Komerwani Na Pinaphata Imwe Na Manja Anu
1. Kodi ninji cinafuna kuticitisa kupungula phinga yathu mu utumiki?
1 Munthu acitwa toera “kukomerwa na pinaphata iye na manja ache.” (Koel. 2:24) Mbwenye, tingakhonda kuona maphindu adidi mu utumiki wathu, kufewa manungo kunaticitisa kuluza kutsandzaya na kupungula phinga yathu. Ninji cinafuna kutiphedza toera kupitiriza kukhala na maonero adidi?
2. Thangwi yanji tisafunika kukhala na pidikhiro pyakulinganira thangwi ya kutawirwa kwa utumiki wathu?
2 Khalani Na Pidikhiro Pyakulinganira: Kumbukani kuti basi ene anthu akucepa atawira pipfundziso pya Yezu, mbwenye mwandimomwene utumiki wace ukhali wakupembera kakamwe. (Jwau 17:4) Mu nsangani wace unalonga pya nyakubzwala, Yezu alonga kuti mitima mizinji nee mbidatawira mphangwa za Umambo zakulandana na mbeu. (Mat. 13:3-8, 18-22) Mbwenye kuwangisira kwathu kusapitiriza kukwanirisa pinthu pizinji.
3. Tinakwanisa tani ‘kubala misapo’ ngakhale tingaona anthu akucepa kakamwe mbakatawira basa yathu yakumwaza mphangwa?
3 Tinabala Tani Misapo Yakunjipa: Mwakubverana na nsangani wa Yezu, ale anatawira mphangwa ‘mbadabala misapo yakuinjipa.’ (Mat. 13:23) Tirigu ingamala kumera mbikula, isabala nsapo wakuti nee si trigu ing’ono tayu, mbwenye ndi mbeu ipswa. Mwandimomwene nsapo unabalwa na Akristu akupembera makamaka nee ndi anyakupfundza apswa tayu, mbwenye ndi kubzwala mbeu mwakubwereza—kubulukira mu kumwaza mphangwa za Umambo. Pyenepi pisabweresa “kukomerwa” kakamwe kwakuti kunaticitisa kukhala akutsandzaya, mwakukhonda tsalakana kutawira kwa anthu. Tikucita khundu toera kucenesa dzina ya Yahova. (Iza. 43:10-12; Mat. 6:9) Ife tisakomerwa na mwai wakukhala anyakuphedza a Mulungu. (1 Akor. 3:9) Pontho ‘nsapo unoyu wa milomo’ yathu usakomeresa Yahova.—Aheb. 13:15, 16.
4. Ndi maphindu api akukhonda dziwika kwa ife akuti asagumanika mu utumiki wathu?
4 Mwakuthimizira, panango basa yathu yakuwanga inakhala na maphindu akuti nee tikuaona. Panango anthu anango adabva Yezu mbakamwaza mphangwa nee adzakhala anyakupfundzace mpaka mudamalisa iye utumiki wace pa dziko yapantsi. Mu njira ibodzi ene, mbeu ya Umambo inabzwala ife panago nee inatoma kukula mu ntima mwa munthu mpaka kupita kwa ndzidzi uzinji, panango munthu unoyu anadzapita mu undimomwene mbatikhonda kupidziwa. Mwandimomwene, utumiki wathu usakwanirisa pinthu pizinji pyakukomeresa. Natenepa, tendeni tipitirize ‘kubala misapo mizinji’ mbatipangizika tekhene kuti ndife anyakupfundza a Yezu.—Jwau 15:8.