangwi ya kupfunziswa kweneku konsene kwakuti ndi—kupfunziswa kwakubuluka kwa Mulungu.—2 Akor. 3:5.
6 Nyindirani Yahova, na phindulani na kupfunziswa kunapereka iye. Phemberani towera muthambaruke. (Sal. 25:4, 5) Imwe munakwanisambo kukhala na citsanzayo cakuphedza munthu unango kukhala ninga imwe, mpfunzisi wa Mafala a Mulungu!
[Study Questions]
1. Ndi mwai upi wakupambulika uli na amwazi mphangwa onsene a Umambo?
2. Thangwi yanji anthu anango anakwanisa kunyinyirika kucitisa pfunziro ya Bhibhlya, na ndi ninji cinafuna kuaphedza towera kukunda nyatwa ineyi?
3, 4. Ndi kupfunziswa kupi kuli na ife towera kutiphedza kuti tipfunzise Mafala a Mulungu?
5. Ndi kupfunziswa kupi kwakuthimizirika kuli na ife m’mpingo towera kutiphedza kuthambaruka ninga apfunzisi?
6. Ndi ninji cinafunika makamaka towera kukhala mpfunzisi wa Mafala a Mulungu?