Kodi Munatomesa Pfunziro ya Bhibhlya mu Nthanda ya Malandalupya?

1. Kodi ndi mabukhu api anafuna kugawirwa mu nthunda ya Malandalupya?

¹ Mabukhu anafuna kugawirwa mu nthanda ya Malandalupya ndi marevista A Sentinela na Despertai! Towera kukulisa cifuno, tisawangiswa kupangiza katsamba kakuti Kodi Musafuna Kudziwa Undimomwene? na kuwangisira towera kutomesa pfunziro ya Bhibhlya. Kodi tinakwanisa tani kucita pyenepi pa ulendo wakubwerezera?

2. Kodi tinakwanisa tani kuphatisira katsamba kakuti Kudziwa Undimomwene towera kutomesa pfunziro ya Bhibhlya tingacita ulendo wakubwereza kwa munthu adatambira marevista?

² Tinaphatisira Tani Katsamba Keneka: Tinakwanisa kulonga kuti: “Marevista adakusiyirani ine asawangisa anthu a ntundu onsene na marelijiau onsene towera kudinga Bhibhlya. [Pasani mwanaciro nyumba katsamba kakuti Kudziwa Undimomwene,na pangizani mibvunzo inagumanika pa tsamba yakutoma.] Iyi ndi mibvunzo mingasi yakufunika yakuti Bhibhlya isapereka matawiro akutsanzayisa. Kodi mwabvunzika kale ubodzi wa mibvunzo ineyi?” Pakumala kubva ntawiro wa mwanaciro nyumba, dingani pabodzi ntawiro wa mbvunzo unagumanika pa katsamba, na lerini lemba ibodzi yakusowa mafala mu ndima. Patsogolo pace longani kuti ici ndi citsanzo cing’ono ca pinapfunzisa Bhibhlya, na mpaseni bukhu yakuti Biblya Isapfunzisanji. Buluka penepo tinakwanisa kudinga ndima yakutoma ya nsolo udasankhula iye pa tsamba ya pya m’nkati. Peno tinasankhula kufungula mphangwa zakuthimizirika zinabverana na pire pidalonga ife mu katsamba keneka. Iyi ndi mithonyezo yakuti tinakwanisa kuiphatisira:

● Kodi Mulungu asatitsalakanadi? (matsa. 9-11, ndima 6-10)

● Kodi nkhondo na nyatwa zinadzamala? (tsa. 12, ndima 12-13)

● Kodi ndi ninji pinacitika kwa ife tingafa? (matsa. 59-60, ndima 7-8)

● Kodi pali cidikhiro kwa anyakufa? (tsa. 71, ndima 13-15)

● Kodi ndinakwanisa tani kuphembera mbindibviwa na Mulungu? (matsa. 166-167, ndima 5-8)

● Kodi ndinakwanisa tani kugumana citsanzayo mu umaso? (tsa. 9, ndima 4-5)

3. Kodi tinacinja tani maperekero athu umboni mwakubverana na makhaliro?

³ Mwandimomwene, khala makhaliro nkhabe tawirisa kutomesa na kupangiza macitiro a pfunziro m’bukhu yakuti Biblya Isapfunzisanji pa ulendo wakutoma wakubwereza, tinakwanisa ndzidzi onsene kucita masasanyiro towera kubwerera na kupitiriza kucedza kwathu. Mwakubverana na cifuno ca munthu, panango tinakwanisa kusankhula kudinga mibvunzo mizinji mu katsamba pa maulendo mazinji akubwereza mbatisati kutoma na bukhu. Tisafunika kuphatisira mwadidi katsamba keneka pa nthanda ya Malandalupya towera kutomesa pfunziro ya Bhibhlya na kuphedza anthu a ntima wadidi kudziwa undimomwene.—Jwau 8:31, 32.