Pikobiri Piwiri Pya Ntengo Ung’ono

Njira ibodzi yakufunika yakuti tinakwanisa kuphedzera pifuno pya Umambo ndi kucita pyakupereka m’basa yakumwaza mphangwa ya dziko yonsene. Tinacitanji khala nee tiri na kobiri yakukwana?

Ntsiku inango, Yezu aona nzice wakutcerenga mbakapereka mu templo pikobiri piwiri pya ntengo ung’ono m’bokosi ya kuponyera kobiri. Kufuna Yahova kwankulumiza toera kupereka ‘pyonsene pya umphawi wace, kobiri yonsene ikhakhala na iye; moyo wace wonsene.’ (Mko. 12:41-44) Nakuti Yezu alonga cakucitika ceneci, pisapangiza kuti cakupereka ca nzice unoyu cikhali na ntengo ukulu pamaso pa Mulungu. Mu njira ibodzi ene, Akristu a pyaka dzana yakutoma, aonambo kukhala mwai kucita cakupereka ca pinthu pyampfuma toera kuphedzera utumiki. Akristu akupfuma peno akutcerenga akhapereka mwakubverana na pikhakwanisa iwo. Mpostolo Paulu alonga citsandzo ca Akristu a ku Masedonya akuti maseze akhali ‘pa kutcerenga, adembetera mbaphemba kuti akwanisembo kuphedza andzawo.’—2 Akor. 8:1-4.

Natenepa, khala tinakwanisa kucita cakupereka ca ‘pikobiri piwiri pya ntengo ung’ono,’ tisafunika kumbuka kuti pyakupereka ping’ono pizinji pingabvunganizwa pinadzakhala ntsama ikulu. Kupereka kwathu kwakubuluka mu ntima kunadzakomeresa Baba wathu wakudzulu, thangwi ‘Mulungu asafuna’ munthu anapasa mwakukomerwa.—2 Akor. 9:7.