Siyani “Cheza Chanu Chioneke”
1. Ndi mwai upi uli na ife toera kugawira anango?
1 Kubulukira m’mambakuca mpaka n’cidodo, kubalika kwa ceza kusapasa mbiri Yahova Mulungu. Mbwenye Yezu akhalonga ntundu unango wa ceza cakuti anyakupfunzace akhafunika akhale naco—“cheza [ca umaso, Tradução do Novo Mundo.]” (Jwau 8:12) Ndi mwai wakupambulika kukhala na ceza ceneci cauzimu kwakuti kusaphataniza mabasa mazinji. Yezu alonga: “Cheza chanu chioneke pa maso pa anthu,” toera kuphedza anango. (Mat. 5:16) Lero, pakati pa cidima cikulu cauzimu, ceza ceneci cisafunika kumwazwa, makamaka mu ndzidzi wathu uno! Tinasiya tani ceza cathu kuoneka ninga pidacita Kristu?
2. Yezu apangiza tani kufunika kwa kumwaza ceza cauzimu?
2 Pakumwaza Mphangwa: Yezu aphatisira ndzidzi wace, mphambvu zace na mpfuma zace toera kudziwisa ceza candimomwene kwa anthu mu zinyumba zawo, mu zimbuto zapakweca na m’mapiri—m’mbuto zonsene zikhagumanika anthu. Iye akhadziwa kuti thangwi yanji kumwaza ceza candimomwene cauzimu kukhali kwakufunika. (Jwau 12:46) Toera kuphedza anthu azinji, Yezu akhunganya anyakupfunzace kukhala “cheza cha pantsi pano.” (Mat. 5:14) Iwo asasiya ceza cawo kuoneka mukucita pinthu pyadidi kwa anyakuendekana na kumwaza undimomwene.
3. Tinapereka tani takhuta thangwi ya ceza caundimomwene?
3 Anthu a Mulungu asatsalakana kakamwe basa ya ‘kufamba ninga ana akumwinikira,’ natenepa iwo asamwaza mphangwa m’mbuto zonsene zinagumanika anthu. (Aef. 5:8) Kuleri Bhibhlya peno mabukhu anango Acikristu pa mbuto yapakweca mu ndzidzi wakupuma kubasa peno kuxikola, kunakwanisa kubweresa mwai toera kumwaza mphangwa. Mu njira ineyi, mulongo m’bodzi wacitsikana atomesa pfunziro ya Bhibhlya na agawira mabukhu axamwali ace a turma akukwana 12!
4. Thangwi yanji kusiya ‘ceza cathu kuoneka’ kusaphataniza makhaliro athu adidi?
4 Na Mabasa Adidi: Kusiya ceza cathu kuoneka kusaphatanizambo makhaliro athu a ntsiku na ntsiku. (Aef. 5:9) Kubasa, kuxikola na mbuto zinango zapakweca, makhaliro Acikristu asaoneka na anango na asabweresa mwai toera kumwaza undimomwene wa Bhibhlya. (1 Ped. 2:12) Mwacitsanzo, makhaliro adidi a mwana wamamuna wa pyaka pixanu pyakubalwa acitisa mpfunzisi wace kucemera anyakubala a mwana unoyu. Mpfunzisi unoyu wa nkazi alonga: “Cipo ndaona kale mwana ninga uyu anadziwa kusiyanisa cadidi na cakuipa!” Mwandimomwene, utumiki wathu na makhaliro athu adidi asakwewera anthu ku “cheza [ca umaso, NM]” na asapasa mbiri Mulungu wathu.