Munakwanisa “Kupita Na Ku Masedonya”?
1. Ninji cidacitisa Paulu na axamwali ace kuenda ku Masedonya?
1 Mu caka 49 N.W., (Ndzidzi Wathu) mpostolo Paulu asiya cisa ca Antyokiya wa ku Asirya toera kucita ulendo wace waciwiri wa umisionaryo. Cifuno cace cikhali kucedzera cisa ca Efeso na pisa pinango pya Azya Menori. Mbwenye, iye atambira ncemerero kubulukira ku citsogolero ca nzimu toera “kupita na ku Masedonya.” Mwakutsandzaya Paulu na axamwali ace atawira ncemerero unoyu, pontho iwo akhala na mwai wakukhazikisa mpingo wakutoma mu cisa ceneci. (Mach. 16:9, 10, Tradução do Novo Mundo; Mach. 17:1, 2, 4) Lero, mbuto zinango mu dziko yonsene yapantsi ziri na kufuna kukulu kwa anyabasa akubvuna. (Mat. 9: 37, 38) Munakwanisa kuphedza?
2. Thangwi yanji anthu anango nkhabe kudinga toera kucinja kuenda ku mbuto yakuti iri na kufuna kukulu?
2 Panango imwe muli na nzimu wa umisionaryo ninga wa Paulu, mbwenye mudzati kudinga mwakukwana pya kucinja toera kuenda ku cisa cinango cakusiyana. Mwacitsandzo, panango makhaliro anu nkhabe kukutawirisani toera kupita pa Xikola ya Bhibhlya kwa Abale Akukhonda Kumanga Banja, thangwi ya thunga yanu, peno thangwi yakuti ndimwe ntsikana, peno muli na ana ang’ono. Panango mudzati kudinga pya kucinja toera kuenda ku cisa cakuti ciri na kufuna kukulu thangwi nkhabe cinyindiro cakuti munakwanisa kupfundza cilongero cinango. Peno mwasiya cigawo canu toera kukhala mu nzinda thangwi ya nyatwa za mpfuma mbwenye musalangalira kucinja pontho. Mungamala kudinga mwacidikhodikho, munakwanisa kuona kuti makhaliro anewa nee anakucimwanisani kucinja toera kuenda ku cisa cakuti ciri na kufuna kukulu kwa amwazi mphangwa.
3. Thangwi yanji xikola ya umisionaryo nee ndi phembo toera kupembera pa kumwaza mphangwa mu cisa cakuti ciri na kufuna?
3 Mphyakufunika Kupfundza Xikola ya Umisionaryo? Ninji cidacitisa Paulu na axamwali ace kupembera? Iwo akhanyindira Yahova na nzimu wace wakucena. (2 Akor. 3:1-5) Natenepa, ngakhale kuti makhaliro anu nee asakutawirisani toera kutambira mapfundziro akupambulika, munakwanisa kupitiriza kupembera pa kumwaza mphangwa mu cisa cakuti ciri na kufuna kukulu. Kumbukani, imwe muli kutambira mapfundziro ndzidzi onsene, kubulukira ku Xikola ya Utumiki wa Mulungu na Nsonkhano wa Basa. Khala muli na cifuno cakugumanika pa Xikola ya Bhibhlya kwa Abale Akukhonda Kumanga Banja, kucinja kwanu toera kuenda ku cisa cinango toera kuyesera ntundu unoyu wa basa, kunadzakucitisani kukhala na pyakugumana napyo pyakuti munadzapiphatisira ntsogolo mungathema toera kutambira mapfundziro akuthimizirika.
4. Thangwi yanji anyakugwesera nee asafunika kupwaza nyerezero ya kumwaza mphangwa mu pisa pinango?
4 Anyakugwesera: Abale na alongo akugwesera akukola mwauzimu akuti ali na ungumi wadidi anakwanisambo kuphedza m’mbuto zakuti ziri na kufuna kukulu kwa amwazi mphangwa. Mwasiya kuphata basa ya dziko? Anango akuti asatambira phanceni ya kobiri yakucepa ali akusudzuka toera kucinja kuenda ku mbuto zinango za madziko akuti ntengo wa pinthu ndi wakucepa kupiringana nzinda wa kwawo.
5. Longani cakugumana naco ca m’bale m’bodzi adasiya kuphata basa mbacinja kuenda ku dziko inango?
5 M’bale m’bodzi wakuti ndi nkulu wa mpingo, pontho ndi mpainiya, asiya kuphata basa ku dziko inalongwa Cingerezi, acinja mbaenda ku mbuto inagumanika anthu azinji akubuluka ku madziko anango a Azya Wakubangwe. Acinja toera kaphedza nsoka unalonga Cingerezi, wakuti ukhali na amwazi mphangwa apfemba. Nsoka unoyu wamwaza mphangwa kwa anthu akukwana 30.000 akhakhala mu cisa ceneci akuti abuluka ku madziko anango. Nkati mwa pyaka piwiri, anthu akukwana 50 akhagumanika pa misonkhano ya mpingo. M’bale alemba: “Kucinja kwandicitisa kukhala na nkhombo zadidi kakamwe zakuti cipo ndakhala nazo kale. Ndzidzi nkhabe kunditawirisa toera kulonga nkhombo zenezi!”
6. Longani cakugumana naco ca mulongo wakukhonda kumanga banja adaenda ku cisa cakuti cikhali na kufuna kukulu kwa amwazi mphangwa.
6 Alongo Akuti Adzati Kumanga Banja Peno Azice: Yahova asaphatisira kakamwe alongo toera kumwaza mphangwa zadidi mu pisa pyakuti piri na kufuna kukulu kwa amwazi mphangwa. (Sal. 68:11, NM) Mulongo m’bodzi wacitsikana akhali na cifuno cakuthimizira utumiki wace mu kucinja kuenda ku mbuto yakuti iri na kufuna kukulu, mbwenye anyakubalace akhadzudzumika thangwi ya citsidzikizo cace. Natenepa, iye alembera ofesi ya filiali, mbatambira ciphedzo na mphangwa zinalonga pya kucinja. Iye abuluka pa nyumba mbamala pyaka pitanthatu ku cisa cakuti cikhali na kufuna kukulu, atsandzaya na nkhombo zizinji. Iye alonga: “Pa cisa cidabuluka ine mbindidakhala na miyai yakucepa yakucitisa mapfundziro a Bhibhlya. Mbwenye kutumikira ku mbuto yakuti ikhali na kufuna kukulu, kwandicitisa kukhala na mapfundziro mazinji, pontho kwandiphedza kukulisa luso yanga yakupfundzisa.”
7. Longani cakugumana naco ca banja idacinja kuenda ku mbuto yakuti iri na kufuna kukulu kwa amwazi mphangwa.
7 Mabanja: Khala muli na anapiana, asakucimwanisani kucinja kuenda ku cisa cakuti ciri na kufuna kukulu kwa amwazi mphangwa toera kuendesa kutsogolo basa yakumwaza mphangwa zadidi? Banja ibodzi yakuti iri na ana awiri, m’bodzi wa pyaka pisere unango khumi, yatonga toera kuyesera kucinja. Mama alemba cakugumana naco cawo: “Tiri kupereka takhuta kakamwe nakuti takwanisa kukuza anathu kuno, thangwi acita uxamwali na apainiya akupambulika pontho na amisionaryo. Umaso wathu wapfuma thangwi ya kutumikira ku mbuto yakuti iri na kufuna kukulu kwa amwazi mphangwa.”
8. Mphyakufunika kupfundza cilongero cinango toera kutumikira ku mbuto yakuti iri na kufuna kukulu kwa amwazi mphangwa? Fokotozani.
8 Kudzudzumika na Cilongero: Manyerezero akupfundza cilongero cipswa asakucimwanisani kucinja toera kuenda ku cisa cinango? Panango cilongero canu cisalongwa mu pisa pinango pyakuti piri na kufuna kukulu kwa amwazi mphangwa a Umambo. Pyenepi pisapangizwa mu cakugumana naco ca banja ibodzi yakuti ikhali na cifuno ca kuthimizira utumiki wawo. Pidamala iwo kutambira mphangwa za ofesi ya filiali za mipingo yakuti ikhali na pisa pyakuti pisalonga cilongero cawo, iwo asankhula mpingo ubodzi mbaendako kawiri. Iwo abwerera ku nyumba, apungula kobiri inabvunga iwo pa nthanda, mbakoya kobiri pa caka cibodzi. Pidamala iwo kukhunganyika toera kucinja, abale a ku cisa ceneci aaphedza toera kugumana nyumba ya kobiri yakucepa.
9, 10. Ninji pinafunika kudingwa na ale anasiya dziko yawo mbaenda ku dziko inango, thangwi yanji?
9 Anyakutama: Mwatamira ku dziko inango peno mu nzinda ukulu wa Mosambiki, panango mbamudzati kupfundza undimomwene? Panango cigawo peno cisa cidabalwa iwe ciri na kufuna kukulu kwa anyabasa akubvuna. Munakwanisa kunyerezera pya kubwerera toera kuphedza? Panango pinadzakhala pyakukhonda nentsa kwa iwe kugumana basa na nyumba, mbuto mwa munthu wa ku dziko inango peno luwani inango. Panango musalonga cilongero ca pa cisa. Mwakuthimizira, anthu anadzakhala akufunisisa kubvesera mphangwa za Umambo zinamwaza iwe kupiringana munthu anaona iwo ninga wakudza.
10 Mamuna m’bodzi abuluka ku Albanya mbaenda ku Italya ninga nyakuthawa nkhondo, kweneko agumana basa yadidi kakamwe, akhatumiza kobiri kuna banjace ku Albanya. Mudamala iye kudziwa undimomwene, aphembwa na ofesi ya filiali ya Albanya kuti abwerere ku Albanya toera apfundzise Cialbanya nsoka wa apainiya akupambulika a ku Italya, akuti akhafuna kucinja toera kutumikira ku mbuto yakuti iri na kufuna kukulu. M’bale unoyu alemba: “Apainiya anewa akhafuna kuenda ku cisa cidabuluka ine. Iwo nee akhadziwa cilongero, mbwenye akomerwa toera kuenda ku cisa ceneci. Ine ndine wa ku Albanya, pontho ndisalonga Cialbanya. Ninji pikhacita ine ku Italya?” M’bale atonga kubwerera ku Albanya toera kuphedza kumwaza mphangwa zadidi. Iye alonga: “Ndisatsumbikika thangwi yakusiya basa yanga yadidi na kobiri ku Italya? Na pang’ono pene! Ndagumana basa yadidi ku Albanya. Kwa ine, basa yadidi kakamwe na inabweresa kutsandzaya kwakukhonda mala ndi kutumikira Yahova na pyonsene piri na ife!”
11, 12. Ale ananyerezera kucinja toera kuenda ku cisa cakuti iri na kufuna kukulu kwa amwazi mphangwa asafunika kucitanji?
11 Tinacita Tani Pyenepi: Mbadzati kuenda ku Masedonya, Paulu na axamwali ace akhafuna kuenda ku madokero a dzuwa, mbwenye “akhadakhondebswa na nzimu wakuchena,” natenepa iwo aenda kumulolo. (Mach. 16:6) Pikhakhala iwo cifupi na Bitinya, Yezu aakhondesa. (Mach. 16:7) Kubulukira mwa Yezu, Yahova asapitiriza kuonera basa yakumwaza mphangwa. (Mat. 28:19) Natenepa, khala imwe musanyerezera kucinja toera kuthimizira utumiki wanu, phemberani toera kuphemba citsogolero ca Yahova.—Luka 14:28-30; Tgo. 1:5; onani bokosi “Pisa Khumi Pinagumanika m’Mosambiki Pyakuti Piri na Kufuna Kukulu kwa Amwazi Mphangwa.”
12 Phembani maonero a akulu a mpingo wanu na Akristu anango akukola mwauzimu. (Mis.11:14; 15:22) Lerini mphangwa zidabuluswa zinalonga pya kutumikira ku dziko inango na sakani kudziwa pisa pyonsene pinanyerezera imwe kuenda. Munakwanisa kuenda kaona cisa cinafuna imwe kuenda, panango ntsiku zakucepa mbazidzati kufika ntsiku zinafuna imwe kuenda? Khala musafunadi kucinja kuenda ku cisa cinango, musafunika kulembera ofesi ya filiali toera mupaswe mphangwa zakuthimizirika. Natenepa, mbuto mwa kutumiza mwekhene tsamba yanu ku ofesi ya filiali, ipaseni akulu a mpingo wanu, toera alembe mphangwa zinango zakuthimizirika mbidzati kutumizwa tsamba ineyi.—Onani bukhu Organizados Para Fazer a Vontade de Jeová, matsamba 111-112.
13. Ofesi ya filiali inadzakuphedzani tani, mbwenye ninji pinafunika imwe kutsalakana mwekhene?
13 Ofesi ya filiali inadzakutumizirani mphangwa zakuphedza zinalonga pya cisa ceneci toera kukuphedzani kucita pisankhulo, mbwenye iwo nee anadzakuphedzani kulipa kobiri ya ulendo wanu peno nyumba inafuna khala imwe. Pyenepi ndi pinthu pinafunika imwe kudinga mwadidi mbamudzati kucinja. Ale anacinja asafunika kutsalakana pyakufuna pyawo na pya mabanja awo.—Agal. 6:5.
14. Tinacita tani mpholemphole khala tisafuna kucinja peno kuenda kaona dziko yakuti basa yathu isakhondeswa?
14 Madziko Akuti Basa Yathu Isakhondeswa: M’madziko anango, abale na alongo anakhala kweneku asafunika kukhala akucenjera mu kulambira kwawo. (Mat. 10:16) Amwazi mphangwa anaenda kaona peno anacinja kuenda ku madziko anewa, mwakukhonda dziwa anakwanisa kuikha pangozwi basa yathu, mbaikhambo pangozwi citsidzikizo ca abale a pa cisa. Khala musanyerezera kucinja toera kuenda ku madziko anewa, taphata miyendo, lemberani ofesi ya filiali ya pa dziko yanu kubulukira kwa nsoka wa akulu a mpingo wanu mbamudzati kucita pizinji.
15. Ale akuti makhaliro awo nkhabe kuatawirisa kucinja anakwanisa tani kuthimizira utumiki wawo pa cisa cawo?
15 Khala Nee Munakwanisa Kucinja: Mwandimomwene, azinji makhaliro awo nkhabe kuatawirisa toera kucinja kuenda ku cisa cakuti ciri na kufuna kukulu. Khala nee munakwanisa kucinja, lekani kufewesa manungo. Panango ‘unafunguka nsuwo unango ukulu’ wa basa kwa imwe. (1 Akor. 16:8, 9) Panango muyang’aniri wanu wa cisa asadziwa mbuto zakuti munakwanisa kutumikira mbamukhonda kucinja mbuto inakhala imwe cincino. Panango munakwanisa kuphedza mpingo peno nsoka uli cifupi. Panango munakwanisa kuthimizira utumiki wanu m’mpingo unatumikira imwe cincino. Mwakukhonda tsalakana makhaliro anu, cinthu cakufunika kakamwe ndi kuti imwe mukutumikira na ntima onsene mu utumiki.—Akol. 3:23.
16. Tinatsalakana tani ale akuti ali na cifuno ca kuthimizira utumiki wawo?
16 Musadziwa Nkristu wakukola mwauzimu wakuti ali na cifuno cakutumikira ku cisa cakuti ciri na kufuna kukulu kwa amwazi mphangwa a Umambo? Natenepa mphedzeni, pontho muwangiseni! Mudasiya Paulu Antyokiya wa ku Sirya, ukhali nzinda ukulu wacitatu mu Utongi Waciroma (nduli mwa Roma na Alexandriya). Thangwi ya cisa cikulu ceneci, mpingo wa ku Antyokiya panango ukhafuna kakamwe ciphedzo ca Paulu, pontho iwo mbadantsuwa khala iye asiya cisa ceneci. Mbwenye Bhibhlya nee isalonga kuti abale afewesa manungo a Paulu toera akhonde kuenda. Pisaonekeratu pakweca kuti mbuto mwakukhala na maonero akucepa, iwo akumbuka kuti “munda ndi pantsi pano ponsene.”—Mat. 13:38.
17. Ndi mathangwi api alipo toera kudinga pya “kupita na ku Masedonya”?
17 Paulu na axamwali ace apaswa nkhombo thangwi yakutawira ncemerero wa kupita na ku Masedonya. Mu ndzidzi ukhakhala iwo mu nzinda wa Masedonya wa ku Filipi, iwo agumana Lidya, ‘iye abvesera na ndzeru zikulu mafala a Paulu, thangwi Mulungu akhadasanduza ntima wace.’ (Mach. 16:14) Nyerezerani kutsandzaya kudakhala na Paulu na amisionaryo andzace pa ndzidzi wakuti Lidya na onsene a mudzi wace abatizwa! M’madziko mazinji, muli na anthu a mitima yadidi ninga Lidya akuti adzati kupangizwa mphangwa za Umambo. ‘Mungapita na ku Masedonya’ munakhala na mwai wakugumana na kuphedza anthu anewa.
[Bokosi pa tsamba 5]
Pisa Khumi Pinagumanika m’Mosambiki Pyakuti Piri na Kufuna Kukulu kwa Amwazi Mphangwa
Gawo Cilongero Anthu (2007) Amwazi Mphangwa
Ciure, Kabo Delgado Cimakuwa 230.044 4
Sanga, Niassa Ciyao 56.282 0
Moma, Nampula Cimakuwa 329.181 3
Mag. da Kosta, Zambêzia Cixuabo 282.173 10
Xangara, Tete Cicewa 156.738 31
Mossurize, Manika Cixona 195.182 21
Xemba, Sofala Cisena 65.107 44
Inyarrime, Inyambane Cicopi 97.471 27
Cikualakuala, Gaza Citsonga 38.780 13
Namaaxa, Maputo Citsonga 41.914 15
Cidzindikiro: Pana pisa pinango pizinji m’Mosambiki pyakuti piri na kufuna kukulu kwa amwazi mphangwa. Taphata miyendo lemberani ofesi ya filiali khala musafuna kuthimizira utumiki wanu.