Kodi Musadziwa Pisankhulo Pyanu?

Maoperasau akukhonda kuphatisira ciropa asacitwa mu nyumba za ungumi zakuti zikuthimizirika kuzungulira dziko yonsene yapantsi. Kodi imwe musapidziwa pisankhulo pinagumanika m’maukonzi akukhonda kuphatisira ciropa? Imwe musafunika kudziwa toera kucita cisankhulo mbamudziwa mphangwa zinaphatanizwa mu ukonzi na operasau. Onani vidyu yakuti Sem Sangue: A Medicina Encarou o Desafio. Buluka penepo, phemberani thangwi ya pyenepi na bwerezerani pidapfunza imwe mukuphatisira mibvunzo inagumanika pantsi apa.—Cenjezo: Nakuti vidyu isaphataniza pipangizo pyacigwagwa pya operasau, anyakubala asafunika kuphatisira nzeru mu kuona vidyu ineyi na ana ang’ono.

(1) Kodi ndi ipi thangwi ikulu inacitisa Mboni za Yahova kukhonda kuikhwa ciropa? (2) Pyenepi pingaphataniza ukonzi, kodi Mboni za Yahova zisafuna kucitanji? (3) Kodi atenda ali na ufulu upi? (4) Thangwi yanji ndi kwakuthema na kwakupitawirira kusankhula mitombwe yakupitira m’mbuto mwa ciropa? (5) Pangaoneka kuluzika kwa ciropa, kodi ndi njira ziwiri zipi zinafunika madotoro kuphatisira mwakucimbiza? (6) Kodi ndi midida ipi minai ya mitombwe yakupitira m’mbuto mwa ciropa? (7) Kodi adotoro anakwanisa tani (a) kucepesa kuluzika kwa ciropa, (b) kukoya maselula akufwira a ciropa, (c) kuinjipisa ciropa, na (d) kubwerezera ciropa cidaluzika? (8) Fokotozani macitiro akudziwika ninga (a) hemodiluição na (b) recuperação intraoperatória de células. (9) Kodi ndi ninji pinafunika imwe kudziwa pya mitombwe yakupitira m’mbuto mwa ciropa? (10) Kodi mphyakukwanisika kucita operasau yakugopswa na yakunentsa mwakukhonda kuphatisira ciropa? (11) Kodi ndi uthambaruki upi wakuphindulisa unacitika nkati mwa ukonzi?

Kutawira ukonzi unango udapangizwa mu vidyu ndi cisankhulo ca munthu ekhene mwakubverana na cikumbuntima cakupfunziswa na Biblya ca munthu m’bodzi na m’bodzi. Kodi mwasankhula ntundu wa ukonzi na pinafuna imwe kuti picitwe pa ukonzi kwa imwe ene na kwa ananu mwakukhonda kakamizwa na kulemba phaso ya DPA? (Diretrizes Antecipadas Relativas a Tratamentos de Saúde e Outorga de Procuração) Toera kudinga mphangwa zenezi mwakukwana, onani mwacidikhodikho “Perguntas dos Leitores” mu revista ya A Sentinela ya 15 de Junho de 2004 na ya 15 de Outubro de 2000. Buluka penepo phatisirani n’thimiziro mu Utumiki Wathu Wa Umambo wa nthanda ya Bingu ya 2006, “Kodi Ndisaona Tani Makhundu Mang’onong’ono A Ciropa Na Ukonzi Unaphataniza Ciropa Canga Cene?” toera kucita pisankhulo pyanu pyene thangwi ya pinthu pyenepi khala munatawira peno munakhonda. Pakumalisa, khalani na cinyindiro cakuti mwalemba pisankhulo pyanu pa phaso ya DPA. Anthu adasankhula imwe kuti akulimirireni pontho na acibale anu onsene akuti si Amboni tayu asafunikambo kudziwa mwadidi pisankhulo pyanu.