Kodi Mukupfundza Pyonsene Pinabuluka Kwa Yahova?

1. Ndi api maonero a Yahova thangwi yakupfundza?

¹ Yahova, ‘Mpfundzisi wathu Wankulu,’ asafuna kuti tikhale anthu akupfundza. (Iza. 30:20) Iye atoma kupfundzisa pidamala iye kucita Mwanace wautombo. (Jwau 8:28) Pakumala kusandukira kwa Adhamu, Yahova nee aleka kupfundzisa, mbwenye mwaufuni apereka citsogolero kwa anthu akusowa ungwiro.—Iza. 48:17, 18; 2 Tim. 3:14, 15.

2. Ndi kampanya ipi yakupfundzisa inacitwa lero?

² Lero, Yahova akutsogolera kampanya ikulu yakupfundzisa m’mbiri ya anthu. Ninga mudaprofetizari Izaiya, pikwi na pikwi pya anthu pikukwira ku ‘phiri yakuphipirisa ya nyumba ya Yahova.’ (Iza. 2:2) Thangwi yanji tisafunika kukwira ku phiri ya nyumba ya Yahova? Toera kupfundziswa njira za Mulungu, inde, toera kupfundziswa na Yahova! (Iza. 2:3) Nkati mwa caka ca basa ca 2010, Mboni za Yahova zaphatisira midzidzi yakupiringana biliyau 1,6 m’basa yakumwaza mphangwa na kupfundzisa undimomwene wa Bhibhlya. Kusiyapo pyenepi, masumana onsene cipfundziso cauzimu cisaperekwa m’mipingo yakupiringana 105.000 pa dziko yonsene yapantsi, pontho mabukhu acipfundziso Acikristu asaperekwa na mbandazi wakukhulupirika na wandzeru mu pilongero pyakupiringana 500.

3. Kodi imwe musaphindula tani na cipfundziso cinaperekwa na Yahova?

³ Phindulani Mwakukwana: Tisaphindula kakamwe na cipfundziso ca Mulungu! Tapfundza kuti Mulungu ali na dzina, pontho iye asatitsalakana. (Sal. 83:18; 1 Ped. 5:6, 7) Tapfundza matawiro a mibvundzo inango yakufunika kakamwe mu umaso: Thangwi yanji anthu asathabuka, pontho asafa? Ndinagumana tani kutsandzaya kwandimomwene? Ndi cipi cifuniro ca umaso? Yahova asatipasambo citsogolero ca makhaliro adidi cakuti cisaticitisa ‘kukhala mwadidi mu njira zathu.’—Yoswa 1:8.

4. Kodi ndi miyai ipi ya cipfundziso iripo kwa atumiki a Mulungu, na thangwi yanji tisafunika kupfundza pyonsene pinabuluka kwa Yahova?

⁴ Mwakuthimizira, Yahova asapasa cipfundziso cakupambulika toera kuphedza atumiki ace azinji kuti athimizire basa yace. Pa matsamba 4-6 pandandaliswa miyai yakuti anango anakwanisa kuifikira. Khala makhaliro athu asaticimwanisa kutambira pipfundziso pidandandaliswa, tinakwanisa kuphindula na cipfundziso ca Mulungu cakuti tinakwanisa kucifikira? Tiri kuwangisa aphale na atsikana, akuti kazinji kene asakakamizwa na apfundzisi, pontho na anango kusaka cipfundziso capadzulu ca dziko, toera kusaka pifuno pyauzimu—cipfundziso ca Mulungu? Kupfundza pyonsene pinabuluka kwa Yahova kunadzatiphedza toera kukhala na umaso wakutsandzaya cincino, pontho ntsogolo umaso wakukhonda mala.—Sal. 119:105; Jwau 17:3.

Miyai Mingasi ya Pipfundziso Pinaperekwa na Gulu ya Yahova

Makalasi Akupfundza Kulemba na Kuleri

• Cifuniro: Kupfundzisa anthu kuleri na kulemba toera apfundze Bhibhlya, pontho apfundzisembo anango undimomwene.

• Ndzidzi: Mwakubverana na pyakufunika pya anyakupfundza.

• Mbuto: Nyumba ya Umambo ya pacisa.

• Mbani Anafuna Kucita Khundu: Amwazi mphangwa onsene pabodzi na ale anafuna kupfundza.

• Toera Kucita Khundu: Akulu a mpingo anacita masasanyiro a makalasi mwakubverana na pyakufuna pyapacisa, pontho iwo anawangisa onsene akuti anaphindula na xikola ineyi.

Xikola Ya Utumiki Wa Mulungu

• Cifuniro: Kupfundzisa amwazi mphangwa toera akhale amwazi mphangwa adidi na apfundzisi a mphangwa zadidi.

• Ndzidzi: Kwenda na kwenda.

• Mbuto: Nyumba ya Umambo ya pacisa.

• Mbani Anafuna Kucita Khundu: Amwazi mphangwa onsene. Kuphatanizambo ale akuti asagumanyikana mwakukhonda phonya na mpingo, akuti asatawira pipfundziso pya Bhibhlya, umaso wawo usabverana na midida Yacikristu.

• Toera Kucita Khundu: Longani na muyang’aniri wa Xikola ya Utumiki wa Mulungu.

Makalasi a Cilongero Cinango

• Cifuniro: Kupfundzisa amwazi mphangwa kuti anamwaza tani mphangwa zadidi mu cilongero cinango.

• Ndzidzi: Nthanda zinai peno zixanu. Mapfundziro asacitwa kazinji kene n’Dimingu camacibese mu ndzidzi ubodzi peno midzidzi miwiri.

• Mbuto: Kazinji kene cifupi na Nyumba ya Umambo.

• Mbani Anafuna Lembesa: Amwazi mphangwa a makhaliro adidi akuti asafuna kumwaza mphangwa m’mbuto zinalongwa cilongero cinango.

• Toera Kucita Khundu: Masasanyiro a makalasi anewa asacitwa na ofesi ya filiali mwakubverana na pyakufuna pyapacisa.

Kumanga Nyumba za Umambo

• Cifuniro: Toera kumanga na kusasanyira papswa Nyumba za Umambo. Ineyi nee ndi xikola tayu, mbwenye pantsi pa masasanyiro anewa anyakuperekeka asapfundziswa maluso akusiyana-siyana toera kuphedzera m’mabasa akumanga.

• Ndzidzi: Mwakubverana na makhaliro a nyakuperekeka.

• Mbuto: Mbuto yonsene inasankhula Komiti Yakumanga Ya Cisa. Anyakuperekeka anango anakwanisa kuphatanizwa toera kuphedzera mabasa a ciomboli m’mbuto zakutali zakuti zagwerwa na cidengwa.

• Toera Kuthema: Abale na alongo asafunika kukhala akubatizwa na akutawirwa na nsoka wa akulu a mpingo. Iwo anakwanisa kukhala na maluso akumanga nyumba peno akukhonda khala na maluso.

• Toera Kucita Khundu: Lembani Petição para o Serviço Voluntário em Construções de Salões do Reino (A-25-T) inapaswa imwe na akulu a mpingo wanu.

Xikola ya Basa ya Upainiya

• Cifuniro: Toera kuphedza apainiya kukwanirisa ‘pyonsene pya mabasa awo.’—2 Tim. 4:5.

• Ndzidzi: Masumana mawiri.

• Mbuto: Inasankhulwa na ofesi ya filiali; kazinji kene cifupi na Nyumba ya Umambo.

• Toera Kuthema: Ale akuti amala caka cibodzi, pontho akupitiriza kutumikira ninga apainiya a ndzidzi onsene.

• Mbani Anafuna Lembesa: Apainiya anathema toera kupita pa xikola ineyi asapangwa na muyang’anira wawo wa cisa mwakukhonda kucita phembo.

Xikola ya Anyakutumikira Apswa pa Beteli

• Cifuniro: Xikola ineyi isacitwa toera kuphedza anyakufika kwene pa Beteli kuti apembere m’mabasa awo.

• Ndzidzi: Ndzidzi ubodzi, pa masumana akukwana khumi na matanthatu, isacitwa kabodzi pa sumana.

• Mbuto: Beteli.

• Toera Kuthema: Asafunika kukhala piwalo pyakukhaliratu pa banja ya Beteli peno anyakuperekeka anafuna tumikira ndzidzi wakulapha (caka peno pyaka pizinji).

• Mbani Anafuna Lembesa: Piwalo pya banja ya Beteli asalembwa mwakukhonda kucita phembo.

Xikola ya Utumiki wa Umambo

• Cifuniro: Toera kupfundzisa akulu a mpingo na atumiki akutumikira kuti atsalakane mabasa awo akuonera gulu. (Mach. 20:28) Xikola ineyi isacitwa pakupita pyaka pyakucepa Mathubo Akutonga angatawirisa.

• Ndzidzi: Mu pyaka pya cincino, xikola ineyi isacitwa mu ntsiku ibodzi na hafu kwa akulu a mpingo, ntsiku ibodzi kwa atumiki akutumikira.

• Mbuto: Kazinji kene cifupi na Nyumba ya Umambo peno Nyumba ya Misonkhano.

• Toera Kuthema: Asafunika kukhala akulu a mpingo peno atumiki akutumikira.

• Mbani Anafuna Lembesa: Akulu a mpingo na atumiki akutumikira asapangwa na muyang’anira wawo wa cisa.

Xikola Kwa Akulu a Mpingoa

• Cifuniro: Toera kuphedza akulu a mpingo kutsalakana mwadidi mabasa awo m’mpingo.

• Ndzidzi: Ntsiku zixanu.

• Mbuto: Inasankhulwa na ofesi ya filiali; kazinji kene cifupi na Nyumba ya Umambo peno Nyumba ya Misonkhano.

• Toera Kuthema: Asafunika kukhala akulu a mpingo.

• Mbani Anafuna Lembesa: Akulu a mpingo akuthema asapangwa na ofesi ya filiali.

Xikola ya Ayang’aniri a Cisa na a Gawo Pabodzi na Akazi Awob

• Cifuniro: Toera kuphedza ayang’aniri a cisa na a gawo kutumikira mwadidi mipingo na ‘kuphata basa yakulonga mafala a Mulungu na kupfundzisa’, pontho toera kukumbiza ale anaonerera iwo.—1 Tim. 5:17; 1 Ped. 5:2, 3.

• Ndzidzi: Nthanda ziwiri.

• Mbuto: Inasankhulwa na ofesi ya filiali.

• Toera Kuthema: Asafunika kukhala ayang’aniri a cisa peno a gawo.

• Mbani Anafuna Lembesa: Ayang’aniri a cisa na a gawo akuthema pabodzi na akazi awo asapangwa na ofesi ya filiali.

Xikola ya Bhibhlya kwa Abale Akukhonda Kumanga Banjac

• Cifuniro: Toera kukhunganya akulu a mpingo na atumiki akutumikira akuti nkhabe nkazi toera kukhala na miyai yakuthimizirika ya basa. Azinji akuti amalisa xikola ineyi anadzasankhulwa toera kutumikira ku mbuto yakuti iri na kufuna kukulu kwa amwazi mphangwa mu dziko yawo. Akucepa asatumwa toera kutumikira ku madziko anango khala ndi akuperekeka.

• Ndzidzi: Nthanda ziwiri.

• Mbuto: Inasankhulwa na ofesi ya filiali; kazinji kene cifupi na Nyumba ya Umambo peno Nyumba ya Misonkhano.

• Toera Kuthema: Abale akuti ndi azice ali nkati mwa pyaka 23 mpaka 62 pyakubalwa, akuti ali na ungumi wadidi, pontho asafuna kutumikira abale na kumwaza mphangwa zadidi ku mbuto yakuti iri na kufuna kukulu kwa amwazi mphangwa. (Mar. 10:29, 30) Asafunika kumala pyaka piwiri mbakatumikira nee kulimira ninga ntumiki wakutumikira peno nkulu wa mpingo.

• Mbani Anafuna Lembesa: Khala xikola ineyi isacitwa mu cisa ca filiali yanu, nsonkhano kwa ale anafuna kulembesa xikola ineyi unadzacitwa pa nsonkhano wa cisa. Mphangwa zakuthimizirika zinaperekwa pa nsonkhano unoyu.

Xikola ya Bhibhlya kwa Akristu Akumanga Banjad

• Cifuniro: Kupasa anyakumanga banja cipfundziso cakupambulika toera kuphatisirwa mwakukwana na Yahova pabodzi na gulu yace. Azinji akuti amalisa xikola ineyi anadzasankhulwa toera kutumikira ku mbuto yakuti iri na kufuna kukulu kwa amwazi mphangwa mu dziko yawo. Akucepa asatumwa toera kutumikira ku madziko anango khala ndi akuperekeka.

• Ndzidzi: Nthanda ziwiri.

• Mbuto: Makalasi mangasi akutoma, atoma kucitwa ku Mbuto Ikulu ya Mapfundziro ya Torre de Vigia ku Patterson, Nova York. Natenepa, Xikola ineyi inadzacitwa mu zimbuto zinasankhulwa na ofesi ya filiali, makamaka pa Nyumba za Misonkhano na Nyumba za Umambo.

• Toera Kuthema: Anyakumanga banja akuti ali nkati mwa pyaka 25 mpaka 50 pyakubalwa, ali na ungumi wadidi, makhaliro awo asaatawirisa kutumikira ku mbuto yakuti iri na kufuna kukulu kwa amwazi mphangwa, pontho ali na nzimu wa “Ine pano ndinenda! Nditumeni.” (Iza. 6:8) Asafunika kukhala akumanga banja mu pyaka piwiri, asafunikambo kutumikira pyaka piwiri nee kulimira m’basa ya ndzidzi onsene.

• Mbani Anafuna Kucita Khundu: Khala xikola ineyi isacitwa mu cisa ca filiali yanu, nsonkhano kwa ale anafuna kulembesa xikola ineyi unadzacitwa pa ntsiku ya nsonkhano wakupambulika. Mphangwa zakuthimizirika zinaperekwa pa nsonkhano unoyu.

Xikola ya Bhibhlya ya Gileade

• Cifuniro: Kupfundzisa apainiya na atumiki anango a ndzidzi onsene toera kucita basa ya umisionaryo.

• Ndzidzi: Nthanda zixanu.

• Mbuto: Mbuto Ikulu ya Mapfundziro ya Torre de Vigia ku Patterson, Nova York.

• Toera Kuthema: Anyakumanga banja akuti amala pyaka pitatu pya kubatizwa, akhale nkati mwa pyaka 21 mpaka 38 pyakubalwa pakucita phembo yawo yakutoma. Asafunika kulonga Cingerezi, akhale akumanga banja mu pyaka piwiri, asafunikambo kutumikira pyaka piwiri nee kulimira m’basa ya ndzidzi onsene. Asafunika akhale na ungumi wadidi. Apainiya anatumikira mu dziko inango (kuphatanizambo amisionaryo); ayang’aniri a cisa na a gawo; piwalo pya banja ya Beteli; adamala kale kupfundza Xikola Yakupfundzisa Basa Ya Utumiki, Xikola Ya Bhibhlya Kwa Abale Akukhonda Kumanga Banja, Xikola Ya Bhibhlya Kwa Akristu Akumanga Banja anakwanisambo kucita khundu khala ndi akuthema.

• Mbani Anafuna Kucita Khundu: Anasankhulwa na mafiliali, nsonkhano kwa ale anafuna xikola ineyi unadzacitwa pa nsonkhano wa gawo. Mphangwa zakuthimizirika zinaperekwa pa nsonkhano unoyu. Khala nsonkhano unoyu nee unadzacitwa ku dziko yanu, pontho imwe musafuna kulembesa, munakwanisa kulembera ofesi ya filiali yanu toera akupaseni mphangwa zakuthimizirika.

Xikola kwa Piwalo pya Komiti ya Filiali na Akazi Awo

• Cifuniro: Kuphedza ale anatumikira pa Komiti ya Filiali toera kutsalakana mwadidi mabasa awo akuonera nyumba za Beteli, kuonera mwadidi mabasa anacitwa m’mipingo, ayang’aniri a cisa na a gawo mu pisa pyawo. Asaonerambo basa yakuthumburuza, kudinda, kutumiza mabukhu ku mipingo na kuyang’anira madepartamentu akusiyana-siyana.—Luka 12:48b.

• Ndzidzi: Nthanda ziwiri.

• Mbuto: Mbuto Ikulu ya Mapfundziro ya Torre de Vigia ku Patterson, Nova York.

• Toera Kuthema: Piwalo pya Komiti ya Filiali peno piwalo pya Komiti ya Dziko peno adaikhwa toera kutumikira ninga wa Komiti.

• Mbani Anafuna Lembesa: Abale akuthema pabodzi na akazi awo asapangwa na Mathubo Akutonga.

[Pidzindikiro pyapantsi]