‘Dzina ya Mulungu Iceneswe’
1. Ndi upi nsolo wa programu ya nsonkhano wa cisa wa caka ca basa ca 2012, na wabuluswa kupi?
1 Ndi mwai ukulu kakamwe kwa ife kudziwika na dzina ya Ntongi Wankulu Wakudzulu na Pantsi, Yahova! Mulungu ekhene ndiye adatipasa dzinace, makamaka kutomera caka ca 1931, ninga Mboni za Yahova, tatoma kudziwika na dzina ya Yahova. (Iza. 43:10, Tradução do Novo Mundo) Mwana m’bodzi ekha wa Mulungu, Yezu, apasa ntengo ukulu dzina ya Mulungu, mbaiikha pa mbuto yakutoma mu phembero yace yacitsandzo. (Mat. 6:9, NM) Mafala a Yezu asapasa phata ya nsolo wa programu ya nsonkhano wathu wa cisa wa caka ca basa ca 2012. Nsolo wace ndi wakuti “Dzina ya Mulungu Iceneswe.”
2. Ndi mphangwa zipi zinafuna ife kudikhira pa nsonkhano?
2 Tinadzabvanji: N’Sabudu nsolo wakuti “Citisani Dzina ya Mulungu Kudziwika ninga Atumiki a Ndzidzi Onsene,” unadzadinga thangwi yanji basa ya ndzidzi onsene ndi njira ya umaso wakutsandzayisa. Tinadzabvambo nkhani yakusiyirana ya nsolo wakuti “Calirani Kupasisa Manyadzo Dzina ya Yahova.” Nkhani ineyi inadzatiphedza kucalira kumangwa na misampha minai yakugopswa. Ninji cinafuna kudzatiphedza toera kumwaza mphangwa mwaphinga khala anthu apangiza cifuno cakucepa? Ninji cinafuna kudzatiphedza toera kucita mwakukwana utumiki wathu? Mibvundzo ineyi inadzatawirwa pa nkhani ya nsolo wakuti “Thangwi Yanji Dzina ya Mulungu Isafunika Kuceneswa.” N’Dimingu tinadzakhala na nkhani yakusiyirana ya makhundu manai, inadzadinga kuti tinakwanisa tani kucenesa dzina ya Mulungu kubulukira m’manyerezero athu, malongero, pisankhulo pyathu na makhaliro athu. Anthu apswa anadzakomerwa na nkhani ikulu ya nsolo wakuti, “Yahova Anadzacenesa Dzinace Ikulu pa Harmagedoni.”
3. Ndi mwai upi uli na ife, pontho programu ya nsonkhano inadzatiphedza tani?
3 Mwakucimbiza, Yahova anadzacita pinthu toera kucenesa dzinace. (Ezek. 36:23) Mbudzati kufika ndzidzi unoyu, tiri na mwai wakutsidzikiza pinthu pyonsene pinapangiza dzina yakucena ya Yahova. Tisanyindira kuti programu ineyi ya nsonkhano wa cisa inadzaphedza tonsene toera kukwanirisa mabasa athu ninga anyakukwata dzina ya Mulungu.