‘Khalani Mu Ufuni Wa Mulungu’
1. Ndi cipi cifuniro cakubuluswa kwa bukhu ‘Khalani Mu Ufuni Wa Mulungu’?
1 Mwakufunisisa tikudikhira kudingwa kwa bukhu yakuti ‘Khalani Mu Ufuni Wa Mulungu’ pa Pfundziro Ya Bhibhlya Ya Mpingo, kutomera pa sumana 5 ya Bingu ya 2012! Tsamba ya Mathubo Akutonga idalemberwa kwa anthu onsene anafuna Yahova isamalisira na mafala akuti: “Cidikhiro cathu ndi cakuti bukhu iyi inadzakuphedzani kupitiriza kuphatisira undimomwene mu umaso wanu mbumukhala tenepa ‘mu ufuni wa Mulungu na cidikhiro cakukhala na umaso peno moyo wakukhaliratu.’—Yuda 21.”
2. Bukhu ineyi inadzatiphedza mu pinthu pipi pya umaso?
2 Tinadikhiranji: Midida ya Bhibhlya isaphatisirwa tani mu pinthu ninga uxamwali, ubalangazi, kulemedza utongi, pidzolowero pya munthu, kumanga banja, kucedza, na misambo? Cikumbuntima cathu cinadzaumbwa mwakubvera na midida yapadzulu yaulungami inapangizwa m’Mafala a Mulungu. (Sal. 19:7, 8) Munathimizira ife kubvesesa mwadidi njira za manyerezero a Yahova, cifuno cathu cakunkomeresa cinatikulumiza kukhala akubvera mu umaso wathu onsene.—Mis. 27:11; 1 Jwau 5:3.
3. Thangwi yanji tisafunika kucita pinakwanisa ife toera kutawira pa pfundziro ya sumana na sumana?
3 Khalani Akutonga toera Kucita Khundu: Pa kukhunganyika kwanu, khalani na cifuno toera kusimba Mulungu pakati pa mbumba yace. (Aheb. 13:15) Onsene m’mpingo anadzadinga pabodzi bukhu ineyi ya pfundziro. Nakuti mphangwa zinafuna kudzadingwa m’masumana onsene ndi zakucepa, tonsene tinadzakwanisa kupereka ntawiro, pyenepi pinadzatipasa cinyindiro cakugawana na anango pinthu pidapfundza ife. Matawiro athu akukhunganywa mwadidi anadzakulumiza anango toera kufuna na kucita pinthu pyadidi, pontho anadzacitisa kuti kudingwa kwa mphangwa kukhale kwakutsandzayisa na kwakuphindulisa. (Aheb. 10:24) Kusiyapo pyenepi, kutsandzaya kwathu kunadzathimizirika kakamwe munalonga ife pya cikhulupiro cathu.
4. Thangwi yanji mphyakufunika kubvera matongero a Yahova?
4 Camasiku pa ntsiku yace yakumalisa pa dziko yapantsi ninga munthu, Yezu alandanisa kubvera matongero a Yahova na kupitiriza kukhala mu ufuni wa Mulungu. (Jwau 15:10) Na ciphedzo ca bukhu yakuti ‘Mu Ufuni Wa Mulungu’, tinadzakhala akutonga kakamwe kuphatisira midida ya Bhibhlya mu umaso wa ntsiku na ntsiku, ‘mbatikhala mu ufuni wa Mulungu.’—Yuda 21.