“Perekani Umboni Wakukwana”

1. Ndi citsandzo cipi cadidi cidapangiza mpostolo Paulu mu utumiki?

¹ ‘Cita mwakukwana makhundu onsene a utumiki wako.’ (2 Tim. 4:5, Tradução do Novo Mundo) Mwakukhonda penula mpostolo Paulu akhali wakusudzuka toera kupereka cenjezo ineyi kuna Timoti. Mwandimomwene, kutomera caka 47 mpaka 56 N.W., Paulu amalisa kucita maulendo matatu aumisionaryo. Bukhu ya Machitiro isalonga mwakubwereza-bwereza kuti Paulu apereka ‘umboni wakukwana.’ (Mach. 23:11; 28:23) Tinakwanisambo tani kucita pyenepi mu ntsiku zathu?

2. Tinapereka tani umboni wakukwana pakumwaza mphangwa nyumba na nyumba?

² Nyumba Na Nyumba: Mu kuwangisira kwathu toera kucedza na anaciro nyumba akuti cipo adzati kubva mphangwa zadidi, panango tisafunika kuenda mu utumiki m’midzidzi yakusiyana-siyana pa ntsiku. Toera kugumana mamuna panyumba panango tisafunika kumwaza mphangwa camasiku peno pakumala kwa sumana. Tisafunika kuwangisira toera kulonga na munthu anagumana ife panyumba ibodzi na ibodzi, mbatibwerera kazinji kene panyumba zinakhonda ife kugumana anthu. Ndiye tani khala mwabwerera kazinji kene mbwenye nkhabe kugumana mwanaciro nyumba? Panango kulemba tsamba peno kumenya ntokodzi kunadzabweresa maphindu adidi.

3. Kodi ndi miyai ipi iri na m’bodzi na m’bodzi wa ife toera kupereka umboni wapakweca na wantsusukano?

³ Umboni Wapakweca Na Wantsusukano: Lero atumiki a Yahova asamwaza ‘udziwisi wandimomwene’ kwa anthu onsene anafuna kubvesera. M’midzidzi inango pyenepi pisacitika mu “miseu na pa misika [peno mbuto zapakweca].” (Mis. 1:20, 21) Mu ndzidzi unacita ife mabasa athu a ntsiku na ntsiku, kodi tisanyerezera kupereka umboni? Kodi tinakwanisa kulonga kuti tiri akudzudzumika kakamwe na ‘basa yakupereka umboni’? (Mach. 18:5) Khala ndi tenepo, tikukwanirisa basa yathu ‘yakupereka umboni wakukwana.’​—Mach. 10:42; 17:17; 20:20, 21, 24.

4. Kodi kucita phembero na kunyerezera mwacidikhodikho kusatiphedza tani toera kupereka umboni wakukwana?

⁴ M’midzidzi inango, na thangwi yakufewa kwathu peno manyadzo, panango tisanyinyirika toera kupereka umboni. Mwandimomwene, Yahova asadziwa pinakhonda kwanisa ife. (Sal. 103:14) Makhaliro anewa angaoneka, tinakwanisa kucita phembero kuna Yahova kuti atipase cipapo toera kulonga. (Mach. 4:29, 31) Pontho, pakucita pfundziro ya munthu paekha na kunyerezera Mafala a Mulungu mwacidikhodikho, tinakwanisa kuikha manyerezero athu pa ntengo ukulu kakamwe wa mphangwa zadidi. (Afil. 3:8) Pyenepi pinadzatikulumiza toera kumwaza mphangwa mwaphinga!

5. Tinakwanisa tani kucita khundu mu kukwanirisika kwa profesiya ya Yoele?

⁵ Profesiya ya Yoele yalongeratu kuti mbidzati kufika ntsiku ikulu yakugoswa ya Yahova, atumiki a Mulungu mbadapitiriza kuenda “kutsogolo basi,” pontho nee mbadatawirisa cinthu consene kuacimwanisa kumwaza mphangwa. (Yoele 2:2,7-9) Tendeni ticite pyonsene pinakwanisa ife m’basa ineyi yakupereka umboni, yakuti cipo inadzacitwa pontho!